27 جاستاعى شاۆقات رەسەيدىڭ م-1 Global ۇيىمىنىڭ چەمپيوندىق بەلبەۋىن يەلەنگەننەن كەيىن 2020 جىلى UFC-گە اۋىستى. سول كەزدەن بەرى قانداسىمىز ءۇش رەت وكتاگونعا شىعىپ, بارلىق باسەكەدە ايقىن باسىمدىق تانىتتى. اتاپ ايتساق, برازيليالىق الەكس وليۆەيرا مەن ميشەل پرازەريستى «قىلعىندىرۋ» ادىسىمەن جەڭدى. گايانانىڭ وكىلى كارلستون حارريستى اينالىپ كەلىپ تەۋىپ, ەسەڭگىرەتىپ تاستادى. جەرگە جىعىپ الىپ, باس كوتەرتپەي تومپەشتەگەننەن كەيىن تورەشى جەكپە-جەكتى توقتاتۋعا ءماجبۇر بولدى. وسى جەڭىستەرىنىڭ ارقاسىندا راحمونوۆ UFC رەيتينگىندە 15-ورىنعا كوتەرىلدى. قازىرگى كەزدە بۇل – قازاقستاننىڭ سپورتشىلارى اراسىنداعى ەڭ ۇزدىك كورسەتكىش.
نيل مەگني 1987 جىلدىڭ 3 تامىزىندا نيۋ-يوركتىڭ برۋكلين اۋدانىندا دۇنيەگە كەلدى. ول كيكبوكس پەن برازيليالىق دجيۋ-دجيتسۋدى جەتىك مەڭگەرگەن. 2010 جىلدان بەرى ارالاس جەكپە-جەككە دەن قويدى. ارادا ءۇش جىل وتكەندە نيل UFC-ءدىڭ قىراعى ماماندارىنىڭ نازارىنا ىلىكتى. بارلىعى 34 رەت جەكپە-جەككە شىققان امەريكالىق سپورتشى 26 مارتە جەڭىس تويىن تويلادى. 10 باسەكەنى مەرزىمىنەن بۇرىن اياقتادى. سوڭعى ەكى جىل ارالىعىندا مەگني التى كەزدەسۋ وتكىزدى. بۇل رەتتە اقش-تىڭ وكىلى مايكل كەزاعا ەسە جىبەرسە, لي تسزينليان, توني مارتين, روببي لوۋلەر, دجەفف نيل جانە ماكس گريففيندى جەڭدى.
ەگەر ەكى تاراپ ورتاق مامىلەگە كەلسە, قازاق سپورتشىسىنىڭ اتالعان ۇيىمنىڭ رەيتينگىندە العا ورلەۋىنە تاماشا مۇمكىندىك تۋىندايتىنى ءسوزسىز. ويتكەنى نيل مەگنيدىڭ UFC-دە وزىندىك بەدەلى بار. جانە دە ول رەيتينگتە جەرلەسىمىزدەن بىرنەشە ساتى جوعارى تۇر. ال شاۆقات راحمونوۆ سونداي ساقا سپورتشىنى سان سوقتىرا السا, وندا چەمپيوندىق تۇعىرعا دا ءبىر قادام جاقىنداي تۇسەدى.
