تاعزىم ەتىپ, ەسكەرتكىش ورناتتى

قازاقستان رەسپۋبليكاسىن­داعى پولشا رەسپۋبليكاسى ەلشىلى­گىنىڭ ۇيىمداستىرۋىمەن ۇستىمىزدەگى جىلعى 3-6 ءساۋىر ارالىعىندا وڭتۇستىك قازاقستان وبلىسىنىڭ مانكەنت جانە جامبىل وبلىسىنىڭ مەركە ەلدى مەكەندەرىندە ورنالاسقان اسكەري زيراتتارعا ورناتىلعان ەسكەرتكىشتەردىڭ اشىلۋ ءراسىمى جوسپارلانعان بولاتىن. 3 ءساۋىر كۇنى كەشكە پولشا رەسپۋبليكاسىنىڭ سوعىستار مەن ازاپ شەككەندەردىڭ ەستەلىكتەرىن ساقتاۋ جونىندەگى كەڭەسىنىڭ باس حاتشىسى ا.كۋنەرت باستاعان 90 ادام شىمكەنتكە ۇشىپ كەلدى. ولاردى وبلىس اكىمىنىڭ ورىن­باسارى س.قانىبەكوۆ باستاعان ءوڭىر وكىلدەرى قارسى الدى. 4 ساۋىردە دەلەگاتسيا باسشىسى اندجەي كۋنەرت, سونداي-اق پولشانىڭ قازاقستانداعى ەلشىسى ياتسەك كليۋچكوۆسكي, پولشانىڭ الماتىداعى باس كونسۋلى اندجەي پاپەج, پولياك-قازاق ساۋدا پالاتاسىنىڭ وكىلى حمۋرا داريۋش باستاعان قوناقتار, ەكىنشى دۇنيەجۇزىلىك سوعىس كەزىندە قازاقستان اۋماعىندا بولعان سوعىس ارداگەرلەرى جانە وڭتۇستىك قازاقستان وبلىسىنىڭ وكىلدەرى 1942 جىلى قايتىس بولىپ, مانكەنتكە جەرلەنگەن پولياكتار زيراتىنا ورناتىلعان ەسكەرتكىشتەردىڭ اشىلۋىنا قاتىستى. جيىندى ا.كۋنەرت كىرىسپە ءسوز سويلەپ اشتى. يا.كليۋچكوۆسكي, ا.پاپەج, وڭتۇستىك قازاقستان وبلىسى اكىمىنىڭ ورىنباسارى س.قانىبەكوۆ, تاعى باسقالار ءوز پىكىرلەرىن ايتىپ, بەيىتتە جاتقان مارقۇمداردىڭ رۋحتارىنا تاعزىم ەتتى, وڭتۇستىكقازاقستاندىقتارعا العىس ايتتى. تۇستەن كەيىن پولياك دە­لە­­گا­تسياسى تۇركى دۇنيەسىنىڭ تەكتى ءتورى تۇركىستانعا جول تارتتى. قوجا احمەت ياساۋي كەسەنەسىن, شاھاردىڭ كورىكتى جەرلەرىن ارالاپ كوردى. بۇگىن قوناقتار شاقپاق­باباداعى جانە مەركەدەگى پولياكتار زيراتتارىندا بولىپ, ولاردا ورناتىلعان قۇلپىتاس ەسكەرتكىشتەردى اشىپ, شىراق جاعادى, گۇلدەستەلەر قويادى. «ەگەمەن-اقپارات».