ءۇش كۇنگە سوزىلعان بەلدەسۋلەر بارىسىندا الماتى وبلىسىنىڭ ءجاسوسپىرىم قىزدارى وزدەرىنىڭ وتە جاقسى بابىندا ەكەندىكتەرىن بايقاتىپ, جەرگىلىكتى جانكۇيەرلەردى قۋانىشقا بولەدى. تارقاتىپ ايتساق, توقجان داۋلەتكەلدى (44 كيلو), جىبەك ق ۇلىمبەتوۆا (47 كيلو), اياجان مۇقتارعالي (54 كيلو) جانە نۇرشات كەمەلحانقىزى (72 كيلو) التىننان القا تاقسا, ۇلجان داۋلەتكەلدى (44 كيلو), ىڭكار تولەپبەرگەن (59 كيلو), اراي تولەۋباي (59 كيلو), اياجان جەڭىسحانقىزى (80 كيلو) جانە گاۋھار قاناتبەك (80 كيلو) ۇزدىك ۇشتىكتى تۇيىندەدى. ناتيجەسىندە, 4 التىن جانە 5 قولا مەدالدى قورجىنعا سالعان جەتىسۋلىق قىزدار جالپىكوماندالىق ەسەپتە ءبىرىنشى ورىندى جەڭىپ الدى.
– الماتى وبلىسىنىڭ بالۋان قىزدارى ءوز دەڭگەيىندە ونەر كورسەتتى. جىل سايىن وتەتىن ەل بىرىنشىلىگىندە ءبىز كەمىندە ءۇش-ءتورت التىننان ولجالاپ, جالپى ەسەپتە كوش باستاۋدى جاقسى ءبىر داستۇرگە اينالدىردىق. سونىڭ ناتيجەسىندە قىزدارىمىز الەم جانە قۇرلىقتىق دودالارعا ۇزدىكسىز قاتىسىپ كەلەدى. ماسەلەن, 2020 جىلى سەربيادا گۇزەل ايۋپوۆا مەن ارۋجان ارمان قولا مەدالدى مويىندارىنا ىلسە, 2021 جىلى وزبەكستاندا انەل قايراتقىزى ءدال سول مەجەدەن كورىندى. بۇل رەتتە ءبىز تەك الەم بىرىنشىلىكتەرى جايىندا عانا ايتىپ وتىرمىز. ونىڭ سىرتىندا ازيا چەمپيوناتى جانە باسقا دا حالىقارالىق جارىستاردا ولجا سالىپ ءجۇرمىز, – دەيدى الماتى وبلىسىنىڭ جاوسپىرىمدەر قۇراماسىنىڭ اعا جاتتىقتىرۋشىسى قايرات جارمۇحامەدوۆ.
قىزدار اراسىندا وتكەن جارىستىڭ وزگە سالماق دارەجەلەرىندە جامبىلدىق سارا شۋگاەۆا (50 كيلو), قىزىلوردالىق زارينا مۇراتاسىل (59 كيلو) مەن اسەماي رۇستەموۆا (65 كيلو), تۇركىستاندىق ۇلبوسىن ءادىلوۆا (80 كيلو) جانە شىمكەنتتىك الينا ومىربەك (+80 كيلو) التىن تۇعىرعا كوتەرىلدى.
ۇلداردىڭ سايىسىندا جامبىل وبلىسىنان كەلگەن جاس ورەندەر وزا شاپتى. اتالعان كوماندانىڭ ساپىندا المات احماتعالي (71 كيلو), بەيبارىس نۇعمان (79 كيلو) جانە بەيبارىس رايس (+79 كيلو) قارسىلاس شاق كەلتىرمەسە, ادەن دىنمۇحامەد (53 كيلو), ءالي ءالىمبي (64 كيلو) جانە دياس تۇرلىبەك (71 كيلو) اقتىق سىندا عانا ءسۇرىندى. ال ەرىك نۇرداۋلەت (58 كيلو) قولا مەدالدى موينىنا ءىلدى. سونداي-اق باس جۇلدەنى ولجالاعاندار اراسىندا قىزىلوردالىق نۇرجان تۋمىرزاەۆ (49 كيلو), اتىراۋلىق اقنيەت اڭساعان (53 كيلو), ماڭعىستاۋلىق قۋانىشبەك كومەكوۆ (58 كيلو), قاراعاندىلىق ارمان نۇرجانوۆ (64 كيلو) پەن اقجول دۇيسەنباەۆ (88 كيلو) جانە تالدىقورعاندىق دامير احەت (98 كيلو) بار.
– سوڭعى كەزدەرى ەل بىرىنشىلىكتەرىنىڭ بارلىعىندا جەتىسۋ ءوڭىرىنىڭ قىزدارى الدارىنا جان سالماي جۇرگەنى بارشاعا ايان. بىراق ۇلدارىمىزدىڭ قارقىنى ءسال باسەڭ ەدى. ءيا, جۇلدەگەرلەر ساناتىنان كورىنگەن شاكىرتتەرىمىز جەتەرلىك. بىراق ءبىزدى ءبىر قىنجىلتقان جايت – 2019 جىلدان بەرى بىردە-ءبىر ورەنىمىزدىڭ چەمپيوندىق تۇعىرعا كوتەرىلە الماۋى. سول ولقىلىقتىڭ ورنىن تولتىرۋ ءشىن تالدىقورعانداعى جارىس قارساڭىندا جەرگىلىكتى باپكەرلەر ەش ايانباي ەڭبەك ەتتى. ناتيجەسى جامان بولعان جوق. بىرىنشىلىكتى باسىنان اياعىنا دەيىن ءبىر دەممەن وتكىزگەن دامير احەت 98 كيلو سالماقتا باس جۇلدەنى قانجىعاسىنا بايلاسا, تاعى بەس سپورتشىمىز كۇمىس پەن قولا مەدالدى يەلەندى. بىراق ءبىز مۇنىمەن شەكتەلىپ قالمايمىز. الداعى جارىستاردا بۇگىنگى تابىسىمىزدى ەسەلەۋ ءۇشىن بارىنشا كۇش سالامىز, – دەپ الماتى وبلىسى سامبو فەدەراتسياسىنىڭ پرەزيدەنتى بەرىك جەتپىسباەۆ اقتارىلا سويلەدى.
بالعىن بالۋانداردىڭ بوز كىلەمدەگى بەلدەسۋلەرىن رەسپۋبليكا سامبو فەدەراتسياسىنىڭ پرەزيدەنتى ايدوس اقجانوۆ, سول ۇيىمنىڭ ۆيتسە-پرەزيدەنتى ماناربەك بيسەكەنوۆ, قازاقستان ۇلتتىق قۇراماسىنىڭ باس باپكەرى ءبىرجان يمانحانوۆ باستاعان ءبىر توپ باسشى مەن مايتالمان مامان تابجىلماي تاماشالادى. ەندى تالدىقورعاندا وتكەن جارىستىڭ قورىتىندىسى بويىنشا جاسوسپىرىمدەر قۇراماسى جاساقتالىپ, ولار بيىلعى جىلدىڭ ەكىنشى جارتىسىندا وتەتىن الەم جانە ازيا بىرىنشىلىكتەرىنە دايىندالادى.
