قازىرگى گەوساياسي جاعداي دا, ەلىمىزدەگى احۋال دا سونى كورسەتەدى. وسى ورايدا قاڭتار وقيعاسىنا توقتالا كەتسەم. توڭىرەگىمىزدە بولىپ جاتقان احۋالداردان انىق بايقاپ وتىرمىز. توڭكەرىس, بيلىكتى كۇشتەپ باسىپ الۋ – ادام قۇقىقتارىنا, ادىلەتتىلىككە جاسالعان ەڭ ۇلكەن قيانات. ەگەر قاڭتاردا توڭكەرىس جۇزەگە اسقاندا, وندا ەلىمىز ارتقا كەتەتىن ەدى. مەملەكەتىمىزدىڭ ابىرويىنا نۇقسان كەلىپ, سوزىلمالى دەرتكە اينالار ەدى. پرەزيدەنت توڭكەرىسكە تويتارىس بەرۋ ارقىلى ءوزىنىڭ دەموكراتيالىق قاعيداتتارعا, ساياسي رەفورمالارعا بەرىك ەكەنىن كورسەتتى. سونىڭ جولىندا تاباندىلىق تانىتاتىنىن ايقىنداپ بەردى. مۇنى جولداۋدان دا انىق اڭعاردىق. جولداۋ – قازاقستاننىڭ ۇزاق مەرزىمدى بولاشاعىن ايقىندايتىن ستراتەگيالىق قوعامدىق قۇجات.
وسى ورايدا مىنا ماسەلەگە نازار اۋدارعىم كەلەدى. ازاماتتىق قوعامنىڭ كلاسسيكالىق انىقتاماسىنىڭ ءبىر كورىنىسى – بۇقارالىق اقپارات قۇرالدارى. بۇل ماسەلەگە دە پرەزيدەنت جولداۋىندا ەرەكشە ءمان بەرىلدى. باق تۋرالى جاڭا زاڭدى ازىرلەۋ جانە قابىلداۋ, جۋرناليستەردىڭ شىنايى بوستاندىعى مەن كاسىپقويلىعىن قامتاماسىز ەتۋ, ەلدە ەركىن اقپاراتتىق كەڭىستىكتى قالىپتاستىرۋ – دەموكراتيانىڭ جولى عانا ەمەس, ۇلتتىق قاۋىپسىزدىك ماسەلەسى دەسەك, اسىرا ايتقانىمىز ەمەس. تاپسىرىسپەن الەۋمەتتىك جەلىدە نەمەسە بۇقارالىق اقپارات قۇرالدارىندا بەت جىرتىسۋدان مادەنيەتتىلىككە, بىلىمدىلىككە كوشۋىمىز قاجەت. سوندىقتان وسىنداي جولايرىقتا بىلىكتىلىك, مادەنيەتتىلىك, ادىلەتتىلىك پەن جاۋاپكەرشىلىك اسا ماڭىزدى.
ەكىنشى جاعىنان, وسىنداي باسقوسۋ دا ازاماتتىق قوعامنىڭ كورىنىسى. ويتكەنى بايسالدى اڭگىمە قازىر, اسىرەسە زيالى قاۋىمعا دەگەن سەنىمگە سەلكەۋ تۇسكەن ساتتە اسا قاجەت. سوندىقتان جاڭا قازاقستاندا جالتاق ەمەس, جاعىمپاز ەمەس جاڭا زيالى ورتا ءوسىپ شىعۋى كەرەك. جاڭا ءسوز ايتىلۋعا ءتيىس. قازاقستاننىڭ بولاشاعىنا, كەلەشەك كەلبەتىنە, ۇلتتىڭ بولمىسىنا قاتىستى ماسەلەلەردە بايسالدى پىكىرتالاس جۇرۋگە ءتيىس. سوندىقتان ديالوگ الاڭى اتىنا زاتى ساي, ۇلتتىق مۇددەگە قىزمەت ەتەتىن ۇلكەن مىنبەرگە اينالادى دەپ سەنەمىن. سەناتتىڭ جانىنان قۇرىلۋى بۇعان مۇمكىندىك بەرىپ, بەدەلىن كوتەرەدى, ماڭىزىن ارتتىرادى.
