كوپشىلىك كۇتكەندەي جولداۋدا جۋىق ارادا جۇزەگە اسىرىلاتىن ساياسي رەفورمالاردىڭ جاڭا باعدارلاماسى ورتاعا سالىندى. الەۋمەتتىك-ەكونوميكالىق باعىتتا اتقارىلاتىن ءىس-شارالار كوپشىلىك كوكەيىنە ۇيالادى. ءبىزدىڭ, قالامگەرلەردىڭ, اقپارات سالاسى قىزمەتكەرلەرىنىڭ كوڭىلىن الاڭداتىپ وتىرعان ءبىر ماسەلە – بۇقارالىق اقپارات قۇرالدارى ءرولىنىڭ تومەندەۋى بولاتىن. بۇل باعىتتا دا الدىمىزدا وڭ وزگەرىستەر كۇتىپ تۇر. جولداۋدا «بۇقارالىق اقپارات قۇرالدارى باسەكەگە قابىلەتتى جانە ەركىن بولۋى كەرەك. بۇل قاعيدات قازىر كەز كەلگەن وركەنيەتتى ەل ءۇشىن ايرىقشا ماڭىزدى», دەدى پرەزيدەنت. مەملەكەت باسشىسىنىڭ سوزىنشە, وتاندىق باق قوعامنىڭ سۇرانىسىنا ساي جۇمىس ىستەگەنى ءجون. «ۇكىمەتتىك ەمەس سەكتور ماڭىزدى الەۋمەتتىك ماسەلەلەردى كوتەرۋدە جانە ولاردىڭ كەشەندى شەشىلۋىنە ىقپال ەتۋدە. رەفورمالاردى دايىنداۋ مەن ىسكە اسىرۋعا قوعامدىق ۇيىمدار مەن بەلسەندىلەردى نەعۇرلىم كەڭىنەن جانە تەرەڭ تارتۋ قاجەت», دەيدى ول.
مەملەكەتىمىزدىڭ وركەندەۋى ايماقتاردىڭ قۋاتتى بولۋىنا تىكەلەي بايلانىستى. بۇل تۋرالى پرەزيدەنت قاسىم-جومارت توقاەۆ قازاقستان حالقىنا جولداۋىندا ايتتى. بۇعان دەيىن ءبىز, جەتىسۋلىق ارداگەرلەر ساپىندا قاپشاعاي قالاسىنا دىنمۇحامەد قوناەۆ ەسىمىن بەرۋ تۋرالى ۇسىنىس جولداعان بولاتىنبىز. كوپشىلىكتىڭ ۇسىنىسى قولداۋ تاباتىنىن پرەزيدەنت جولداۋىندا اتاپ كورسەتتى. سونداي-اق جەتىسۋ جانە الماتى وبلىستارىن, ۇلىتاۋ وبلىسىن, سەمەي ايماعىندا اباي وبلىسىن قۇرۋ كوپشىلىكتىڭ جىلدار بويى جۇزەگە اسپاي كەلە جاتقان ارمانى بولاتىن. سوندىقتان ءبىز جاڭا قازاقستان قۇرۋ يدەياسى اياسىندا مەملەكەت باسشىسىنىڭ جۇرتشىلىق تىلەگىنە قۇلاق اسقانىن كورىپ قۋاندىق.
ال سايلاۋ ناتيجەسى قاي كەزدە دە جۇرتشىلىقتى الاڭداتىپ كەلگەنى بەلگىلى. جولداۋدا اتاپ كورسەتىلگەن وسى تۇرعىداعى پىكىر پرەزيدەنت ۇستانىمىنا سەنىمىمىزدى نىعايتا تۇسەدى. «حالىقارالىق تاجىريبەدە سايلاۋدى ۇيىمداستىرۋ جۇيەسى ۇدايى وزگەرىپ وتىراتىنى بەلگىلى, ياعني ءادىل جانە اشىق سايلاۋ وتكىزۋ ءۇشىن ءتيىمدى شەشىم ىزدەۋدىڭ ماڭىزى زور», دەگەن مەملەكەت باسشىسى سوڭعى جىلداردا بۇل ۇدەرىسكە اقپاراتتىق جانە تەحنولوگيالىق فاكتورلارمەن بىرگە كوروناۆيرۋس ىندەتى دە اسەر ەتىپ جاتقانىن اتاپ ءوتتى. «كوپتەگەن ەل داۋىس بەرۋدىڭ بالامالى تۇرلەرىن پايدالانىپ جاتىر. ياعني ەلەكتروندى, مەرزىمنەن بۇرىن, قاشىقتان, كوپكۇندىك داۋىس بەرۋ تاسىلدەرى كەڭىنەن قولدانىلا باستادى. سوندىقتان الەمدەگى ۇزدىك تاجىريبەلەردى زەرتتەپ, قاجەت بولسا, ونى بىرتىندەپ ەنگىزگەن ءجون», دەدى قاسىم-جومارت توقاەۆ.
سونىمەن جولداۋ كوپشىلىك نازارىنا ۇسىنىلدى. كوپتەن كۇتكەن وزگەرىستەر كوڭىلىمىزدى ورنىقتىردى. ءبىز ۇلىستىڭ ۇلى كۇنى قارساڭىندا وسى جولداۋدان جىل كەلگەندەي جاڭالىق سەزىندىك.
جومارت يگىمان,
اقىن, قازاقستان جازۋشىلار وداعىنىڭ مۇشەسى,
سارقان اۋداندىق ءماسليحاتىنىڭ دەپۋتاتى
الماتى وبلىسى
