ايتۋلى وقيعاعا ەلىمىزدىڭ دەنساۋلىق ساقتاۋ ءمينيسترى اجار عينيات, ددۇ ەۋروپالىق ايماقتىق بيۋروسىنىڭ ديرەكتورى حانس كليۋگە, الماتى وبلىسىنىڭ اكىمى قانات بوزىمباەۆ, وزبەكستاننىڭ مەملەكەتتىك مەديتسينالىق ساقتاندىرۋ قورىنىڭ اتقارۋشى ديرەكتورى فاررۋح شاريپوۆ, وزبەكستان دەنساۋلىق ساقتاۋ مينيسترلىگىنىڭ مەديتسينالىق ساقتاندىرۋ جۇيەسىن ەنگىزۋ باسقارماسىنىڭ باسشىسى ابدۋراحيم يۋلداشەۆ پەن وزبەكستان رەسپۋبليكاسىنىڭ دەنساۋلىق ساقتاۋ ۇيىمدارىنىڭ باسقا دا وكىلدەرى قاتىستى.
دەنساۋلىق ساقتاۋ مينيسترلىگىنىڭ باسشىسى مساك جۇيەسىن رەفورمالاۋ تۋرالى, مۋلتيديستسيپلينارلىق كوماندالار قالاي قۇرىلعانى جانە مامانداردى ولاردا جۇمىس ىستەۋگە وقىتۋ تۋرالى باياندادى.
«قازاقستاندا 6 مىڭنان استام مساك (مەديتسينالىق-سانيتارلىق العاشقى كومەك) ورتالىعى جۇمىس ىستەيدى. ولاردىڭ 90%-ى – جالپى پراكتيكا دارىگەرلەرى مەن پەدياترلارى بار ۋچاسكەلەر. ءبىز سىرقاتتاردىڭ قاجەتتىلىكتەرىن ەسكەرە وتىرىپ, مساك نىساندارىن كوبەيتۋدى جوسپارلاپ وتىرمىز. 2025 جىلعا دەيىن 500 ۋچاسكە سالىنادى, بيىل 100-دەن استام ۋچاسكە پايدالانۋعا بەرىلەدى», دەدى ا.عينيات.
سونداي-اق مينيستر سوزىلمالى جۇقپالى ەمەس اۋرۋلاردىڭ الدىن الۋ مەن وعان قارسى كۇرەسكە, پاتسيەنتتەردىڭ ءوز دەنساۋلىعى ءۇشىن ورتاق جاۋاپكەرشىلىگىن ارتتىرۋعا, مەديتسينالىق پەرسونالدىڭ ءوزارا ارەكەتىن جاقسارتۋعا جانە ىقتيمال اسقىنۋلاردىڭ الدىن الۋعا باعىتتالعان بارلىق قولدا بار رەسۋرستاردى پايدالانۋعا باعىتتالعان اۋرۋلاردى باسقارۋ باعدارلاماسىن ءساتتى ەنگىزۋگە قاتىستى ءسوز قوزعادى.
دوڭگەلەك ۇستەل وتىرىسىنان كەيىن مينيستر باستاعان شەتەلدىك قوناقتاردىڭ دەلەگاتسيالارى اۋرۋحانانى ارالاپ, پاتسيەنتتەردى ءبولۋدىڭ تيراج-جۇيەسىمەن, سونداي-اق مساك مۋلتيديستسيپلينارلىق كوماندالارىنىڭ جۇمىسىمەن تانىستى.
ا.عينيات مساك بريگادالارى كۆي پاندەمياسىمەن كۇرەس پەن حالىقتى ۆاكتسينالاۋ ناۋقانىنا تارتىلعانى تۋرالى حابارلادى. ەسىك قالاسىنداعى ەڭبەكشىقازاق كوپبەيىندى اۋدانارالىق اۋرۋحاناسى بازاسىندا دۇنيەجۇزىلىك دەنساۋلىق ساقتاۋ ۇيىمىنىڭ مەديتسينالىق-سانيتارلىق العاشقى كومەك كورسەتۋدە العاشقى دەمونستراتسيالىق الاڭى سالتاناتتى تۇردە ىسكە قوسىلدى.
