بىراق وسى ورايدا تاعى ءبىر وبلىس نازاردان تىس قالدى. ول – بيىل 150 جىلدىعى يۋنەسكو كولەمىندە تويلانىپ جاتقان رۋحاني كوسەمىمىز احمەت بايتۇرسىن ۇلىنىڭ كىندىك قانى تامعان بۇرىنعى تورعاي وبلىسى. كيەلى تورعاي ولكەسىنىڭ دە قايتا تۇلەيتىن, تالىقسىعان تامىرىنا قان جۇگىرتىپ جەكە وبلىس بولىپ قۇرىلىپ, قوستانايدان ەنشىسىن الىپ شىعاتىن ءساتى الىس ەمەس دەگەن ۇمىتتەمىز.
قاپشاعاي قالاسىنا دىنمۇحامەد قوناەۆتىڭ اتىن بەرۋ ورىندى ۇسىنىس. بۇل تۇلعاعا قانداي قۇرمەت كورسەتىلسە دە حالىق قولدايدى.
ەندى مەملەكەت باسشىسى قاسىم-جومارت كەمەل ۇلى توقاەۆتىڭ جولداۋىندا قامتىلعان بىرقاتار ماسەلەگە قىسقاشا توقتالا كەتەيىن.
وسىدان بىلاي سۋپەرپرەزيدەنتتىك رەسپۋبليكالىق جۇيەدەن تۇپكىلىكتى الشاقتايتىن بولدىق. ياعني ەندى پارلامەنتتىك جۇيەگە تولىق اۋىسۋ ۇدەرىسى باستالادى. ودان قورقاتىن ەش سەبەپ جوق. بۇل – وركەنيەتتى مەملەكەتتەرگە ءتان ءۇردىس. بۇل جۇيەگە اۋىسۋ ماسەلەسى قوعام تاراپىنان سان مارتە قوزعالعان بولاتىن.
جولداۋدىڭ تاعى ءبىر تاريحي سيپاتقا يە تۇسى – پرەزيدەنتتىڭ جاقىن تۋىستارىنا ماڭىزدى قىزمەت اتقارۋعا تىيىم سالۋى. ءيا, جاسىراتىنى جوق, بۇعان دەيىن بيلىك باسىنا جينالعان بەلگىلى ءبىر توپتاردىڭ ەلدى ەتەكتەن تارتىپ كەلگەنى راس. مەملەكەت باسشىسى بۇل ماسەلەگە تۇبەگەيلى نۇكتە قويدى.
پرەزيدەنت بۇدان بىلاي ەشقانداي پارتيالاردىڭ مۇشەسى بولمايدى جانە اۋدان مەن اۋىلدىق وكرۋگ اكىمدەرىن قىزمەتىنەن بوساتا المايدى. ياعني بۇل جەردە وزىنە اتا زاڭمەن جۇكتەلگەن مىندەتتەردى عانا ورىندايدى. الدا بولاتىن سايلاۋلاردا بۇرا تارتۋ, جالعان داۋىس جيناۋ دەگەندەرگە جول بەرىلمەيدى.
سونىمەن قاتار پرەزيدەنت ەندى وبلىس جانە رەسپۋبليكالىق ماڭىزى بار قالالاردىڭ اكىمدەرىن ءماسليحاتتىڭ كەلىسىمىمەن تەك بالاما نەگىزدە تاعايىندايتىن بولادى. بۇعان دەيىن مەملەكەت باسشىسى ءوزىنىڭ كوڭىلىنە جاققان ادامدى وسى قىزمەتكە تاعايىنداپ, ءماسليحاتتىڭ «باتاسىن» عانا الاتىن. ەندىگى كەزەكتە وسىناۋ جاۋاپتى قىزمەتكە تاعايىندالاتىن ادامداردىڭ سانى 2 ۇمىتكەردەن كەم بولماۋى كەرەك. جەرگىلىكتى ءماسليحاتتىڭ سىنىنان ءوتىپ, ءۇمىتىن اقتايتىن ادام عانا وسى ورىنتاققا جايعاسپاق.
ەندى جەرگىلىكتى اكىمدەر مەن ولاردىڭ ورىنباسارلارىنا پارتيا فيليالدارىنىڭ توراعاسى بولۋىنا زاڭنامالىق تىيىم سالىنباق.
ۇلتتىق قۇرىلتاي قۇرۋ. ول ۇكىمەت پەن حالىق اراسىنداعى بايلانىستىرۋشى بۋىن بولادى. ەلدەگى وزەكتى ماسەلەلەر وسى جيىن اياسىندا شەشىلەدى.
ونىڭ سىرتىندا, جولداۋدا باق تۋرالى جاڭا زاڭدى ازىرلەۋ جانە قابىلداۋ, جۋرناليستەردىڭ كولەڭكەلى تولەمدەر ءۇشىن سىرتتان تاپسىرىس بويىنشا جۇمىس ىستەمەۋى جانە ساياسي كلانداردىڭ جاسىرىن كۇرەسىنە قاتىسپاۋى كەرەكتىگى تۋرالى ايتىلدى.
قورىتا ايتقاندا, پرەزيدەنت جولداۋى جاڭا قازاقستاندى قۇرۋعا باعىتتالعان باتىل قادامدار مەن تاريحي شەشىمدەردى ايقىنداپ بەرگەن ماڭىزدى تۇعىرناما. وسى ماڭىزدى قۇجاتتا ايقىندالعان مىندەتتەردى ىسكە اسىرا بىلسەك, كەلەشەك كەمەل بولماق.
مەشىت عازيز ۇلى,
قوستاناي اۋداندىق ءماسليحاتىنىڭ دەپۋتاتى
قوستاناي وبلىسى
