ۇلىبريتانيانىڭ سىرتقى ىستەر ءمينيسترى ليز تراسس Telegraph گازەتىنە بەرگەن سۇحباتىندا رەسەيگە سالىنعان سانكتسياعا قاتىستى پىكىر ءبىلدىردى. ۆەدومستۆو باسشىسىنىڭ ايتۋىنشا, كرەمل بيلىگى ۋكراينا اۋماعىنان اسكەرىن اكەتسە جانە كەلەشەكتە شابۋىل جاساماۋعا كەپىلدىك بولعاندا عانا سانكتسيالار الىنىپ تاستالادى.
«سانكتسيالار اتىستى تولىق توقتاتۋ جانە اسكەردى شىعارۋ, سونداي-اق بۇدان ءارى اگرەسسيا جاسالمايتىنى جونىندە مىندەتتەمە العان جاعدايدا عانا جويىلۋى مۇمكىن», دەدى ول.
ليز تراسستىڭ سوزىنە سۇيەنسەك, رەسەي قايتادان ۋكراينا جەرىنە اسكەر ەنگىزەتىندەي بولسا, شەكتەۋ قايتا سالىنادى.
ۋكراينا پرەزيدەنتى ۆولوديمير زەلەنسكي حالىققا كەزەكتى جولداۋىندا اتىس ايماعىنداعى جاعدايعا توقتالا كەلە, ورىس ءتىلى جونىندە پىكىر ءبىلدىردى. ول ەلدە ەشقاشان تىلدىك ماسەلە تۋىنداماعانىن جەتكىزدى.
«ۋكراينادا ءتىل ماسەلەسى جوق جانە بولعان دا ەمەس. بىراق قازىر ءتىل پروبلەماسىن رەسەي ءوزى جاساپ وتىر. حالقىمىزدىڭ ورىس تىلىنەن بەزىنۋى ءۇشىن ءبارىن ىستەپ جاتىر. ويتكەنى ورىس ءتىلى رەسەي حالقىمەن بايلانىستى دەپ ەسەپتەلەدى. كۇندەلىكتى جارىلىستارمەن جانە ادام ولىمدەرىمەن بايلانىستى سەزىلەدى. رەسەي مەملەكەتىمىزدىڭ اۋماعىندا ورىسسىزداندىرۋ ءجۇرۋى ءۇشىن بارلىعىن جاساپ جاتىر», دەدى ۆ.زەلەنسكي.
دەمالىس كۇندەرى رەسەي اسكەرى لۆوۆ قالاسىن اتقىلادى. وبلىس اكىمشىلىگىنىڭ باسشىسى ماكسيم كوزيتسكيدىڭ ايتۋىنشا, لۆوۆ ماڭىندا تاعى ءۇش كۇشتى جارىلىس ەستىلگەن. لۆوۆ مەرى اندرەي سادوۆىي قالالىق ينفراقۇرىلىم نىساندارى زارداپ شەككەنىن, تۇرعىن ۇيلەر زاقىمدانباعانىن جەتكىزدى. وعان دەيىن قالاعا ەكى بومبا ءتۇسىپ, ينفراقۇرىلىمعا اجەپتاۋىر نۇقسان كەلگەن ەدى.
رەسەيلىكتەرگە سالىنعان شەكتەۋ, تىيىم جالعاسىپ جاتىر. اسىرەسە ورىس وليگارحتارىنا وڭايعا تيەتىن ەمەس. ماسەلەن, ۇلىبريتانيا ۇكىمەتى رەسەيلىك ميللياردەر, مۇناي ماگناتى جانە «سيبنەفت» كومپانياسىنىڭ بۇرىنعى پرەزيدەنتى ەۆگەني شۆيدلەرگە تيەسىلى ۇشاقتاردى تاركىلەدى. قازىرگى تاڭدا اۋە كەمەلەرى انگلياداعى فارنبورو جانە بيگگين حيلل اۋەجايلارىندا تۇر.
