2021 جىلى ەلوردالىق سىبايلاس جەمقورلىققا قارسى قىزمەت دەپارتامەنتىنىڭ ۇسىنىمدارى بويىنشا مەملەكەتتىك ورگانداردىڭ بيۋدجەت قاراجاتىن يگەرۋىنە مونيتورينگ جۇرگىزۋ اياسىندا جالپى سوماسى 5,3 ملرد تەڭگەگە بيۋدجەت قاراجاتىن ۇنەمدەۋگە قول جەتكىزىلدى.
جۇرگىزىلگەن مونيتورينگتىڭ وڭ اسەرىن ەسكەرە وتىرىپ, بۇل جۇمىس اعىمداعى جىلى دا جالعاسىن تاۋىپ 1 توقسانداعى جاعداي بويىنشا بيۋدجەت قاراجاتىن ۇنەمدەۋ 481,7 ملن تەڭگەنى قۇرادى. مەملەكەتتىك ورگاندار مەن ۇيىمداردىڭ مەملەكەتتىك ساتىپ الۋ جوسپارىنىڭ مونيتورينگى 7 كونكۋرس بويىنشا شەكتى باعالاردىڭ كوتەرىلۋىن بەلگىلەۋگە مۇمكىندىك بەردى.
ساتىپ الىناتىن تاۋارلار سانى مەن باعانى كوتەرۋدىڭ ءجيى كەزدەسەتىن فاكتىلەرى ەلوردانىڭ ءبىلىم مەكەمەلەرىنىڭ مەملەكەتتىك ساتىپ الۋ جوسپارىندا بەلگىلەنگەن. مىسالى, 737 وقۋشى ءبىلىم الاتىن نۇر-سۇلتان قالاسىنداعى مەكتەپتەردىڭ بىرىندە 20 ملن تەڭگەدەن استام سوماعا 4 توننا شاي, 1,5 توننا يتمۇرىن جانە 1,3 توننا ليمون ساتىپ الۋ جوسپارلانعان بولاتىن. ناتيجەسىندە, سىبايلاس جەمقورلىققا قارسى قىزمەتتىڭ ۇسىنىمدارى بويىنشا ساتىپ الىناتىن تاۋارلاردىڭ جوسپارلانعان كولەمى قايتا قارالىپ, قىسقارتىلدى. ۇنەم - 99%. باسقا جاعدايدا ءبىلىم باسقارماسىنىڭ مەكتەپكە دەيىنگى ۇيىمى 11,2 ملن تەڭگەگە 250 ەسىككە «دوۆودچيك» الۋدى جوسپارلاعان بولاتىن.
نۇر-سۇلتان قالاسى سىبايلاس جەمقورلىققا قارسى قىزمەتتىڭ ۇسىنىمدارىن قاراۋ, سونداي-اق ساتىپ الۋ كولەمىن قىسقارتۋ ناتيجەسىندە 10 ملن تەڭگە ۇنەمدەلدى.
