كورەيانىڭ اۋرۋلاردى باقىلاۋ جانە الدىن الۋ اگەنتتىگىنىڭ (KDCA) دەرەكتەرىنە ساي, ەلدە كۇندەلىكتى 400 741 جۇقتىرۋ جاعدايى تىركەلىپ جاتىر, ولاردىڭ باسىم بولىگى – جەرگىلىكتى حالىق.
جالپى ەلدە ۆيرۋس جۇقتىرعاندار قاتارى 7 629 275-كە جەتتى. بۇل – 2020 جىلدىڭ 20 قاڭتارىنان (سول كۇنى ەلدى ءبىرىنشى جۇقتىرۋ جاعدايى تىركەلگەن) بەرگى ەڭ جوعارعى كورسەتكىش.
بەيسەنبى كۇنى اتالعان كورسەتكىش 362 338 بولعان. ونىڭ الدىنداعى انتيرەكورد وتكەن سەنبى كۇنى تىركەلگەن – 383 659 ادامنان ۆيرۋس انىقتالعان.
COVID-19-دان كوز جۇمعاندار سانى 164-تەن 11 052-گە دەيىن ءوستى. دەگەنمەن ءولىم ۇلەسى – 0,14%. جاعدايى اۋىر ناۋقاستاردىڭ سانى 1 244-كە جەتتى, الدىڭعى كۇنگە قاراعاندا 48-گە كوپ. وميكرون شتامىنىڭ تەز تارالىپ جاتقانىنا قاراماستان, ەل ۇكىمەتى قالىپتى تىرشىلىككە ورالۋ ءۇشىن بارىن سالىپ جاتىر.
جالپى, الەمنىڭ كوپ ەلىندە قاۋىپسىزدىك ەرەجەلەرى جەڭىلدەپ, قاتاڭ شارالار الىنىپ تاستالدى. ايتسە دە, ۆيرۋستىڭ قايتا ورشىگەنى تۋرالى حابارلار جان-جاقتان ءتۇسىپ جاتىر. وسىعان دەيىن ۆيرۋستىڭ تارالماۋىن باقىلاعان قىتاي دا ەلدە جاعداي تۇراقسىز ەكەنىن ايتتى.
قىتايدىڭ 9 ميلليون تۇرعىنى بار چانچۋن قالاسىندا جاپپاي تەستىلەۋ ءجۇرىپ جاتىر. شاھار وتكەن اپتادا لوكداۋنعا جابىلعان. ەلدى مەكەندە ءبىر كۇندە ۆيرۋستى جۇقتىرۋدىڭ 460 دەرەگى راستالسا, كەلەسى كۇنى ول سان مىڭنان اسىپ كەتكەن. جاپپاي تەستىلەۋ ءۇشىن قالاعا وزگە وڭىرلەردەن مىڭنان اسا مەديتسينا قىزمەتكەرى جەتكىزىلىپ, 7 مىڭ اسكەري تارتىلدى.
قىتايدىڭ 13 ميلليونعا جۋىق تۇرعىنى بار شەنچجەن قالاسى دا لوكداۋنعا جابىلدى. قازىر شاھاردا قوعامدىق كولىك قاتىنامايدى. ءار وتباسىنان ءبىر ادام عانا دۇكەنگە بارۋ ءۇشىن تىسقا شىعا الادى. مۇندا دا قازىر جاپپاي تەستىلەۋ ءجۇرىپ جاتىر. قىتايدا سوڭعى ۋاقىتتا احۋال ءورشىپ بارادى. ناۋرىزدىڭ باسىنان بەرى 10 مىڭنان اسا ۆيرۋس جۇقتىرۋ دەرەگى تىركەلدى.
