ەگەمەندىك جىلدارى ەلىمىزدە تاعدىرشەشتى بىرقاتار زاڭنامالىق قۇجاتتار قابىلدانىپ, ساياسي رەفورمالار جۇرگىزىلگەنى بەلگىلى. مەملەكەتتىلىگىمىزدى دامىتۋدا ولاردىڭ ايتارلىقتاي ناتيجە بەرگەنى دە انىق. دەگەنمەن, پرەزيدەنتىمىز اتاپ وتكەندەي, زاماناۋي تالاپتارعا ساي كەلۋ ءۇشىن قازاقستان قازىرگى جاعدايمەن جانە قوعامدىق دامۋمەن ۇيلەسەتىن باعىت تاڭداۋى قاجەت. سول ءۇشىن ەلىمىزدىڭ ازاماتتارى جولداۋدا ايتىلعان مىندەتتەردى ورىنداۋعا جۇمىلا كىرىسۋى كەرەك. بۇل وركەندەۋ, جەتىستىك پەن تۇراقتىلىققا قول جەتكىزۋ ءۇشىن اسا ماڭىزدى.
مەملەكەت باسشىسى ءوز جولداۋىندا ەلىمىزدىڭ اكىمشىلىك قۇرىلىمىن جەتىلدىرۋ ماسەلەسىن كوتەرىپ, كونستيتۋتسيانىڭ 30-دان استام بابىنا وزگەرىستەر ەنگىزىلەتىنىن حابارلادى. اباي جانە ۇلىتاۋ وبلىستارىن قۇرىپ, الماتى وبلىسىن ءبولۋ تۋرالى ۇسىنىسى ەكونوميكالىق ءارى پراگماتيكالىق ماقساتتىلىققا نەگىزدەلگەنى انىق, سونداي-اق پرەزيدەنتتىڭ سايلاۋ جۇيەسىن جەتىلدىرۋ, ۇلتتىق قۇرىلتاي قۇرۋ تۋرالى تاپسىرمالارى مەملەكەتىمىزدى ودان ءارى نىعايتۋعا سەپتىگىن تيگىزەدى.
ء«بىز بىرلىكتىڭ باستاۋى بولعان وسى دالا دەموكراتياسىنىڭ ءداستۇرىن جاڭعىرتۋىمىز كەرەك. ۇلتتىق قوعامدىق سەنىم كەڭەسى ءوز مىندەتىن تابىستى اتقاردى. ەندى ونىڭ ورنىنا قۇرامى جاعىنان اۋقىمدى ۇلتتىق قۇرىلتاي قۇرۋدى ۇسىنامىن. جاڭا قۇرىلىم ۇلتتىق كەڭەستىڭ قىزمەتىن جالپىحالىقتىق دەڭگەيدە جالعاستىرادى. قۇرىلتاي قوعامدىق ديالوگتىڭ ءبىرتۇتاس ينستيتۋتسيونالدىق مودەلىن قالىپتاستىرۋعا ءتيىس. ءسويتىپ, بيلىك پەن حالىقتىڭ اراسىنداعى دانەكەرگە اينالاتىن بولادى. قازىرگى قوعامدىق كەڭەستەردىڭ ءبارىن ءوز اينالاسىنا توپتاستىرادى», دەدى پرەزيدەنت.
ساياسي جۇيەنى ۇلكەن وزگەرىستەر كۇتىپ تۇر: ەندى مەملەكەت باسشىسىنىڭ وكىلەتتىلىگىنىڭ بولىگى قازاقستان رەسپۋبليكاسىنىڭ پارلامەنتىنە وتەدى, بۇل, البەتتە, مەملەكەتتە دەموكراتيالاندىرۋدىڭ بەكي تۇسۋىنە ىقپال ەتەدى.
قوعامدى تۇبەگەيلى وزگەرىستەر توسىپ تۇر. جاڭا قازاقستاندا ەلىمىزدىڭ ءاربىر ازاماتى, ءار وتباسى جايلى دا جارقىن, لايىقتى ءومىر سۇرەتىنىنە سەنەمىز. قازاقستاننىڭ جاڭا الەمدە ءوزىنىڭ لايىقتى ورنىن يەلەنىپ, ءوز ەگەمەندىگىن ساقتايتىنىنا جانە مادەني يگىلىگىن ەسەلەي تۇسەتىنىنە ەش كۇمان جوق.
عالىم احمەدياروۆ,
«استانا وپەرا» تەاترىنىڭ ديرەكتورى
