سونىمەن قاتار القالى جيىن اياسىندا «بۋىرقانعان بۇلا جىر» اتتى جيناقتىڭ تۇساۋكەسەر ءراسىمى ءوتتى. جيناققا سوڭعى جىلدارى «ەگەمەندە» قىزمەت ەتكەن جانە قىزمەت ەتىپ جۇرگەن جاس اقىنداردىڭ جىرلارى توپتاستىرىلعان.
«ەگەمەن قازاقستان» گازەتىنىڭ ءماجىلىس زالىندا وتكەن كەلەلى جيىنعا مەملەكەتتىك سىيلىعىنىڭ لاۋرەاتى, بەلگىلى جازۋشى تولەن ابدىك, الاتاۋدان ارقاعا جاقىندا عانا قونىس تەپكەن ارداكۇرەڭ اقىن عالىم جايلىباي, اقىن, قر ەڭبەك سىڭىرگەن قايراتكەرى, قازاقستان جازۋشىلار وداعىنىڭ نۇر-سۇلتان قالاسى فيليالىنىڭ ديرەكتورى داۋلەتكەرەي كاپ ۇلى, قر پارلامەنتى ءماجىلىسىنىڭ دەپۋتاتى, اقىن ماقپال مىسا, حالىقارالىق «قازاق ءتىلى» قوعامىنىڭ ۆيتسە-پرەزيدەنتى, «AMANAT» پارتياسى ساياسي كەڭەسى بيۋروسىنىڭ مۇشەسى ماكسيم روجين, اسسامبلەيا مۇشەسى اسكەر پيريەۆ, كۇيشى, قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى جانعالي جۇزباي جانە ەلدوردالىق جاس اقىندار قاتىستى.
دوڭگەلەك ۇستەلدى «ەگەمەن قازاقستان» رگ» اق باسقارما توراعاسى دارحان قىدىرالى ءوزى جۇرگىزىپ وتىردى.
ء«بىر بايقاعانىم سانا وتە باياۋ قالىپتاساتىن قۇبىلىس. كەشەگى كەڭەستىك كەزەڭدە ءوسىپ, سونىڭ يدەولوگياسىمەن ۋلانعان جانداردىڭ ساناسىن وياتۋ تىپتەن قيىنعا ءتۇستى. سوندىقتان جاڭا قازاقستاندى الاش زيالىلارىن جانىنا تەمىرقازىق ەتكەن جاستار قۇرادى دەپ سەنەمىن. جاڭا زامانعا ساي ۇرپاق بولىڭىزدار», دەپ اق باتاسىن بەردى جازۋشى تولەن ابدىك.
ال اقىن عالىم جايلىباي: «بۇل جاڭا ءۇردىس ەكەن. باس باسىلىمنىڭ جانىنان وسىنداي شىعارماشىل جاستارعا جول اشاتىن انتولوگيالىق جيناقتاردىڭ شىعىپ تۇرۋى ولاردىڭ قالىپتاسۋىنا زور ىقپال ەتەدى», دەپ باعالادى.
ءوز كەزەگىندە ءسوز العان اقىن داۋلەتكەرەي كاپ ۇلى بۇگىنگى كۇننىڭ زيالى تۇلعاسى قانداي بولۋ كەرەك دەگەن تاقىرىپتا تەرەڭ وي ءوربىتتى. باس باسىلىمنىڭ كىتاپحاناسىنا نۇر-سۇلتان قالاسى اكىمدىگىنىڭ قولداۋىمەن جانە قازاقستان جازۋشىلار وداعى نۇر-سۇلتان قالالىق فيليالىنىڭ ۇيىتقى بولۋىمەن "نۇر-سۇلتان كىتاپحاناسى" سەرياسىمەن شىققان ەلوردالىق 30 جاس قالامگەردىڭ جيناعىن تارتۋ ەتتى.
انتولوگيالىق جىر جيناققا ولەڭدەرى ەنگەن اقىندار اراسىنان اقىن, جازۋشى, حالىقارالىق «رۋح» ادەبي بايقاۋىنىڭ جەڭىمپازى ۇلاربەك نۇرعالىم ۇلى ءسوز الىپ, ورامدى ويلارىمەن ءبولىستى. ال باس باسىلىمنىڭ تالانتتى تىلشىلەرى, اقىن راۋان قابيدولدين مەن مۇحتار كۇمىسبەك ولەڭ وقىدى.
ايتا كەتەيىك, اتالعان جيناققا ون جەتى اقىننىڭ ولەڭى ەنگەن.
