قاراعاندى وبلىسىنداعى تاسقىندا 6 ادام اۋرۋحاناعا جاتقىزىلدى

قاراعاندى وبلىسى بۇقار جىراۋ اۋدانىنداعى كوكپەكتى سۋ قويماسىنداعى پلوتينانىڭ جىرىلىپ كەتۋىنە بايلانىستى تۋىنداعان تاسقىننىڭ سالدارىنان 9 ادام اۋرۋحاناعا جاتقىزىلدى. بۇل تۋرالى قاراعاندى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى. «قاراعاندى وبلىسى كوكپەكتى سۋ قويماسىنداعى توتەنشە جاعدايلاردى جويۋ جونىندەگى جۇمىستار جالعاسىپ جاتىر», - دەلىنگەن حابارلامادا. قازىر جاعدايدى 7 باعىتتا زەرتتەۋ ماقساتىندا توتەنشە جاعدايلار, ىشكى ىستەر ورگاندارى, اكىمدىكتەر, دەنساۋلىق ساقتاۋ سالاسى قىزمەتكەرلەرىنەن قۇرالعان 7 توپ قۇرىلىپ, جۇمىس جاساۋدا. بولعان وقيعانىڭ زارداپتارىن جويىپ, تۇرعىنداردى قاۋىپسىز جەرلەرگە كوشىرۋ جۇمىستارىنا توتەنشە جاعدايلار مينيسترلىگى مەديتسينالىق اپات بولىمشەلەرىنىڭ, ازاماتتىق قورعانىس پولكىنىڭ  150-دەن استام ادامى مەن 19 قۇتقارۋشىلار تەحنيكاسى, سونداي-اق ىشكى ىستەر باسقارماسىنىڭ 20 ادامى مەن 4 تەحنيكاسى, دەنساۋلىق ساقتاۋ باسقارماسىنىڭ 30 ادامى مەن 10 تەحنيكا بىرلىگى, جەرگىلىكتى اتقارۋشى ورگانداردىڭ 10 ادامى مەن 3 تەحنيكاسى قاتىسۋدا. توتەنشە جاعدايلاردى جويۋ جونىندەگى شتاب جۇمىسىنا توتەنشە جاعدايلار ءمينيسترى ۆلاديمير بوجكو باسشىلىق جاساۋدا. كوكپەكتى اۋىلىنداعى شتابتىڭ جانىندا مەديتسينالىق پۋنكت جۇمىس ىستەپ تۇر. وعان 9 ادام كومەك سۇراپ كەلسە, ولاردىڭ 6-ى شۇعىل اۋرۋحاناعا جاتقىزىلدى. مۇرات ايتقوجا. دەرەككوز: قاراعاندى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى. فوتو: yk.kz.