ۇلىبريتانيانىڭ كولىك ءمينيسترى گرانت شاپپس ۋكراينادا جازىقسىز ادامدار ءولىپ جاتقاندا, ء«پۋتيننىڭ دوستارى» ءسان-سالتانات قۇرماۋى كەرەك ەكەنىن مالىمدەدى. شۆيدلەرگە لوندوندىق «چەلسي» فۋتبول كلۋبىنىڭ يەسى رومان ابراموۆيچپەن ىسكەرلىك بايلانىسى بولعانى ءۇشىن سانكتسيا سالىندى. بريتان ۇكىمەتىنىڭ مالىمەتى بويىنشا ونىڭ بايلىعى 1,2 ملرد فۋنت ستەرلينگكە باعالانادى. تاركىلەنگەن ۇشاقتار قۇنى 60 ملن دوللارعا (45 ملن فۋنت) تەڭ.
ۋكراينا قورعانىس مينيسترلىگى تاراتقان مالىمەتتەرگە سۇيەنسەك رەسەيلىك تاعى ءبىر گەنەرال, ياعني گەنەرال-لەيتەنانت ياكوۆ رەزانتسەۆ حەرسون ماڭىندا زىمىران سوققىسىنان قازا تاپقان. يا.رەزانتسەۆ رەسەي قارۋلى كۇشتەرى 49-ارمياسىنىڭ قولباسشىسى قىزمەتىن اتقارعان. ۋكراينالىق بۇقارالىق اقپارات قۇرالدارى گەنەرالدىڭ چەرنوباەۆكا اۋە بازاسىندا قازا تاپقانىن حابارلادى. اۋەجاي رەسەيدىڭ كوماندالىق پۋنكتى رەتىندە پايدالانىلعان.
رەزانتسەۆ – ۋكراينادا قازا تاپقان ءتورتىنشى رەسەيلىك گەنەرال. دەگەنمەن ۋكراينا قارۋلى كۇشتەرى قازىردىڭ وزىندە سەگىز گەنەرالدىڭ قايتىس بولعانىن ايتىپ وتىر. كەيبىر باتىس ساراپشىلارى مۇنداي جوعارى شەندى رەسەيلىك وفيتسەرلەر نەلىكتەن مايدان شەبىنە جاقىن جۇرگەنىنە تاڭعالادى.
ەۋروپالىق وداققا مۇشە مەملەكەتتەردىڭ باسشىلارى رەسەيدىڭ اسكەري ءىس-قيمىلدارى اياقتالعاننان كەيىن ۋكراينانى قالپىنا كەلتىرۋدى قارجىلاندىرۋ ءۇشىن ىنتىماقتاستىقتىڭ سەنىمدى قورىن قۇرۋعا كەلىستى. بريۋسسەلدە ەۋرووداق سامميتىندە بۇدان دا باسقا ماسەلەلەر ءسوز بولدى.
«رەسەي اسكەرىنىڭ ۋكرايناعا كەلتىرگەن زالالى مەن اۋقىمدى شىعىندارىن ەسكەرە وتىرىپ, ەۋروپالىق وداق ۋكراينا ۇكىمەتىنىڭ قاجەتتىلىگىن قامتاماسىز ەتۋگە جانە رەسەيدىڭ شابۋىلى اياقتالعاننان كەيىن دەموكراتيالىق ۋكراينانى قالپىنا كەلتىرۋ ءۇشىن قولداۋ كورسەتۋگە دايىن. وسى ماقساتتا ەۋروپالىق كەڭەس ۋكراينامەن ىنتىماقتاستىق قورىن قۇرۋعا كەلىسىپ, وعان حالىقارالىق سەرىكتەستەرىن قاتىسۋعا شاقىرادى, سونداي-اق دايىندىقتى كەشىكتىرمەي باستاۋعا ۇندەپ وتىر», دەلىنگەن مالىمدەمەدە.
