سەنات توراعاسى ماۋلەن اشىمباەۆ جۋىردا جايىلىم ماسەلەسىن شەشۋگە باعىتتالعان زاڭ جوباسىن تانىستىردى. وسى ارادا ەندىگى نەگىزگى ماسەلەنىڭ مارعاسقاسى, وسى دايىندالعان زاڭ جوباسىنا جەكە قوسالقى شارۋاشىلىقتاردىڭ مالىن شۇرايلى, قۇنارلى جايىلىمدارمەن قامتاماسىز ەتۋگە باعىتتالعان ناقتى شارالار بەلگىلەنۋگە ءتيىس. اتاپ ايتار بولساق, بىرىنشىدەن, اۋىل اكىمشىلىگىنىڭ بەكىتىلەتىن بيۋدجەتتەرىن جوسپارلاعاندا, سول جوسپاردىڭ ىشىنە مىندەتتى تۇردە اۋىل اكىمىنە تىكەلەي باعىناتىن كوممۋنالدىق شارۋاشىلىق ۇيىمداستىرىلىپ, قۇرىلۋى قاجەت. وسى كوممۋنالدىق شارۋاشىلىقتى كەرەكتى تەحنيكامەن, ارنايى قۇرىلعىسى بار تراكتورلارمەن, اۆتوماشينالارمەن, قامتاماسىز ەتىپ, ونى بىلىكتى جاقسى ماماندارمەن تولىقتىرۋ كەرەك. بۇل ۇجىمنىڭ مۇشەلەرى اۋىل تۇرعىندارىنا وزدەرى ءشوپ شاۋىپ, ەگىن, مال شارۋاشىلىعىمەن تولىق اينالىسا الاتىن, ال قىس مەزگىلىندە جول, كوشەلەردى ءوز كۇشىمەن تازارتا الاتىن دارەجەدە بولىپ, كەرەك كەزىندە ۇساق جەكە مەنشىك يەلەرىنە, اسىرەسە زەينەتكەر, اۋرۋشاڭ, تۇرمىسى تومەن وتباسىلارعا قىسى-جازى كەرەكتى اعاشىن, كومىرىن قولجەتىمدى باعامەن ساتىپ جانە تاسىپ بەرە السا, مىنە, سوندا عانا ەل مەرەيى كوتەرىلىپ, الەۋمەتتىك جاعدايدىڭ دۇرىستالۋىنا ۇلكەن سەپتىگى تيەتىنى ايدان انىق.
وسى كەزەك كۇتتىرمەيتىن ماسەلەلەر اتالعان زاڭدا دۇرىس شەشىمىن تاپپاسا, وندا «باياعى جارتاس, سول جارتاس» بولىپ قالا بەرمەك, ەل تۇرعىندارى داراقىلىق, دايەكسىز, داۋرىقپا سوزدەردەن ايىرىلا الماي, بۇك ءتۇسىپ بۇگىلگەن كۇيىندە قالا بەرەدى.
مۇنىڭ نەگىزگى سەبەپ-سالدارىنا كەلەتىن بولساق, جىل سايىن تالاساتىن تەندەر جارىسى. وسىنداي ەلگە دە, جەرگە دە تىپتەن ءتيىمسىز پايداسى جوق قيسىنسىز ءىستى اۋىلدىق جەردە مۇلدەم جابۋ كەرەك. نەگە دەسەڭىز, سول تەندەرگە بولىنگەن اقشا قورى كەسىلە-كەسىلە شولاق كۇرەكتەي بولىپ, قارىمدى, ناتيجەلى جۇمىس ىستەۋگە جۇمسالماي, اياعى ىرىگەن-شىرىگەن دۇنيەلەرگە بارىپ تىرەلىپ جاتادى.
سوندىقتان وسى ايتىلعان تۇيتكىلدى تاقىرىپتى مايشاممەن قاراپ, باتىل دا, دۇرىس شەشىمدەر قابىلدانسا نۇر ۇستىنە نۇر بولار ەدى. زاڭ سۇزگىلىكتى سىناقتان وتسە عانا ەل ومىرىنە سەنىمدى سەرپىن بەرەتىنى ءسوزسىز.
جاڭبىرشى تىلەۋعابىلوۆ,
زەينەتكەر
قوستاناي وبلىسى,
رۋدنىي قالاسى
