كەشە ورتالىق كوممۋنيكاتسيالار قىزمەتىندە ەلباسى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنان تۋىندايتىن مىندەتتەرگە بايلانىستى «استانا ەكسپو-2017» ۇك» اق باسقارما توراعاسى تالعات ەرمەگياەۆ جۋرناليستەرمەن ءباسپاسوز ءماسليحاتىن وتكىزدى.
ءوز سوزىندە تالعات ەرمەگياەۆ ەلباسى جولداۋىندا جانە «قازاقستان-2050» ستراتەگياسىندا اتاپ كورسەتىلگەن قازاقستاننىڭ الەمدەگى دامىعان 30 ەلدىڭ قاتارىنا كىرۋى, ەل ەكونوميكاسىنىڭ ۇدەمەلى دامۋى, ءىجو-ءنى ءوسىرۋ جانە وعان جۇمسالاتىن ەنەرگيا شىعىنىن ازايتۋ, يندۋستريالاندىرۋ جانە يننوۆاتسيا سياقتى ماڭىزدى مىندەتتەردى ورىنداۋ ماسەلەلەرىنە توقتالدى. «وسى اتاپ كورسەتىلگەن كەلەلى مىندەتتەردىڭ ءبىزدىڭ كومپانيامىزعا دا تىكەلەي قاتىسى بار. سەبەبى, «استان ەكسپو-2017» ۇك» اق-تىڭ نەگىزگى مىندەتى – ەلىمىزگە يننوۆاتسيالىق جوبالار ارقىلى ينۆەستيتسيا تارتۋ, باسەكەگە قابىلەتتى ەكونوميكا قۇرۋعا بارىنشا ۇلەس قوسۋ», دەدى ول ءوز سوزىندە.
مەملەكەت باسشىسىنىڭ جولداۋىندا «ەكسپو-2017» – تاۋەلسىز قازاقستاننىڭ تاريحىنداعى ەڭ ءىرى حالىقارالىق شارا. سالىنعان ءاربىر عيمارات وزىمىزدە قالادى جانە يننوۆاتسيالىق يدەيالاردى ەلىمىز بەن الەم يگىلىگىنە جاراتۋ ءۇشىن قىزمەت ەتەتىن بولادى», دەپ اتاپ كورسەتىلگەن. سوندىقتان جۇزدەن استام مەملەكەتتەن قوناقتار كەلەتىن «استانا ەكسپو-2017» بۇكىلالەمدىك كورمەسىن جوعارى دەڭگەيدە وتكىزۋ جاۋاپكەرشىلىگى زور دا ابىرويلى مىندەت. كورمە قالاشىعىنداعى قۇرىلىس جۇمىستارى جاقىندا باستالعالى وتىر. بۇل ەلىمىزدىڭ قۇرىلىس يندۋسترياسىن جاڭا بيىككە كوتەرەتىن شىن مانىندەگى عاسىر قۇرىلىسى بولماق.
كومپانيا باسشىسى الدا تۇرعان وسى ءبىر كەلەلى مىندەتتەردى ءتىلگە تيەك ەتە كەلىپ, ەكسپو قالاشىعىنىڭ جالپى اۋدانى 173,4 گەكتار بولسا, ونىڭ 148 گەكتارىنا تۇرعىن ۇيلەر, ءبىلىم بەرۋ جانە دەنساۋلىق ساقتاۋ مەكەمەلەرى, الەۋمەتتىك مادەني نىساندار, ساۋدا جانە ويىن-ساۋىق ورتالىقتارى سالىناتىندىعىن, ال 25 گەكتار اۋماق ناقتى كورمە كەشەندەرىنىڭ يەلىگىنە بەرىلەتىندىگىن ايتتى. ينفراقۇرىلىمى دەربەس سالىناتىن ەكسپو قالاشىعىنىڭ ارقاسىندا استانا «اقىلدى» قالاعا اينالاتىن بولادى. «ول ءوز ەنەرگياسىن ءوزى ءوندىرىپ الۋعا قابىلەتتى الەمدەگى العاشقى قالا بولادى. كورمە اۋماعى تەك قانا جاڭعىرتىلعان ەنەرگيا كوزدەرىنەن الىنعان قۋاتپەن جۇمىس ىستەيدى. ەكسپو قالاشىعىنىڭ تاعى ءبىر جاڭالىعى – وندىرگەن قۋاتىن كەز كەلگەن باعىتقا بەرە الاتىن Smart Grid اقىلدى ەنەرگوتاراتۋ جۇيەسى ىسكە قوسىلماق. Smart Grid جۇيەسى ءار عيماراتتىڭ ءوزى وندىرگەن ەنەرگياسىن ءوزى پايدالانىپ قانا قويماي, ارتىعىن ساتىپ جىبەرە الاتىن مۇمكىندىك تۋعىزادى. قىزىقتى جاڭالىقتىڭ ءبىرى – «اقىلدى قوقىس» اتتى ۆاكۋمدىق جۇيە. ونىڭ ارتىقشىلىعى – ءار عيماراتتان شىققان قوقىستى جۇيە ءوزى سورىپ الىپ, تىكەلەي زاۋىتقا وڭدەۋگە جىبەرەدى. ول زاۋىت پايدالانىلعان تەحنيكالىق سۋدى دا تازالاپ, قايتادان قۇبىرعا جولداي الادى. بۇدان بولەك ەكسپو قالاشىعىندا وندىرىلگەن ەنەرگيانى ەش قينالىسسىز ساقتاي الاتىن قويما پايدا بولماق.
ءدال قازىر ءبىزدىڭ كومپانيا ماڭىزدى شارانىڭ قارساڭىندا تۇر. 2014 جىلدىڭ ماۋسىم ايىندا حالىقارالىق كورمەلەر بيۋروسى (حكب) باس اسسامبلەياسىندا «استانا ەكسپو-2017» مامانداندىرىلعان كورمەسىنىڭ باستى قۇجاتى – تىركەلۋ قۇجاتتاماسى تالقىلاناتىن بولادى. ءبارىمىز ءۇشىن ماڭىزدى بۇل شارا ءساتتى وتەدى دەپ سەنەمىز», دەدى ءسوزىنىڭ قورىتىندىسىندا «استانا ەكسپو-2017» ۇك» اق توراعاسى تالعات ەرمەگياەۆ.
توراعانىڭ بريفينگ بارىسىندا جۋرناليستەردىڭ قويعان سۇراقتارىنا جاۋاپ بەرە كەلىپ, كورمە قالاشىعىنا بولىنگەن 174 گەكتار قۇرىلىس الاڭىنا 1 ميلليارد اقش دوللارىنان استام ينۆەستيتسيا تارتىلاتىنىن ايتتى. ەكسپو قالاشىعىنىڭ قۇرىلىس الاڭىندا جۇمىس ىستەيتىن ينۆەستورلار ءۇشىن ايتارلىقتاي سالىق جەڭىلدىكتەرى جاسالاتىن بولادى. تاعى ءبىر ايتا كەتەتىن ماسەلە, كورمەگە دايىندىق بارىسىندا ەكسپو قالاشىعىنداعى قۇرىلىس جانە باسقا دا سالالاردا 20 مىڭنان استام جاڭا جۇمىس ورنى اشىلاتىن بولادى.
جىلقىباي جاعىپار ۇلى,
«ەگەمەن قازاقستان».
