وتىرىستا پاۆلودار جانە جامبىل وبلىستارى اكىمدىكتەرى قىزمەتىنىڭ اشىقتىعىن قامتاماسىز ەتۋ ماسەلەلەرى قارالدى. جيىن بارىسىندا مينيستر بيىل كوميسسيا جۇمىسىندا وڭىرلەردە «اقپاراتقا قول جەتكىزۋ تۋرالى» زاڭدى ساقتاۋعا باسا نازار اۋدارىلاتىنىن اتاپ ءوتتى. وسى ماقساتتا كوميسسيا الاڭىندا جىل بويى بارلىق جەرگىلىكتى اتقارۋشى ورگاندار قارالماق.
ا.وماروۆ جامبىل جانە پاۆلودار وبلىستارىنىڭ اكىمدىكتەرىنە انىقتالعان كەمشىلىكتەر مەن بۇزۋشىلىقتاردى جويۋ جانە بولدىرماۋ جونىندەگى 2022 جىلعا ارنالعان ءىس-شارالار جوسپارىن بىرلەسىپ ازىرلەۋدى جانە بەكىتۋدى ۇسىندى. سونىمەن قاتار مينيستر جيىنعا قاتىسۋشىلاردىڭ نازارىن پرەزيدەنتتىڭ 2022 جىلعى 7 ساۋىردەگى «ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىن وتكىزۋ تۋرالى» جارلىعىنا اۋداردى. بۇل قۇجاتتا مينيسترلەردىڭ وڭىرلەردە حالىقپەن تۇراقتى كەزدەسۋلەر وتكىزۋى ەگجەي-تەگجەي جازىلعان.
كەزدەسۋدە بايانداما جاساعان اقپارات جانە قوعامدىق دامۋ ۆيتسە-ءمينيسترى د.قادىروۆ «اقپاراتقا قول جەتكىزۋ تۋرالى» زاڭ تالاپتارىن جاپپاي جانە مۇلتىكسىز ساقتاۋ قاجەتتىگىن ءسوز ەتتى.
پاۆلودار جانە جامبىل وبلىستارىنىڭ اكىمدىكتەرى ءۇشىن پروبلەمالاردىڭ ءبىرى – رەسمي سايتتارىنداعى جانە «اشىق ۇكىمەت» پورتالىنداعى اقپاراتتىڭ ۋاقتىلى جاڭارتىلماۋى. «مىسالى, ازاماتتاردى قابىلداۋ كەستەسى, بايلانىس دەرەكتەرى, ستاتيستيكالىق سالالىق دەرەكتەر, بوس جەر ۋچاسكەلەرىنىڭ بولۋى تۋرالى اقپارات, تۇرعىندار ءۇشىن ماڭىزدى دەرەكتەر سايتتا جاڭارتىلمايدى», دەپ اتاپ ءوتتى د.قادىروۆ.
وڭىرلەرگە ءتان تاعى ءبىر ماسەلە – «اشىق ۇكىمەت» پورتالدارىندا اقپاراتتى ورنالاستىرۋ ءتارتىبىنىڭ ساقتالماۋى, سونداي-اق نقا جوبالارى مەن بيۋدجەتتىك باعدارلامالاردى قوعامنىڭ تالقىلاۋى تۋرالى حابارلامالاردىڭ بولماۋى. «سونىمەن قاتار نقا جوبالارىنا كەلىپ تۇسكەن پىكىرلەر مەن ۇسىنىستاردىڭ ەداۋىر بولىگىنە «نازارعا الىندى» دەگەن سياقتى فورمالدى جاۋاپتار بەرىلەدى», دەيدى د.قادىروۆ.
بۇدان بولەك وتىرىستا اقپاراتقا قول جەتكىزۋ ماسەلەلەرى بويىنشا ۋاكىلەتتى تۇلعالاردىڭ شالا-پۇلا اتقارىلعان جۇمىستارى سىنعا الىندى. ەستەرىڭىزگە سالا كەتەيىك, وتكەن جىلدان باستاپ بارلىق مەملەكەتتىك ورگاندارعا ۋاكىلەتتى تۇلعالار ينستيتۋتى ەنگىزىلگەن بولاتىن.
جيىندا پاۆلودار جانە جامبىل وبلىستارىنىڭ اكىمدىكتەرىنە الەۋمەتتىك جەلىلەر مەن مەملەكەتتىك ورگانداردىڭ ءبىرىنشى باسشىلارىنىڭ بلوگ پلاتفورماسىن جانداندىرۋ قاجەتتىلىگى ەسكەرتىلدى. مينيسترلىك وكىلى ءسوزىنىڭ سوڭىندا اشىق وتىرىستارعا قولجەتىمدىلىكتى قامتاماسىز ەتۋدىڭ, سونداي-اق باق ءۇشىن اشىقتىقتىڭ ماڭىزدىلىعىن اتاپ ءوتتى.
