ۇلتتار ليگاسى ءتۋرنيرىنىڭ بىلتىرعى ماۋسىمىندا قازاقستان جانە مولدوۆا قۇرامالارى «س» ليگاسىندا اسا ءساتسىز ونەر كورسەتىپ, ءوز توپتارىندا سوڭعى ورىنعا جايعاسقان بولاتىن. سوندىقتان ەكى ەلدىڭ ۇلتتىق قۇرامالارى جوعارى توپتاعى ءوز ورىندارىن ساقتاپ قالۋ ءۇشىن ەلەكتىك كەزدەسۋ وتكىزىپ جاتىر. جارىس ەرەجەسى بويىنشا «س» ليگاسىنىڭ ءتورت توبىندا سوڭعى ورىن العان ءتورت ۇجىمنىڭ ەكەۋى «D» ليگاسىنا سىرعىپ, ەكەۋى ءوز ورنىن ساقتاپ قالۋعا تىرىسادى. ويتكەنى «D» ليگاسىندا بار بولعانى ەكى توپ بولعاندىقتان, «س» ليگاسىنا تەك ەكى عانا جەڭىمپاز قۇراما كوتەرىلەدى. «س» ليگاسىنداعى ورنىن ساقتاپ قالۋ ءۇشىن بۇل كۇندەرى قازاقستان مەن مولدوۆادان بولەك, كيپر جانە ەستونيا قۇرامالارى دا باق سىناۋدا.
بۇعان دەيىن جازعانىمىزداي, قازاقستان مەن مولدوۆا قۇرامالارى وسى كۇنگە دەيىن جاسىل الاڭدا بەس مارتە كەزدەسسە دە, ەشقاشان رەسمي ماتچ وتكىزىپ كورمەگەن. سەبەبى وتكەن بەس ويىننىڭ ءبارى دە جولداستىق كەزدەسۋ اياسىندا ۇيىمداستىرىلعان بولاتىن. ءسويتىپ ەكى قۇراما فۋتبولشىلارى 24 ناۋرىزدا ءبىرىنشى رەت ءبىر-بىرىمەن رەسمي ماتچ وتكىزدى. ابىروي بولعاندا بۇل ويىن قازاقستان قۇراماسىنىڭ جەڭىسىمەن اياقتالدى. سونىمەن قاتار وسى كەزدەسۋ اياسىندا بىرقاتار ء«بىرىنشى» دەگەن ستاتيستيكاعا دا كۋا بولدىق. اتاپ ايتقاندا, بۇل ماتچ ەكى قۇرامانىڭ باس باپكەرلەرى ءۇشىن ءوز ۇلتتىق قۇرامالارىنداعى ءبىرىنشى رەسمي ويىن بولدى. مولدوۆانىڭ باس باپكەرى سەرگەي كلەششەنكو 2021 جىلدىڭ جەلتوقسان ايىندا ۇلتتىق قۇرامانىڭ تىزگىنىن ۇستاعان بولسا, اندرەي كارپوۆيچ بىرەر اپتا بۇرىن عانا قازاقستان قۇراماسىنىڭ باس باپكەرىنىڭ مىندەتىن اتقارۋشى بولىپ تاعايىندالعان ەدى. جەرلەستەرىمىز 2020 جىلدىڭ قىركۇيەگىنەن بەرى (ليتۆا – قازاقستان – 0:2) ءبىرىنشى رەت سىرت الاڭدا جەڭىسكە جەتتى. ال ءوز الاڭىمىزدا جەڭىس تويىن تويلاماعانىمىزعا ءۇش جىلعا جۋىقتاپ قالدى. ەڭ كەيىنگى رەت ءبىزدىڭ فۋتبولشىلار 2019 جىلدىڭ جازىندا سان-مارينو قۇراماسىنان 4:0 ەسەبىمەن باسىم تۇسكەن ەدى. سونداي-اق ۇلتتىق قۇراما ساپىندا 53-ءشى ويىنىن وتكىزگەن قورعاۋشى سەرگەي مالىي كۇنى كەشە مولدوۆا قاقپاسىنا ءوزىنىڭ قازاقستان قۇراماسى جەيدەسىندەگى ءبىرىنشى گولىن سوقتى.
