تەررورلىق ماقساتتا شەت اسپاقشى بولعان وتباسى سوتتى بولدى

اتىراۋ وبلىسىنىڭ جىلىوي اۋداندىق سوتى قۇلسارى قالاسىنىڭ تۇرعىندارى ەرلى-زايىپتى ب. مەن ن.-عا قاتىستى قىلمىستىق كودەكستىڭ 233-1 بابىنىڭ 1 تارماعىمەن (تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ, سونداي-اق كورسەتىلگەن مازمۇنداعى ماتەريالداردى تاراتۋ) سوت ۇكىمى شىقتى.بۇل تۋرالى وبلىستىق سوتتىڭ ءباسپاسوز حاتشىسى بورانباي عاليەۆ حابارلادى. «ەرلى-زايىپتىلار ب. مەن ن. وزدەرىنىڭ تۋىسى بولىپ كەلەتىن ە.-ءنىڭ ىقپالىمەن حالىقارالىق تەرروريستىك ارەكەتتەر جاساۋ ماقساتىندا شەت ەلگە ءوتىپ كەتۋگە دايىندالعان. ەل اۋماعىنان شىعۋ ءۇشىن وزدەرىمەن بىرگە كامەلەتكە تولماعان 4-تەن 14 جاسقا دەيىنگى التى بالاسىنىڭ قۇجاتتارىن كوشى-قون پوليتسياسى ارقىلى راسىمدەگەن», — دەلىنگەن حابارلامادا. سوتتا ەرلى-زايىپتىلاردىڭ كىنالارى تولىق دالەلدەندى. بالالاردىڭ اكەسىنە 5 جىل مەرزىمگە باس بوستاندىعىنان ايىرۋ جازاسىن تاعايىندادى. جۇبايى دا اتالعان باپ بويىنشا كىنالى دەپ تانىلىپ, 3 جىلعا باس بوستاندىعىنان ايىرۋ جازاسى تاعايىندالدى. جازانى وتەۋدى بالالارىنىڭ ۇلكەنى كامەلەتكە تولعانعا دەيىن, ياعني 5 جىلعا  كەيىنگە قالدىردى. سوت ۇكىمى زاڭدى كۇشىنە ەنگەن جوق. قۇرىش نۇرىمبەت. دەرەككوز: اتىراۋ وبلىستىق سوتىنىڭ ءباسپاسوز قىزمەتى. فوتو: www. Inosmi.ru.