Amanat اتاۋى پارتيامىزعا كەلەلى مىندەتتەر جۇكتەيتىن بولسا, سونىڭ ءبىرى دە, بىرەگەيى اتادان بالاعا ميراس بولىپ كەلە جاتقان ەرەكشە قاسيەتتەردىڭ ءبىرى يماندىلىق دەر ەدىم. يمانى بار ازاماتتاردان ەش ۋاقىتتا جامانشىلىق شىقپايدى. اماناتقا قيانات جاسامايتىندار دا وسىلار. ونىڭ ىشىندە ءتىلىمىز, ءدىنىمىز بەن دىلىمىزگە قاتىستى ماڭىزدى ماسەلەلەر تاعى بار. ولاي بولسا, Amanat پارتياسى جاستارىمىزدى يماندىلىق پەن وتانسۇيگىشتىك قاسيەتكە, ادامدار اراسىنداعى سىيلاستىق پەن ىنتىماق-بىرلىكتى ساقتاۋعا, جاۋاپكەرشىلىككە تاربيەلەۋ باعىتىن ۇستانۋعا ءتيىس.
پارتيا ۇرپاق تاربيەسىنە قاتىستى ۇلتتىق قۇندىلىقتارىمىزدى كەڭىنەن دارىپتەپ, انا تىلىمىزگە دەگەن جاناشىرلىعىمىزدى ارتتىرىپ, قانىمىزعا سىڭگەن قازاقى ءسان-سالتاناتىمىزدى بەرىك ۇستاپ, ونى جانداندىرا تۇسۋگە باسا كوڭىل اۋدارۋى كەرەك. ءداستۇرلى ونەرىمىزدى كەڭىنەن قالىپتاستىرىپ, ونى وسكەلەڭ جاس ۇرپاقتىڭ بويىنا تەرەڭ سىڭىرە بىلگەندە عانا ءبىز قازاقى قالپىمىزدى كەيىنگىلەرگە امانات ەتىپ قالدىرا الامىز. پرەزيدەنتىمىز ايتىپ وتىرعان ۇرپاق جالعاستىعى دەگەن مىنە وسى.
بۇگىنگى جاڭا قازاقستاننىڭ الدىندا تۇرعان بيىك مىندەتتەردىڭ ءبىرى – حالىقتى ءتىل شۇبارلىعىنان بارىنشا تازارتىپ وتىرۋ دەسەم ارتىق بولماس. ايتا كەتۋ كەرەك, سىرلى سازىمىز بەن اۋەزدى اۋەنىمىز دە بۇرمالانىپ بارادى. ءداستۇرلى اسەم اندەرىمىز بەن ءتاتتى كۇيلەرىمىز وتە سيرەك ورىندالادى. ال داڭعازا-داراقى, جانعا جاعىمسىز, مازمۇن-ماعىنادان جۇرداي جەلوكپە اندەر كەڭىنەن ءورىس الىپ, قازاققا ءتان بايلسالدىعىمىز كورەر كوزگە جوعالىپ بارادى. كيىم كيۋ مادەنيەتىمىز وزگەرىپ, يماندىلىق ادەبىن ساقتامايتىن بولدىق. قىزداردان قىتىق, ادەپتىلىك پەن يبالىق قاسيەت كەتىپ بارادى.
قىسقاسى, قازاقستاننىڭ جاڭعىرۋى – ول ءبىرىنشى كەزەكتە ءوزىمىزدىڭ بايىرعى ۇلتتىق ناقىشىمىزدى ساقتاپ قالۋدان تۇراتىنىن ۇمىتپاعانىمىز ءجون. مىنە, وسى جانە وزگە دە وزەكتى ماسەلەلەردى جۇزەگە اسىرۋدى قولعا السا, بابالار اماناتىنا ادالدىق تانىتۋدى Amanat پارتياسى ءوزىنىڭ باستى مىندەتى ەتىپ السا, وندا ول قازاق حالقىنىڭ شىنايى قولداۋى يە بولا الادى.
سەرىكباي تۇرجان,
بايدىبەك اۋدانىنىڭ
قۇرمەتتى ازاماتى
تۇركىستان وبلىسى
