بريۋسسەلدە ەرەۋىلگە شىققاندار پوليتسيامەن قاقتاعىستى

كەشە, 4 ءساۋىر كۇنى بەلگيانىڭ استاناسى – بريۋسسەل قالاسىندا ەرەۋىلگە شىققاندار پوليتسيامەن قاقتاعىستى. بۇل تۋرالى يتار-تاسس حابارلادى. ءتارتىپ ساقشىلارىمەن جاعا ۇستاسۋدا مانيفەستانتتار اراسىندا زارداپ شەككەندەر سانى 27-گە جەتتى. RTBF تەلەارناسىنىڭ حابارلاۋىنشا, كاسىپوداقتار ۇيىمداستىرعان دەمونستراتسياعا قاتىسۋشىلار ەۋروپا وداعى قابىلداپ جاتقان «قاتاڭ ۇنەم» شارالارىنا قارسىلىق ءبىلدىرۋ ماقساتىندا كوشەگە شىققان. تەلەارنا «دارىگەرلەردىڭ مالىمەتىنشە, سەگىز ادامنىڭ اۋرۋحاناعا جاتقىزىلعانىن, الايدا, ولاردىڭ ومىرلەرىنە ءتونىپ تۇرعان قاۋىپ جوقتىعىن, تاعى 16 قاتىسۋشىنىڭ وقيعا ورنىندا قاماۋعا الىنعانىن» اتاپ ءوتتى. پوليتسياداعىلار «قاقتىعىستىڭ ناتيجەسىندە قۇقىق قورعاۋ ورگاندارى ءۇش قىزمەتكەرلەرىنىڭ جاراقات الىپ قالعانىن» مالىمدەدى. تارتىپسىزدىكتەر ەۋرووداق ينستيتۋتى ورنالاسقان ورامدا باستالدى. ەرەۋىلگە شىققاندار پوليتسيا قىزمەتكەرلەرىنە اپەلسيندەر مەن باسقا دا زاتتار لاقتىردى. بۇعان ءتارتىپ ساقشىلارى كوزدەن جاس اعىزاتىن گازبەن جانە سۋمەن جاۋاپ بەردى. اكتسياعا قاتىسۋشىلار «ەۋروپانىڭ قاتاڭ ۇنەمسىز جاڭا جولى» ءۇشىن داۋىس كوتەرىپ, «ۇزاق ۋاقىت دامۋدى قامتاماسىز ەتەتىن قۋاتتى ينۆەستيتسيا» اكەلىنۋىن, جۇمىس ورىندارىنا جوعارى بىلىكتى مامانداردى الۋدى تالاپ ەتتى. ۇيىمداستىرۋشىلاردىڭ ايتۋلارىنشا, شاراعا 50 مىڭعا جۋىق ادام قاتىسقان. ال پوليتسيا بۇلاردىڭ سانىن 25 مىڭنان اسىرىپ وتىرعان جوق. مانيفەست سالدارىنان قالانىڭ كوپتەگەن ورتالىق كوشەلەرى جابىلىپ قالدى. ناتيجەسىندە التى ساعات بويى كولىكتەردىڭ ءجۇرىسى توقتاپ تۇردى. ساكەن مايلىباي. دەرەككوز: يتار-تاسس. فوتو: يتار-تاسس.