سول كۇنى وسپانوۆتاردىڭ ۇيىنە كورىمدىك, تارتۋ-تارالعىسىن كوتەرىپ, قۇتتىقتاي بارعان وبلىستىق مەشىتتىڭ نايب-يمامى باقىتجان قاجى يكرام ءسابيدىڭ قۇلاعىنا ازان شاقىرىپ ءاليحان دەپ ات قويىپ, اق باتاسىن بەردى.
ون بالانىڭ اكەسى اتىمتايدىڭ ءوزى قالاداعى ساۋدا ۇيلەرىنىڭ بىرىندە قاراپايىم كۇزەتشى بولىپ جۇمىس ىستەيدى.
– سەگىز قىزىم بار. سەگىز قىزدان كەيىنگى ۇلىمنىڭ ەسىمى – احمەت. ەندى, مىنە, كەلىنشەگىم 42 جاسىندا ماڭدايى تورسىقتاي تاعى ءبىر ۇلدى دۇنيەگە اكەلىپ, قۋانىشتى بولىپ جاتىرمىز. ءار بالانىڭ ءوز نەسىبەسى بار, كەنجە ۇلعا ءاليحان دەپ ازان شاقىرتىپ ات قويدىق. الاش ارىستارىنىڭ ارۋاعى جەبەپ ءجۇرسىن دەگەن نيەت قوي. بالالارىمنىڭ الدى بيىل 21-گە اياق باستى. ۇلكەن قىزىم نۇربايان كوللەدجدى ۇزدىك ءبىتىرىپ, قازىر شەتەل ءتىلى ماماندىعى بويىنشا جوعارى وقۋ ورنىندا ءبىلىم الىپ جاتىر. بالالارىمنىڭ ءبارى عافۋ قايىربەكوۆ اتىنداعى №9 قازاق مەكتەبىندە وقيدى, – دەيدى كوپبالالى اكە.
بۇگىندە وسپانوۆتار وتباسى ۇيەلمەلى-سۇيەلمەلى ون بالامەن ءتورت بولمەلى ەسكى ۇيدە تۇرىپ جاتىر. ءتورت بولمەلى دەگەن اتى بولماسا, اۋدانى 50 شارشى مەتردەن ءسال اساتىن قۋىقتاي عانا تار ءۇي. اناۋ جىلدارى اتىمتاي اكىمدىككە بارىپ, ءۇيىن كەڭەيتۋگە كومەكتەسۋدى سۇراعان ەكەن, بىراق بۇرىنعى اكىمدەردىڭ ەشقايسىسى قول ۇشىن سوزاتىنداي ىڭعاي تانىتا قويماپتى.
– ودان كەيىن دە اكىمدىككە بارىپ, ءۇيىمنىڭ تار ەكەنىن ايتتىم. ولار باسىڭدا پاتەرىڭ بار عوي, بىزدە ءۇيدى كەڭەيتۋ دەگەن قاراستىرىلماعان دەپ شىعارىپ سالدى. تاۋبە, مەملەكەت كوپبالالى وتباسىلارعا قولداۋىن اياپ جاتقان جوق. اتاۋلى الەۋمەتتىك كومەك, بالا سانىنا قاراي بەرىلەتىن جاردەماقىنىڭ دا شاراپاتىن كورىپ وتىرمىز. بىراق ءبىر اتتەگەن-ايى – ءۇيىمىزدىڭ تارلىعى جانعا باتادى. ەندى كەنجەمنىڭ كۋالىگى قولعا تيگەن سوڭ, اكىمدىككە تاعى بارىپ كورەيىن دەگەن وي بار. تەگىن ءۇي بەر دەپ جاتقان جوقپىز, تەك مىنا ەسكى ءۇيدىڭ باعاسىن شىعارىپ, ونى باستاپقى جارنا رەتىندە ەسەپتەپ, ورنىنا كەڭىرەك ءۇي بەرسە, نۇر ۇستىنە نۇر بولار ەدى, – دەدى اتىمتاي وسپانوۆ.
قوستاناي
