كوستا-ريكاداعى پرەزيدەنت سايلاۋىندا لۋيس گيلەرمو سوليس جەڭىسكە جەتتى

كوستا-ريكا مەملەكەتىندە وتكەن پرەزيدەنت سايلاۋىنىڭ العاشقى قورىتىندىسى بويىنشا «ازاماتتىق قوزعالىس» پارتياسىنان ۇسىنىلعان لۋيس گيلەرمو ءسوليستىڭ جەڭىسكە جەتكەنى بەلگىلى بولدى. بۇل تۋرالى يتار-تاسس حابارلادى. جوعارعى سايلاۋ تريبۋنالىنىڭ اقپارىنا جۇگىنسەك, ل.ءسوليستى سايلاۋشىلاردىڭ 77,69 پايىزى قولداپ, داۋىس بەرگەن. ونىڭ قارسىلاسى, باسقارۋشى «ۇلتتىق ازاتتىق» پارتياسىنىڭ كانديداتى دجونني ارايا 22,31 پايىز داۋىس جينادى. سايلاۋدىڭ ءبىرىنشى تۋرى 2 اقپاندا وتكەن ەدى. ول كەزدە ل.سوليسكە سايلاۋشىلاردىڭ 30,9, ال د.اراياعا 29,6 پايىزى جاقتاپ, داۋىس بەردى. جالپى, بۇل سايلاۋدا جەڭىسكە جەتۋ ءۇشىن داۋىس سانى 40 پايىزدان اسۋى ءتيىس. ناۋرىزدىڭ باسىندا د.ارايا سايلاۋ الدىنداعى ناۋقانىن مەرزىمنەن بۇرىن توقتاتۋعا شەشىم قابىلدادى. مۇنداي وقيعا ەل تاريحىندا تۇڭعىش رەت ورىن الدى. بۇل شەشىمىن ساياساتكەر قارسىلاسىنىڭ ەداۋىر باسىمدىلىعىمەن تۇسىندىرگەن بولاتىن. وسىلايشا, د.ارايا سايلاۋدىڭ ەكىنشى تۋرىندا جەڭىلىسىن مويىنداپ, جوعارعى سايلاۋ تريبۋنالى شىعارعان قورىتىندىمەن تولىق كەلىسەتىنىن جەتكىزدى. ەندى سايلاۋ كوميسسياسى قورىتىندىنى ماقۇلداعاننان كەيىن ل.سوليس كوستا-ريكا مەملەكەتىنىڭ باسشىسى اتانادى. ول بۇل قىزمەتتى 8 مامىردان باستاپ 2018 جىلعا دەيىن اتقاراتىن بولادى. ايدار ورىسباەۆ. دەرەككوز: Itar-tass.com. فوتو: Ap.org.