كەڭەس وداعىنىڭ باتىرى, اكادەميك, جازۋشى مالiك عابدۋلليننىڭ مۋزەيى باتىر اتامىزدىڭ 80 جىلدىعىنا وراي 1995 جىلى 5 قىركۇيەكتە اشىلعان.
ال كەڭەس وداعىنىڭ باتىرى ءا.مولداعۇلوۆانىڭ مەموريالدى مۋزەيى بولسا, 1985 جىلدىڭ 22 ساۋىرىندە اقتوبە قالاسىندا جەڭىستىڭ 40 جىلدىعى جانە باتىر قىزدىڭ 60 جىلدىعى قارساڭىندا سالتاناتتى تۇردە اشىلدى.
سوعىس پەن باتىر قىز تۋرالى ماتەريالداردى جيناقتاۋ مەن زەرتتەۋ ماقساتىندا 1989 جىلى مۋزەي جانىنان ء«اليا» ىزدەستىرۋ توبى قۇرىلدى. توپ كەيىنەن «جاۋىنگەرلىك باۋىرلاستىق» ىزدەستىرۋ توبى دەپ وزگەرتىلدى. توپتىڭ ماقساتى – قىزىل اسكەر جاۋىنگەرلەرىنىڭ مۇردەلەرىن تاۋىپ, قۇرمەتپەن جەرلەۋ, قازا تاپقانداردىڭ وتباسىلارىنا جانە مۋزەيگە سوعىس كەزىندە قولدانىلعان زاتتاردى, قۇجاتتاردى تاپسىرۋ.
ىزدەستىرۋشىلەر توبىنىڭ جۇمىسى مۋزەي قورىنىڭ تولىعۋىنا جاعداي جاسادى. مۋزەيگە سوعىس قارۋلارى – اۆتومات, پۋلەمەت, گراناتالار, پاتروندار, كاسكا, مەدالون, اسكەري ىدىستار, ت.ب. تاپسىرىلدى.
قازىرگى تاڭدا مۋزەي قورىندا 10 مىڭنان استام ەكسپونات تىركەلگەن. ەكسپوزيتسيا جاڭا ەكسپوناتتارمەن ۇنەمى تولىعىپ وتىرادى. مۋزەيدەگى ەڭ قۇندى ەكسپوناتتارعا سوعىس كەزىندەگى قۇجاتتار مەن زاتتار, باتىر قىزدىڭ مايداننان جازعان حاتتارى, كەڭەس وداعىنىڭ باتىرى اتاعى بەرىلگەندىگى تۋرالى گراموتاسى جاتادى.
جىل سايىن مۋزەي 40 مىڭنان استام كورەرمەندى قاھارمان قىزدىڭ ەرلىك, ءومىر جولىمەن, ۇلى وتان سوعىسىنىڭ تاريحىمەن تانىستىرادى. مۋزەي اشىلعاننان بەرى ەلىمىزدىڭ بارلىق وڭىرىنەن, الىس-جاقىن شەتەلدەردەن مىڭداعان كورەرمەن مۋزەي ەكسپوزيتسياسىمەن تانىستى.
«ماڭگىلىك ەلدىڭ باتىرلارى» اتتى سالتاناتتى ءىس-شارادا قوس مۋزەي اراسىندا كەڭەس وداعىنىڭ باتىرلارى مالىك عابدۋللين مەن ءاليا مولداعۇلوۆانىڭ ەرلىگىن كوپشىلىككە تانىستىرۋ, رۋحاني-مادەني بايلانىستى جەتىلدىرە ءتۇسۋدىڭ تاعى ءبىر وڭتايلى ءادىسى ارىپتەستىكتى نىعايتۋ بولاتىن.
اقتوبە وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باسشىسى التىناي يۋنيسوۆا ەكى مۋزەيدىڭ اراسىنداعى ارىپتەستىك ىنتىماقتاستىق اياسىندا اتقارىلۋعا ءتيىستى جۇمىستارعا ساتتىلىك تىلەپ, رۋحاني-مادەني كەرۋەندى الىستان ارنايى ات ارىتىپ الىپ كەلگەن كوكشەتاۋلىقتارعا ريزاشىلىعىن ايتىپ, العىس ءبىلدىردى.
كەشتە ۇرانى مەن ماقساتى ءبىر اتالعان تۇلعالىق مۋزەيلەردىڭ باعىتى, ىشكى جۇمىستارى تۋرالى اقپارات بەرىلدى. قوس باتىردىڭ مۋزەيى اراسىندا ىنتىماقتاستىق مەموراندۋمىنا مۋزەي باسشىلارى قول قويدى. اقتوبەلىكتەر مەن قالا قوناقتارىن مالىك عابدۋللين مۋزەيىنىڭ ديرەكتورى سەرىكجان ءجۇزجانوۆا وزدەرىنىڭ تىنىس-تىرشىلىگىنەن حاباردار ەتسە, باتىردىڭ ءومىرى مەن شىعارماشىلىعىنا ارنالعان «عاجايىپ ءومىر باسپالداقتارى» اتتى جىلجىمالى كورمەسىمەن مۋزەيدىڭ عىلىمي قىزمەتكەرى اياگوز ماحمەتوۆا تانىستىردى.
كەشتە ساپار مولداعۇلوۆ شەجىرەلەرگە توقتالىپ, ەستەلىكتەرمەن ءبولىستى. كوپشىلىككە وتباسى جايىن, اكەسى, ءاليا مولداعۇلوۆانىڭ ناعاشى اعاسى ابۋباكىر مولداعۇلوۆتىڭ مايدانگەر قىز بالانىڭ تاعدىرى تۋرالى اڭگىمەلەرىن ايتىپ بەردى.
نازەركە جولديەۆا,
ءاليا مولداعۇلوۆا اتىنداعى وبلىستىق مەموريالدى مۋزەيدىڭ عىلىمي قىزمەتكەرى
اقتوبە وبلىسى
