وسى جانە باسقا دا ماسەلەلەر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆتىڭ تاپسىرماسى بويىنشا وتكەن كەڭەستە تالقىلاندى. كەزدەسۋگە ازاماتتىق اۆياتسيا كوميتەتىنىڭ قىزمەتكەرلەرى, قازاقستاننىڭ اۆياتسيالىق اكىمشىلىگى جانە قازاقستاندىق اۆياكومپانيالار مەن اۋەجايلاردىڭ وكىلدەرى قاتىستى.
سونىمەن بىرگە اۋەجايلارداعى سەرۆيستى جاقسارتۋعا باعىتتالعان جوبالار قارالدى. وسىلايشا, جولاۋشىلارعا ارنالعان جاڭا تەرمينالداردا تىركەۋ ايماقتارى كەڭەيتىلىپ, جولاۋشىلاردى تىركەۋ جانە باگاجدى وڭدەۋ بويىنشا جاڭا تەحنولوگيالىق شەشىمدەر جۇزەگە اسىرىلادى دەپ جوسپارلانىپ وتىر. بۇگىنگى تاڭدا الماتى جانە شىمكەنت قالالارىنىڭ اۋەجايلارىندا جاڭا تەرمينالدىڭ قۇرىلىسى بويىنشا جوسپارلى جۇمىستار جۇرگىزىلۋدە.
ازاماتتاردىڭ قاۋىپسىزدىگىن قامتاماسىز ەتۋ جانە مۇمكىندىگى شەكتەۋلى جولاۋشىلارعا قىزمەت كورسەتۋ ماسەلەلەرىنە ەرەكشە نازار اۋدارىلدى. مۇمكىندىگى شەكتەۋلى جولاۋشىلاردىڭ كەدەرگىسىز ءجۇرىپ-تۇرۋى ءۇشىن اۋەجايلار مەن اۆياكومپانيالارعا ارنايى كرەسلولاردىڭ, اۆتوكولىك پەن تاسىمالداۋ تەتىكتەرىنىڭ بولۋى سياقتى قاجەتتى قىزمەتتەردى ساپالى ءارى ۋاقتىلى كورسەتۋ تاپسىرىلدى.
بيىل اۆياكومپانيالارعا اۋە تاسىمالى بويىنشا شەكتەۋ قويىلعان ادامداردىڭ جەكە ءتىزىلىمىن جۇرگىزۋگە مۇمكىندىك بەرەتىن نورما قولدانىسقا ەنگىزىلىپ جاتىر. تىزىمگە بورتتا, اۋە كەمەسىنىڭ ۇشىپ كوتەرىلۋى مەن قونۋى كەزىندە قۇقىق بۇزۋشىلىق جاساعان ازاماتتار ولاردىڭ كىناسى دالەلدەنگەن جاعدايدا ەنگىزىلەدى.
ايتا كەتەرلىگى, 2021 جىلى ىسكە اسىرىلعان ماڭىزدى جوبالاردىڭ ءبىرى «تسيفرلىق قۇجاتتار» باعدارلاماسى بولىپ تابىلادى. جوبا جولاۋشىلارعا ەلەكتروندى جەكە كۋالىكتى پايدالانۋعا مۇمكىندىك بەردى. «نۇرسۇلتان نازارباەۆ حالىقارالىق اۋەجايى» اق بالالار ءاۋتيزمى, اسپەرگەر سيندرومى جانە ءاتيپتى اۋتيزم اۋرۋىمەن اۋىراتىن ادامدار ءۇشىن الەۋمەتتىك ماڭىزى بار جوبانى ءساتتى جۇزەگە اسىرىپ كەلەدى. ولار ءۇشىن سايكەستەندىرۋ تاسپاسى جاسالىپ, ناتيجەسىندە تىركەۋ, تەكسەرۋ جانە باسقا دا قىزمەت تۇرلەرىن كورسەتۋگە مۇمكىندىك بەرىلدى.
