“باتىس ەۋروپا – باتىس قىتاي” اۆتوجولى: مەرزىم – 2013 جىل!

كەشە پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ جامبىل وبلىسىنا جۇمىس ساپارىمەن كەلىپ, “باتىس ەۋروپا – باتىس قىتاي” اۆتوجولىنىڭ بويىندا جۇرگىزىلىپ جاتقان قۇرىلىس جۇمىستارىنىڭ اتقارىلۋ بارىسىمەن تانىستى. “باتىس ەۋروپا – باتىس قى­تاي”  حالىقارالىق ترانزيتتىك ءدالى­زى­نىڭ جاڭا اۆتوجول قۇرىلىسى ەلى­مىزدەگى جانە الەمدىك اۋقىمداعى ءىرى جوبالاردىڭ ءبىرى بولىپ سانالادى. ەلباسى ن.نازار­باەۆتىڭ “جاڭا ون­جىلدىق – جاڭا ەكونوميكالىق ءور­لەۋ – قازاقستاننىڭ جاڭا مۇمكىن­دىك­تەرى” دەپ اتالاتىن بيىلعى جول­داۋىندا ء“بىز سالۋعا كىرى­سەتىن “با­تىس ەۋروپا – باتىس قىتاي” اۆ­توجولى – تاۋارلار تاسىمالى ءۇشىن ماڭىزدى ماگيسترال” دەپ اتاپ كورسەتۋى دە سوندىقتان بولسا كەرەك. جولدىڭ قۇنى 825 ميلليارد تەڭگەگە باعالانىپ وتىر. اۆتو­كە­رۋەن جولىنىڭ جالپى ۇزىندىعى 8 مىڭ شاقىرىمنان اسسا, قازاقستان بويىنشا 2800 شاقىرىمدى الىپ جاتىر. ال جامبىل وبلىسى بوي­ىن­شا 495,3 شاقىرىمدى قۇرايدى. ءسويتىپ ول وسى ءوڭىردىڭ جۋالى, جامبىل, بايزاق, تۇرار رىسقۇلوۆ اتىنداعى, مەركى, شۋ جانە قورداي سياقتى ءىرى اۋداندارىن باسىپ وتەدى. – بۇل جولدىڭ ستراتەگيالىق ما­ڭىزى ەلىمىز ءۇشىن وتە زور. سون­دىقتان ەلباسى ونى ۇنەمى نازاردا ۇستاپ وتىر. ەستەرىڭىزدە بولسا, كەڭەس وكىمەتى كەزىندە بام, ياعني بايكال-امۋر ماگيسترالىنىڭ قۇرى­لىسى جۇرگىزىلگەنى بەلگىلى. ونىڭ جالپى ۇزىندىعى 3300 شاقىرىم بولاتىن. كەڭەس وكىمەتى سونى 150 مىڭ جۇمىسشى كۇشىمەن 17 جىل جۇرگىزدى. ال ءبىز 3 جىلدا, ياعني 2013 جىلى بىتىرمەكپىز. ءبىزدىڭ جۇمىس كۇشىمىزدىڭ سانى 50 مىڭ ادامعا دەيىن جەتەتىن بولادى. جۇمىسقا 10 مىڭ تەحنيكا جەگىلەدى. جولدىڭ ساپاسى, البەتتە, حالىقارالىق  قا­لىپقا ساي, ساپالى بولادى, – دەدى پرەمەر-ءمينيستردىڭ ءبىرىنشى ورىن­باسارى ومىرزاق شوكەەۆ جۋر­ناليستەرگە بەرگەن سۇحباتىندا. “باتىس ەۋروپا – باتىس قى­تاي” اۆتوجولىنىڭ جامبىل وبلى­سى بولىگىندە اتقارىلىپ جاتقان جۇ­مىستاردى كورىپ, ءىستىڭ بارىسىمەن جەتە تانىسقان ءو.شوكەەۆ قارقىن­دى جۇمىسقا ريزا بولسا, جايباسار­لىققا جول بەرگەن كومپانيالارعا كەڭشىلىك بولمايتىنىن دا ەسكەرتتى. مىسالى, “اقمولاقۇرىلىس ماتە­ريال­دارى” جشس-نىڭ جۇمىسى كەستەدەن ەداۋىر كەشەۋىلدەپ كەلەدى ەكەن. ەگەر مامىر ايىنىڭ اياعىنا دەيىن كەستە بويىنشا اتقارىلاتىن جۇمىستى قۋىپ جەتپەسە, سەنىم باسقا كومپانياعا كورسەتىلەتىندىگى ايتىلدى. پرەمەر-ءمينيستردىڭ ءبىرىنشى ورىنباسارى, سونداي-اق, تەحنيكانى كوبەيتۋدى, ەڭبەك ءتارتى­بىن ساقتاۋدى دا ەسكەرتتى. “جامبىلجولقۇرىلىس” قازاق­ستان-كورەيا بىرلەسكەن كومپانيا­سى­نىڭ جۇمىسىندا ەداۋىر شيراقتىق بار سياقتى كورىندى. كومپانيا جەتەكشىسىنىڭ كومەكشىسى دجونگ ناگ ۋون مىرزا, ءتىپتى, پرەمەر-مي­نيستر­دىڭ ءبىرىنشى ورىنباسارىمەن قازاقشا امانداستى. ورىسشاسى دا اجەپتاۋىر ەكەن. دجون ناگ ۋوننىڭ ايتۋىنا سەنسەك, بىرلەسكەن كوم­پانيا كەستە بويىنشا جۇمىس ىستەپ كەلەدى. كولدەنەڭنەن كەزدەسىپ, جۇ­مىسقا كەدەرگى جاساپ وتىرعان ۇلكەن ماسەلە جوق. كارەر ماسەلەسىنىڭ قۇجاتتارى بويىنشا ازىن-اۋلاق ماسەلە بار ەكەن, ونى جۇمىس بارىسىندا شەشۋ كوزدەلىپتى. پرەمەر-ءمينيستردىڭ ءبىرىنشى ورىنباسارى ءو.شوكەەۆ وبلىستىق اكىمدىككە, پروكۋراتۋراعا جانە كومپانيا باسشىلارىنا مۇنداي ماسەلەنى جۇمىس قارقىنىن توق­تاتپاي تەز ارادا شەشۋدى تاپسىردى. بۇگىندە جول 38 بولىمشەگە ءبولى­نىپ, ونىڭ 20-دا جۇمىس قارقىندى تۇردە جۇرگىزىلۋدە. كوسەمالى ساتتىباي ۇلى, جامبىل وبلىسى.