كوكپەكتى كارىن كورسەتتى

بۇرناعى كۇنى تۇندە قاراعاندى وبلىسى بۇقار جىراۋ اۋدانىنداعى كوكپەكتى سۋ قويماسىنداعى پلوتينانىڭ جىرىلىپ كەتۋىنە بايلانىستى كوكپەكتى اۋىلىن توپان سۋ باسىپ قالدى. جوعارىدان كوپ اعىن سۋدىڭ كەلىپ قۇيىلۋى مەن شليۋز كامەراسىنىڭ وتكىزۋ قابىلەتىنىڭ ناشارلىعى سالدارىنان تاسقىننىڭ پلوتينادان اسىپ ءتۇسۋ ىقتيمالدىلىعى 18 ساعات 30 مينۋتتا بايقالدى. وسىعان بايلانىستى كوكپەكتى اۋىلىنىڭ وزەن جاعالاۋىنا ورنالاسقان 70 ءۇيى  مەن قاراعاندى قالاسىنا قاراستى سورتيروۆكا ەلدى مەكەنىنىڭ 30 ۇيىنە جاعداي حابارلانىپ, تۇرعىنداردى باسقا جاققا كوشىرۋ ورىن الىپ قالۋى مۇمكىن ەكەنى ەسكەرتىلدى. تۇرعىنداردىڭ كوشىرىلەتىنى تۋرالى اقپار كوكپەكتى جانە نۇرا وزەندەرى جاعالاۋلارىندا تۇراتىن تۇرعىنداردىڭ بارلىعىنا جەتكىزىلدى. ول ۇيمە-ءۇي ارالاپ شىعۋ تارتىبىمەن جۇرگىزىلدى. الايدا, جاعداي ويلاعاننان دا تەز ءورىس الىپ كەتتى, 31 ناۋ­رىز كۇنى تۇنگى 1 ساعات 30 مينۋتتا سۋ پلوتينانىڭ ەرنەۋىنەن اسىپ كەتتى. ناتيجەسىندە كوكپەكتى اۋىلىندا 810 ادامى بار 100 ۇيگە تاسقىن سۋ لاپ قويدى. سۋدىڭ دەڭگەيى بىردەن 1,5-1,8 مەترگە جەتتى. تۇنگى 2 ساعات 45 مينۋتتان كەيىن عانا كەنتتەگى سۋدىڭ دەڭگەيى قايتا باستادى. توتەنشە جاعدايدى جويۋ مەن سۋ باسقان جەرلەردەگى تۇرعىنداردى كوشىرۋگە توتەنشە جاعدايلار مينيسترلىگىنىڭ قۇرامىندا 124 ادامى مەن 15 جوعارى ءوتىمدى تەحنيكا بىرلىگى بار ازاماتتىق قورعانىس پولكى, مەديتسينالىق اپات بولىمشەلەرى, قۇتقارۋشىلارى تارتىلدى. جۇرگىزىلگەن جۇمىستاردىڭ ناتيجەسىندە كوكپەكتى كەنتىنىڭ 125 ادامى قۇتقارىلدى. قۇتقارۋ جۇمىستارى بارىسىندا قازا تاپقان 5 ادامنىڭ دەنەلەرى تابىلدى. مەديتسينالىق پۋنكتكە 9 ادام كومەك سۇراپ كەلسە, ولاردىڭ 6-ۋى شۇعىل اۋرۋحاناعا جاتقىزىلدى. كەشە تاڭەرتەڭ وقيعا بولعان جەرگە توتەنشە جاعدايلار ءمينيسترى ۆلاديمير بوجكو ۇشىپ كەلدى. جاعدايدى 7 باعىتتا زەرتتەۋ ماقساتىندا توتەنشە جاعدايلار, ىشكى ىستەر ورگاندارى, اكىمدىكتەر, دەنساۋلىق ساقتاۋ سالاسى قىزمەتكەرلەرىنەن قۇرالعان  7 توپ قۇرىلىپ, جۇمىس جاساۋدا. قازىرگى تاڭدا توتەنشە جاعدايلار قىزمەتى قۇتقارۋ جۇمىستارىن جالعاستىرىپ جاتىر. ورىن العان وقيعاعا بايلانىستى قىلمىستىق ءىس قوزعالدى. قاراعاندى.