قاسىم-جومارت توقاەۆقا بيىلعى ءبىرىنشى توقساننىڭ قورىتىندىسى بويىنشا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى جونىندە ەسەپ بەرىلدى.
ەلوردا اكىمدىگى پرەزيدەنتتىڭ تاپسىرماسى بويىنشا الەۋمەتتىك نىساندار سالۋ, تۇرعىن ۇيلەر الابىن دامىتۋ, شاعىن جانە ورتا بيزنەستى قولداۋ, قۇرىلىسى ۇزاققا سوزىلعان نىسانداردىڭ جۇمىسىن اياقتاۋ, جەكەمەنشىك سەكتوردان ينۆەستيتسيا تارتۋ جونىندە جۇيەلى جۇمىستار جۇرگىزىپ جاتىر. اتاپ ايتقاندا, بيىلعى ءۇش اي ىشىندە 600 مىڭ شارشى مەتردەن استام تۇرعىن ءۇي پايدالانۋعا بەرىلگەن. قالا ەكونوميكاسىنا 154 ميلليارد تەڭگەدەن استام قارجى تارتىلعان. جەكەمەنشىك سەكتوردان ينۆەستيتسيا تارتۋ كولەمى بىلتىرعى جىلدىڭ وسى كەزەڭىمەن سالىستىرعاندا 4,3 پايىزعا وسكەن. 2021 جىلى 1,2 تريلليون تەڭگەدەن استام قارجى تارتىلعان.
مەملەكەت باسشىسىنا سورعى-سۇزگىش ستانتسياسىنىڭ (سسس-3) قۇرىلىسى, نوسەر كارىزدەرى, كارىزدىك تازارتۋ قۇرىلىستارىن (كتق-2) جوبالاۋ, گازدى قازاندىقتار مەن باسقا دا نىساندار تۋرالى مالىمەت بەرىلدى.
بۇدان بولەك التاي كولگىنوۆ قاسىم-جومارت توقاەۆقا بيىل 200-دەن استام اۋلا مەن قوعامدىق ورىندارعا (باقتار, ساياباقتار مەن بۋلۆارلار) اباتتاندىرۋ جۇمىستارى جۇرگىزىلەتىنى جونىندە ايتتى.
پرەزيدەنت قالا جۇرتشىلىعىنىڭ پىكىرىن ەسكەرە وتىرىپ, ەلوردانى جوسپارلى تۇردە ودان ءارى دامىتۋ جانە اباتتاندىرۋ جۇمىستارىن جالعاستىرۋدى تاپسىردى.
