رەسەي نەگىزىنەن پورتلاندتسەمەنت, تۇسقاعاز, جىلۋ ساقتاعىش ماتەريالدار, لينولەۋم, پليتا جانە اينەك سياقتى تاۋارلار ەكسپورتتايدى. ۆەدومستۆونىڭ مالىمەتىنشە, تاعى ءبىر ءىرى جەتكىزۋشى قىتاي جىبەرەتىن قۇرىلىس ماتەريالدارى جالپى يمپورتتىڭ 9,5 پايىزىن قۇرايدى.
«سانكتسياعا بايلانىستى رەسەيدىڭ ەۋروپا نارىعىنا ەكسپورت شىعارا الماۋى سەبەپتى ىشكى نارىق ارزان رەسەيلىك قۇرىلىس ماتەريالدارىنىڭ اعىنىنا تاپ بولۋى مۇمكىن. بۇل ىشكى نارىقتاعى باعا باسەكەسىن قاتاڭداتىپ, وتاندىق ءونىمدى تۇتىنۋ دەڭگەيىن تومەندەتەدى. وندىرۋشىلەر باعاسىنىڭ تۇزەتىلۋىنە بايلانىستى جاقىن ارادا رەسەيلىك يمپورتتى توقتاتۋىمىز مۇمكىن ەكەنىن جوققا شىعارمايمىز. بىراق بۇل ۇزاققا بارمايدى. سەبەبى كۇننىڭ جىلۋىمەن بايلانىستى قۇرىلىس نارىعىنىڭ بەلسەندىلىگى ارتا تۇسەدى», دەپ ءتۇسىندىردى مينيسترلىك.
ۇلتتىق ستاتيستيكا بيۋروسىنىڭ مالىمەتى بويىنشا, 2021 جىلى قۇرىلىس ماتەريالدارى يمپورتىنىڭ جالپى كولەمى 1,4 ملرد دوللاردى قۇراعان. بۇل 2020 جىلمەن سالىستىرعاندا 26,8 پايىزعا جوعارى كورسەتكىش. سونىڭ ىشىندە رەسەيدەن كەلەتىن يمپورت – 27,6 پايىزعا ارتسا, وزبەكستان مەن تۇركيادان كەلەتىن يمپورت كولەمى 2,1 جانە 1,8 ەسە جوعارىلاعان. قۇرىلىس ماتەريالدارىنىڭ يمپورتى ءسوزسىز باسپانا نارىعىنا دا تىكەلەي اسەر ەتەدى. بىراق ۆەدومستۆو تۇرعىن ءۇي باعاسىنا ەش قايران قىلا المايتىنىن جەتكىزدى.
«مەملەكەت جىلجىمايتىن م ۇلىك نارىعىن قاداعالامايدى. ويتكەنى نارىق ۇسىنىس پەن سۇرانىس ناتيجەسىندە قالىپتاسادى. باعا كوپتەگەن فاكتورلارعا بايلانىستى قويىلادى, ونىڭ ىشىندە جەر تەلىمىنىڭ قۇنى, ينفراقۇرىلىمنىڭ, ينجەنەرلىك جەلىلەردىڭ بولۋى, تۇرعىن ءۇيدىڭ ورنالاسۋ نۇكتەسى, قۇرىلىستىڭ وزىندىك قۇنى باعاعا اسەرىن تيگىزەدى. مەملەكەت تەك مەملەكەتتىك ينۆەستيتسيا ەسەبىنەن تۇرعىزىلىپ جاتقان تۇرعىن ۇيلەر مەن الەۋمەتتىك نىسانداردى باقىلاۋعا عانا قۇقىلى. ونداي نارىقتا 1 شارشى مەتر باعاسى 160-240 مىڭ تەڭگە ارالىعىندا بەكىتىلگەن», دەيدى ۆەدومستۆو.
قازاقستان قۇرىلىسشىلار وداعىنىڭ اقپاراتىنشا, ىشكى نارىقتا كەيبىر قۇرىلىس ماتەريالدارى ەكى ەسە قىمباتتاپ ۇلگەرگەن.
«باعا ءارى قاراي دا وسە بەرۋى مۇمكىن. سوندىقتان تەز ارادا وندىرۋشىلەرمەن باعانى كوتەرمەۋگە كەلىسىپ, دەلدالداردى جويىپ, بەلگىلى ءبىر دەڭگەيدە قولداۋ شارالارىن ۇيىمداستىرۋ قاجەت», دەيدى وداق توراعاسى تالعات ەرعاليەۆ.
سونداي-اق ساراپشىلار, قۇرىلىس سەكتورىندا جۇمىس ىستەپ جۇرگەن 30 مىڭداي ادام جۇمىسسىز قالۋى ىقتيمال دەپ دابىل قاعادى.
«قارجىلىق قيىندىقتارعا بايلانىستى كوپتەگەن كومپانيالار تاپسىرىستى ورىنداي الماي, ناتيجەسىندە نىساندار قۇرىلىسى توقتاپ جاتىر. جەكە بالاباقشا, مەكتەپ, اۋرۋحانالار عانا ەمەس, مەملەكەتتىك نىساندار قۇرىلىسىنا دا قاۋىپ ءتونىپ تۇر. 2020 جىلدان بەرى 600 مەملەكەتتىك نىسان قۇرىلىسى قارجىلاندىرىلماي قالعان. ولارعا شۇعىل تۇردە مەملەكەتتىك كومەك قاجەت», دەيدى ت.ەرعاليەۆ.
تەلەگرامداعى Risk Takers كانالىنىڭ ساراپشىلارى وتاندىق قۇرىلىس سالۋشىلار نارىق زاڭدىلىقتارىنا بەيىم ەمەس, سۇرانىس تومەندەسە باعانى كوتەرىپ جىبەرگەنگە ادەتتەنىپ العانىن ايتادى. «مۇنداي پراكتيكا قۇرىلىس سالاسىنداعى دەفولت وسىمىنە اكەلىپ سوقتىرادى», دەپ جازادى كانال.