«دەمونستراتسيالىق الاڭ اشۋداعى ماقسات – دارىگەرگە باعىتتالعان مساك قىزمەتتەرىن كورسەتۋدىڭ بيومەديتسينالىق مودەلىن مساك كوپبەيىندى كوماندالارى نەگىزىندە اناعۇرلىم تۇتاس تاسىلگە, ياعني مەديتسينالىق-الەۋمەتتىك كومەك مودەلىنە قارقىندى قايتا قۇرۋدا قازاقستاننىڭ تاجىريبەسىمەن الماسۋ كوزدەلىنىپ وتىر», دەدى ا.عينيات.
مينيستر ەلىمىزدە مساك جۇيەسى قۇرىلاتىن مۋلتيديستسيپلينارلىق ءتاسىل ەمدەۋدىڭ بارلىق كەزەڭىندە كورسەتىلەتىن مەديتسينالىق كومەكتىڭ: ۋچاسكەلىك قىزمەتتەن اۋرۋحانالارداعى مامانداندىرىلعان كومەككە دەيىنگى ۇزدىكسىزدىگى مەن ساباقتاستىعىن قامتاماسىز ەتۋگە مۇمكىندىك بەرەتىنىن اتادى.
«قازاقستاندا, اتاپ ايتقاندا, ەسىك قالاسىندا دەمونستراتسيالىق الاڭ اشۋ ددۇ-نىڭ قازاقستاننىڭ مساك-تى دامىتۋداعى جەتىستىكتەرىن مويىنداۋدىڭ ناتيجەسى دەپ بىلەمىز. ءبىز ەڭبەكشىقازاق اۋدانارالىق كوپسالالى اۋرۋحاناسى سياقتى ۇيىمداردىڭ زاماناۋي يننوۆاتسيالىق تەحنولوگيالاردى قولدانۋداعى تاجىريبەسى مەن جەتىستىكتەرىن باسقالارعا ۇلگى ەتۋگە ۇمتىلامىز», دەدى مينيستر.
«قازىرگى زامانعى جاڭا جاعدايلاردا قازاقستان مساك-تى قوسا العاندا, دەنساۋلىق ساقتاۋ جۇيەسىن جولعا قويىپ, حالىققا نەعۇرلىم ءتيىمدى قىزمەت كورسەتۋ ءۇشىن ونى كۇشەيتۋ جونىندە شارالار قابىلدادى. بۇل – ددۇ-نىڭ قولداۋىمەن قازاقستاندا ەڭبەكشىقازاق كوپ بەيىندى اۋدانارالىق اۋرۋحانا بازاسىندا مەديتسينالىق-سانيتارلىق العاشقى كومەك كورسەتۋ بويىنشا كوپبەيىندى كوماندالار قىزمەتىنىڭ تابىستى مىسالى رەتىندە دەمونستراتسيالىق الاڭ اشۋعا ىقپال ەتتى», دەيدى حانس كليۋگە.
ەندىگى جەردە مۇنداي الاڭدار ددۇ ەۋروپالىق ايماعىنىڭ ءۇش ەلىندە: قازاقستان, يسپانيا جانە شۆەتسيادا باستاماشى بولا الادى.
وسىدان كەيىن دوكتور حانس كليۋگە الماتى وبلىسىنىڭ ەسىك قالاسىندا ەڭبەكشىقازاق كوپبەيىندى اۋدانارالىق اۋرۋحاناسى بازاسىندا ەلىمىزدەگى مەديتسينالىق-سانيتارلىق العاشقى كومەك كورسەتۋ سالاسىن رەفورمالاۋ تاقىرىبىندا وتكەن دوڭگەلەك ۇستەلگە قاتىسىپ, ۇزدىكسىزدىك پەن ساباقتاستىققا نەگىزدەلگەن مساك كوپبەيىندى كوماندالارىنىڭ بيومەديتسينالىق مودەلىنەن كەشەندى مودەلىنە كوشۋدەگى قازاقستاننىڭ تاجىريبەسى تالقىلاندى.
الماتى
