ەكى ەلدىڭ اكادەمياسى ماڭىزدى مەموراندۋمعا قول قويدى

بىشكەكتە ءوتىپ جاتقان «تۇركى حالىقتارىنىڭ مەملەكەت باسقارۋ ءداستۇرى» اتتى حالىقارالىق ءى عىلىمي كونگرەسى اياسىندا تۇركى اكادەمياسى مەن قىرعىز رەسپۋبليكاسىنىڭ ۇلتتىق عىلىم اكادەمياسى ماڭىزدى مەموراندۋمعا قول قويدى. بۇل تۋرالى تۇركى اكادەمياسىنىڭ ءباسپاسوز قىزمەتى حابارلادى. جيىن بارىسىندا باۋىرلاس ەكى اكادەميانىڭ پرەزيدەنتتەرى دارحان قىدىرالى مەن ابدىگانىەركەباەۆ تۇركولوگيا سالاسىندا بىرلەسە عىلىمي زەرتتەۋلەر جاساۋدىڭ ماڭىزدىلىعىنا توقتالدى. جاس عالىمداردى ىنتىماقتاستىققا تارتۋ ماسەلەسىنە باسا ءمان بەرىلدى. تاراپتار نەگىزگى جۇمىستارىن تۇركى حالىقتارىنىڭ تاريحى مەن مادەنيەتى, تۇركى تىلدەرى جانە ادەبيەتتەرى, فيلوسوفياسى, تۇركىتىلدەس مەملەكەتتەردىڭ زاڭ سالاسى, ەكونوميكاسى جانە ساياساتى, سونداي-اق, قازاق-قىرعىز بايلانىستارىنا باعىتتايدى. مەموراندۋم اياسىندا عىلىمي جوبالارعا بايلانىستى عىلىمي-زەرتتەۋ توپتارىنىڭ كۇشتەرىن پايدالانۋ, بىرلەسە وتىرىپ كونفەرەنتسيالار, سيمپوزيۋمدار نەمەسە جۇمىس توپتارىن ۇيىمداستىرۋ; عىلىمي-تەحنيكالىق قۇجاتتاردى  ءوزارا الماستىرۋ جايى قاراستىرىلعان. سونىمەن, ەكى ەلدىڭ اكادەمياسى قول قويىلعان قۇجاتتىڭ ناتيجەسىن ءدال باعامداپ وتىرۋ ءۇشىن استانا نەمەسە بىشكەكتە جىلىنا ءبىر رەت كەزدەسۋ وتكىزۋگە كەلىستى. جالپى, «تۇركى حالىقتارىنىڭ مەملەكەت باسقارۋ ءداستۇرى» اتتى حالىقارالىق عىلىمي كونگرەسى العاش رەت ۇيىمداستىرىلىپ وتىر. تاعى ءبىر اتاپ وتەرىمىز, كورشى ەل بيىل «قىرعىز مەملەكەتتىگىن نىعايتۋ جىلى» دەگەن ماڭىزدى شارانى جاريالاپ, ونىڭ اياسىندا اتقارىلاتىن ىستەردى پىسىقتاۋ ءۇشىن عالىمداردىڭ ۋاجدەرىن تىڭداۋدى ءجون ساناپتى. ال وسى ايتۋلى جيىندا ءسوز العان تۇركى اكادەمياسىنىڭ پرەزيدەنتى دارحان قىدىرالى مىڭداعان جىلدىق تاريحى بار تۇركىلەر ءوز داۋىرلەرىندە بىرقاتار الىپ يمپەريالار قۇرعانىن جانە ونى تابىستى باسقارعانىن اتاپ ءوتتى. سونداي-اق, ول ءجۇسىپ بالاساعۇننىڭ مەملەكەت باسقارۋ تۋرالى جازعان «قۇتتى بىلىك» شىعارماسىنىڭ ماڭىزىنا كەڭىرەك توقتالدى. عىلىمي كونگرەسكە اقش, قازاقستان, وزبەكستان, ءازىربايجان, كورەيا, جاپونيا مەن رەسەي سىندى ەلدەردىڭ زەرتتەۋشى عالىمدارى قاتىسۋدا. شارا اياسىندا تۇركى اكادەمياسى مەن قىرعىز-تۇرىك حالىقارالىق ماناس ۋنيۆەرسيتەتى ءوزارا ىنتىماقتاستىق تۋرالى كەلىسىمگە قول قويدى. داستان كەنجالين. دەرەككوز: تۇركى اكادەمياسىنىڭ ءباسپاسوز قىزمەتى. فوتو: Time.kg.