سامميتكە قاتىسۋشىلار سونىمەن قاتار كيەۆكە ليۆيا مەن سيرياعا كومەك كورسەتۋ ءۇشىن وتكىزىلگەن تۇراقتى كونفەرەنتسيالار سياقتى حالىقارالىق دونورلار كونفەرەنتسياسىن وتكىزۋگە ۋادە بەردى. قۇجاتتا ەۋروپالىق وداقتىڭ ۋكرايناعا ساياسي, قارجىلىق, ماتەريالدىق جانە گۋمانيتارلىق قولداۋ كورسەتۋدى جالعاستىراتىنى باسا ايتىلعان. ەۋرووداق ەلدەرىنىڭ كوشباسشىلارى سونداي-اق رەسەي مەن بەلارۋسكە قارسى جاڭا قاتاڭ سانكتسيالار ەنگىزۋگە دايىن ەكەنىن حابارلادى.
رەسەي اسكەرى كيەۆتىڭ سولتۇستىگىنە قاراي 120 شاقىرىم جەردەگى سلاۆۋتيچ قالاسىنا كىرىپ, جەرگىلىكتى اۋرۋحانانى قاراماعىنا الدى. سەنبى كۇنى تاڭەرتەڭنەن باستاپ قالادا ۋكراينانى قولداعان ميتينگ ءوتتى.
اقش پرەزيدەنتى دجو بايدەن 26 ناۋرىزدا ۆارشاۆادا ۋكراينانىڭ ەكى ءمينيسترى – سىرتقى ىستەر ءمينيسترى دميتري كۋلەبا مەن قورعانىس ءمينيسترى الەكسەي رەزنيكوۆپەن كەزدەستى. بۇل – رەسەي ۋكرايناعا اسكەر كىرگىزگەلى بەرى امەريكا مەن ۋكراينانىڭ جوعارى لاۋازىمدى تۇلعالارى اراسىندا وتكەن العاشقى كەزدەسۋ.
ۋكراينا قورعانىس ءمينيسترىنىڭ كەڭەسشىسى ماركيان لۋبكيۆسكي بريتاندىق BBC Radio 4 راديوسىنا «ۋكراينا كۇشتەرى حەرسوندى بۇگىن قايتارادى» دەپ مالىمدەدى. كيەۆتە 26 ناۋرىز كەشكى ساعات 8-دەن باستاپ, 28 ناۋرىز تاڭەرتەڭگى ساعات 7-گە دەيىن كومەندانتتىق ساعات ەنگىزىلدى.
Spotify سەرۆيسى رەسەيدەن تولىق كەتەتىنىن مالىمدەدى. Google Play مەن Apple Pay رەسەيلىك «مير» كارتاسىمەن جۇمىس ىستەۋدەن باس تارتتى. فرانتسيا, تۇركيا مەن گرۋزيا ءماريۋپولدىڭ بەيبىت تۇرعىندارىن قۇتقارۋ جوسپارىن ۇسىنباقشى. اقش رەسەيدىڭ قورعانىس سالاسىنا قىزمەت كورسەتەتىن كومپانيالارعا سانكتسيا سالادى.
رەسەي قورعانىس مينيسترلىگىنىڭ حابارلاۋىنشا, ۋكرايناداعى قاقتىعىس باستالعالى بەرى 1351 رەسەي سولداتى قازا بولعان جانە 3825 ادام جارالانعان. الايدا ۋكراينا تاراپى كەلتىرگەن مالىمەتكە سۇيەنسەك, قازىردىڭ وزىندە قازا تاپقاندار سانى 16 مىڭنان اسىپ كەتكەن. باتىس ساراپشىلارى جاراقات العاندار سانى 50 مىڭعا جۋىقتاعانىن ايتادى.
باتىس باسىلىمدارىنىڭ جازۋىنشا, رەسەي پرەزيدەنتى ۆلاديمير پۋتين حيميالىق نە بيولوگيالىق قارۋدى قولدانۋى مۇمكىن. بۇۇ ۋكرايناداعى گۋمانيتارلىق جاعداي تۋرالى ەسەبىن جاريالادى. وندا 953 بەيبىت تۇرعىن قازا تاپتى, 1557 ادام جاراقات الدى دەپ ايتىلادى. ەلدەن قاشۋعا ءماجبۇر بولعان بوسقىندار سانى 3,5 ميلليون ادامعا جەتكەن.
