اتىراۋدا تۇراتىن سوعىس ارداگەرى قايتىس بولعاندار تىزىمىنە ەنگىزىلگەن

اتىراۋ وبلىسىندا تۇراتىن ۇلى وتان سوعىسىنىڭ ارداگەرى الەكساندر پوگاداەۆ 2001 جىلدان باستاپ قايتىس بولعاندار تىزىمىنە ەنگىزىلگەن. بۇل تۋرالى Gazeta.kz حابارلادى. «بۇل جايت كەزدەيسوق ءبىز حالىققا قىزمەت كورسەتۋ ورتالىقتارىنا جۇگىنگەن كەزىمىزدە بەلگىلى بولدى.  كۋالىككە بەلگى سالىپ, ورتالىقتا بىزگە قىزمەت كورسەتكەن قىز مۇنداي انىقتاما الا المايتىنىمىزدى ايتتى. ويتكەنى, الەكساندر يۆانوۆيچ پوگاداەۆ مالىمەتتەر بازاسىندا 2001 جىلدان قايتىس بولعاندار ساناتىندا بولىپ شىقتى», - دەيدى ارداگەردىڭ نەمەرەسى ولگا سبيتنەۆا. ا. پوگاداەۆ اتىراۋ وڭىرىنە تانىمال ازامات. ۇلى وتان سوعىسىنىڭ ارداگەرى, ىشكى ىستەر قىزمەتىنىڭ وتستاۆكاداعى پولكوۆنيگى. ول سونداي-اق اتىراۋلىق ارداگەرلەر قورىنىڭ جانە «فرونتوۆيچكا» ەڭبەك ارداگەرلەرى قورىنىڭ بەلدى مۇشەسى. «تاعى ءبىر قىزىعى, 2004 جىلى اتامىز جاڭا جەكە كۋالىك جانە شەتەلدىك تولقۇجات الدى. بىرنەشە رەت شەتەلدە دەمالدى. 2013 جىلى مەملەكەتتەن پاتەر الدى. تىرىلەر تىزىمىندە جوق ادامدى قالاي شەتەلگە وتكىزگەن؟ ءتىپتى پاتەردى راسىمدەۋدى ايتپاعاندا», - دەيدى ءسوز ورايىندا و.سبيتنەۆا. ارداگەر نەمەرەسىنىڭ ايتۋى بويىنشا, جەرگىلىكتى جەردە جىبەرىلگەن بۇل ورەسكەل قاتەلىكتى تۇزەۋ وڭايعا سوقپاي تۇر. ال وسىنداعى حالىققا قىزمەت كورسەتۋ ورتالىقتارىنداعى قىزمەتكەرلەر بولسا, ارداگەردىڭ تۋىستارىنا «كۇتىڭدەر, تۇزەتۋ ەنگىزەمىز»,-دەۋمەن كەلەدى. ءبىر تاڭقالارلىعى, تۋىستارى جاقىندا 90 جاسقا تولاتىن ارداگەرگە ونىڭ بۇدان 13 جىل بۇرىن تىرىلەر ساناتىنان شىعىپ قالعانىن ءالى ايتپاعان كورىنەدى. ءامىرحان الماعانبەتوۆ. دەرەككوز: Gazeta.kz. فوتو:www.Tv100.ru.