كيشينەۆتەگى كەزدەسۋگە توقتالار بولساق, ماتچتىڭ العاشقى مينۋتتارىندا الاڭ يەلەرى ايتارلىقتاي باسىمدىققا يە بولىپ, ءبىزدىڭ قاقپامىزدىڭ ماڭىندا ءبىراز قاۋىپتى شابۋىل ۇيىمداستىردى. قارىمتا شابۋىلعا يەك ارتقان قازاقستان قۇراماسى فۋتبولشىلارىنىڭ ويىننىڭ جەتىنشى مينۋتىندا-اق ەسەپتى اشاتىن تاماشا مۇمكىندىگى بولعان ەدى. الايدا 14-ءشى نومىردە وينايتىن جەرلەسىمىز ۆلاديسلاۆ ۆاسيلەۆتىڭ ءبىر قورعاۋشىنى الداپ, شىرەنە تەپكەن دوبى قاقپادان ءسال عانا بيىك كەتتى. بۇل – اندرەي كارپوۆيچ شاكىرتتەرىنىڭ ءبىرىنشى تايمدا جاساعان جالعىز قاۋىپتى شابۋىلى بولدى. ەسەسىنە, الاڭ قوجايىندارى يگور شاتسكي قورعاعان قاقپانى تورۋىلداۋمەن بولدى. كەزدەسۋدىڭ 39-مينۋتىندا قاقپاشىمىز اۋەدەگى دوپتى قاعىپ الۋ ساتىندە قاتەلەسىپ, دوپ مولدوۆالىق شابۋىلشى يون نيكولاەسكۋدىڭ باسىنا ءدال كەلە قالدى. بوس قالعان قاقپاعا ەنىپ بارا جاتقان دوپتى قورعاۋشى الەكساندر ماروچكين ءدال سىزىقتىڭ ۇستىنەن قايتارىپ ۇلگەردى. دەگەنمەن ءبىرىنشى تايم اياقتالار تۇستا قورعاۋشىلاردىڭ قاتەلىگىن ءتيىمدى پايدالانعان نيكولاەسكۋ ءبارىبىر ءوز اتىن تابلوعا جازداردى – 1:0.
ەكىنشى تايمدا الاڭعا دۋمان نارزىلداەۆتىڭ ورنىنا ايبول ابىكەندى شىعارعان ا.كارپوۆيچ ويىنعا ازداعان تاكتيكالىق وزگەرىس ەنگىزدى. ناتيجەسىندە, كەزدەسۋدىڭ 63-مينۋتىندا جەرلەستەرىمىز تارازى باسىن تەڭەستىردى. ۆلاديسلاۆ ۆاسيلەۆتىڭ ايىپ الاڭىنا اۋەلەتە اسىرعان پاسىنا بويشاڭ قورعاۋشىمىز سەرگەي مالىي ءبىرىنشى جەتىپ, باسپەن قارسىلاس كوماندانىڭ قاقپاسىن ءدال كوزدەدى –1:1.
ارادا 16 مينۋت وتكەندە قازاقستان قۇراماسى ەسەپتە العا شىعىپ الدى. 79-مينۋتتا يگور شاتسكيدىڭ اسىرعان دوبىنا رومان مۋرتازاەۆ ءبىرىنشى جەتىپ, باقتيەر زاينۋتدينوۆكە تاماشا پاس شىعارىپ بەردى. ماسكەۋلىك تسسكا كلۋبىنىڭ جارتىلاي قورعاۋشىسىنىڭ ايىپ الاڭى ىشىنەن قاقپاعا قاراي تەپكەن دوبىن قورعاۋشى ۆياچەسلاۆ پوسماك كەرى قايتارام دەپ, ابايسىزدا ءوز قاقپاسىنا گول سوعىپ الدى – 1:2. ويىننىڭ سوڭعى مينۋتتارىندا ايبار جاقسىلىقوۆتا ەسەپتى ەسەلەيتىن تاماشا مۇمكىندىك بولعانىمەن, شابۋىلشىمىز ۇرىمتال تۇستا ءمۇلت كەتتى. وسىلايشا, قازاقستان قۇراماسى سىرت الاڭدا 1:2 ەسەبىمەن جەڭىسكە جەتتى. ەكى قۇراما اراسىنداعى قارىمتا كەزدەسۋ ەرتەڭ ەلورداداعى «استانا ارەنا» ستاديونىندا وتەدى.
– بارشاڭىزعا جەڭىس قۇتتى بولسىن دەگىم كەلەدى. ءبىز كۇتكەندەي, قيىن ءارى تارتىستى ماتچ بولدى. دايىندىق كەزىندە پىسىقتاعان دۇنيەلەرىمىز ءوز سەپتىگىن تيگىزدى. مولدوۆا ءوز الاڭىندا جانكۇيەرلەرىنىڭ قولداۋىنا يە بولدى. قارسىلاس كوماندا ساپىندا شەبەر ويىنشىلار كوپ بولعاندىقتان, ولار بۇل ماتچتىڭ ءفاۆوريتى سانالدى. وتە مىقتى قارسىلاسپەن بولعان ويىندا جەڭىسكە جەتكەنىمىزگە قۋانىشتىمىز. بىراق بۇل ناتيجەنى ۇمىتۋعا تۋرا كەلەدى. سەبەبى بارلىعى نۇر-سۇلتاندا وتەتىن قارىمتا كەزدەسۋدە شەشىلەدى. ول جاقتا دا ءبىزدى قيىن ماتچ كۇتىپ تۇر. ءبىز ءوز كەزەگىمىزدە دايىندىقتى كۇشەيتىپ, ويىنىمىزدى جاقسارتۋىمىز قاجەت, – دەدى ماتچتان كەيىن قازاقستان قۇراماسىنىڭ باس باپكەرىنىڭ مىندەتىن اتقارۋشى اندرەي كارپوۆيچ.
