«... جاقىنداپ اجال تۇرسا دا, جانىڭا قىلىش ۇرسا دا, قالجىراپ, كوڭىلى قارايىپ, قارا ءبىر كوزىن جۇمسا دا, ومىرگە تويماس ادامزات!» دەمەي مە بۇقار جىراۋ بابامىز.
ادام ومىرىنەن قىمبات نە بار؟ قازاقستان پرەزيدەنتى قاسىم-جومارت توقاەۆ «قاڭتار قاسىرەتىنەن» كەيىن بىرنەشە مارتە سۇحبات بەرىپ, اشىق تۇردە بارلىق جاعدايدى سارالاپ, شۇعىل ارادا جۇزەگە اسىرىلۋعا ءتيىس بارلىق شارانى ايقىنداپ, بەلگىلەپ بەردى. زوبالاڭدى سىن-سىناقتان وتكەن حالىق پرەزيدەنتكە سەنەدى.
ءبىزدىڭ بولاشاعىمىزدىڭ, ەلدىڭ ەلدىگىنىڭ بۇگىنگى تاڭداعى جالعىز كەپىلى – ەل پرەزيدەنتى. ول وسى ماقسات-مۇددەلەردى ەسكەرە وتىرىپ, «جاڭا قازاقستان» يدەياسىن جۇزەگە اسىرۋ باعىتتارىن العا تارتتى. سول جاڭارۋ مەن جاڭعىرۋدى بايتاعىمىز تولىق سەزىنگەندە عانا بايراعىمىزدىڭ ءتۇزۋ جەلبىرەيتىنىن بۇقاراعا سەزىندىرە الدى.
ساياسي ۇيىمنىڭ اتاۋىن Amanat پارتياسى دەپ وزگەرتكەن قۇرىلتايدا قاسىم-جومارت توقاەۆ: «اشىعىن ايتقاندا, قازىرگى كەزدە ساياسي مەنەدجەرلەردى دايارلاۋ ءىسى اقساپ تۇر. قازىرگى جاعدايدا ساياسي باسشىلار ءتۇرلى مامانمەن, جاستارمەن, جۋرناليستەرمەن, حالىقتىڭ بارلىق وكىلىمەن ءتىل تابىسا الۋى كەرەك. مۇنداي ادامدار ەل اراسىندا از ەمەس. الەۋمەتتىك ءليفتىنىڭ جوقتىعى – بىردەن-ءبىر كەدەرگى», دەي كەلىپ, جاس ءارى قابىلەتتى ماماندارعا مۇمكىندىك بەرۋ جايىن ايتتى. وتە قۇپتارلىق ۇسىنىس.
وسى جەردە ءبىلىمدى ساياسي مەنەدجەرلەردىڭ قاراپايىم ادامداردىڭ جان-جۇرەگىنە ۇڭىلە الاتىن, ولارمەن ديدارلاسۋعا مۇمكىندىك تاباتىن قاسيەتتەرىنە دە ءۇڭىلۋ كەرەك. گالستۋك بايلاپ, شىرەنىپ قاتىپ قالعان شەنەۋنىكتىڭ كۇنى وتكەنىن انىق سەزىندىك. «جاڭا قازاقستانعا» جاڭاشا مىنەز, جاڭاشا بولمىس قالىپتاستىرۋ ماڭىزدى.
مەن قالامگەر رەتىندە ەلىمىزدىڭ تۇكپىر-تۇكپىرىن, الىس اۋىلداردى كوبىرەك ارالايمىن. قوعامدىق فورماتسيالاردىڭ الماسۋى سول اۋىلداردىڭ دا جان-دۇنيەسىن, بولمىس-تابيعاتىن قاتتى وزگەرتىپ جىبەردى. «جاڭا قازاقستاندا» قاناعات, راقىم, ىزگىلىك, مەيىرىم سەكىلدى ۇلتتى ساقتاپ تۇراتىن ۇلى ۇعىمدار العا شىعۋى كەرەك. جاستاردىڭ بويىنا ەلىن, وتانىن سۇيەتىن پاتريوتتىق قاسيەتتەردى ءسىڭىرۋ كەزەك كۇتتىرمەيتىن مىندەت بولۋعا ءتيىس. اعالار القاسىن, اقساقالدار ينستيتۋتىن جانداندىرۋ – ۇلت بولىپ ۇيىسۋدىڭ العىشارتى.
قازاقتا «ەسى كىرگەن ەسكىسىن ىزدەيدى» دەگەن ناقىل بار. «مىڭ ءولىپ, مىڭ تىرىلگەن» ءبىزدىڭ حالىقتىڭ كوش-كەرۋەنىن اق جاۋلىقتى انالاردىڭ اق تىلەگى, اقساقالدى قاريالاردىڭ اق باتاسى ءتۇزۋ جولعا سالىپ وتىرعان.
مەملەكەتتىڭ قاۋىپسىزدىگىن, اۋماقتىق تۇتاستىعىمىزدى, ەلدىڭ الەۋمەتتىك-ەكونوميكالىق دامۋىن ۇستانىم ەتكەن «جاڭا قازاقستان» يدەياسىنا دا, Amanat-تىڭ الدا اتقارار اۋقىمدى جۇمىستارىنا دا ساتتىلىك دەيمىن.
جارقىن كۇندەردىڭ جىلناماسىن بىرگە جازۋعا جازسىن.
عالىم جايلىباي,
اقىن, قازاقستاننىڭ ەڭبەك سىڭىرگەن قايراتكەرى
