ءىس-شاراعا ارنايى كەلىپ قاتىسقان ءوڭىر باسشىسى جەڭىس قاسىمبەك قاسىرەتتى قاڭتاردا قوعامدىق ءتارتىپتى ساقتاۋ كەزىندە قازا تاپقان ساربازداردىڭ ەرلىگىن اتاپ ءوتىپ, ولاردىڭ تۋىستارىنا وتاننىڭ ناعىز پاتريوتتارىن تاربيەلەگەنى ءۇشىن العىس سەزىمىن جەتكىزدى. سونىمەن بىرگە قازاقستاندىق بەلگىلى سۋرەتشى باتىرلاردىڭ بەينەسى سالىنعان پورترەتتەرىن اتا-انالارىنا تابىس ەتتى.
بۇدان بولەك پاندەميا كەزىندە ەرلىك ىستەرىمەن, جانكەشتى ەڭبەگىمەن كوزگە تۇسكەن ەرىكتىلەر مەن دونورلار, مەتسەناتتار, پوليتسيا قىزمەتكەرلەرى مەن ءورت سوندىرۋشىلەر, جۋرناليستەر سىي-قۇرمەتكە بولەندى.
وبلىس اكىمى بۇل ماماندىق يەلەرىنىڭ تاۋلىك بويى جۇمىس ىستەپ, ءوزارا كومەك پەن ىنتىماقتاستىقتىڭ ۇلگىسىن كورسەتكەنىن جانە ولاردىڭ مۇنى جۇرەك قالاۋىمەن جاساعاندىقتارىن ايتتى.
– سىناقتىڭ قيىن كۇندەرىندە ءوزىنىڭ ازاماتتىق جانە كاسىبي بورىشىن ادال اتقارعان ءاربىر ادام شىنايى العىس پەن جىلى لەبىزگە لايىق دەپ سانايمىن, – دەدى ج.قاسىمبەك.
«وتزىۆ» قايىرىمدىلىق قورىنىڭ نەگىزىن قالاۋشى الەكساندر كوروگودوۆ اۋرۋ بالالاردىڭ انالارى قوڭىراۋ شالىپ, كورسەتىلگەن كومەكتىڭ شاراپاتى تيگەنىن ايتقاندا, ءاردايىم بويدى شاتتىق بيلەيتىنىن ايتتى.
– بۇل بىزدەردى كەرەمەتتەي شابىتتاندىرادى جانە ىلگەرى جىلجۋىمىزعا كومەكتەسەدى. جاقسىلىق جاساۋ – كوڭىلىمنىڭ حوشى, – دەدى ول اعىنان جارىلىپ.
العىس ايتۋ كۇنىنىڭ قارساڭىندا چەشەن-ينگۋش ۇلتتىق-مادەني ورتالىعى قايىرىمدىلىق اكتسياسىن ۇيىمداستىرىپ, 225 كوپبالالى وتباسى مەن جالعىز باستى انالارعا قولداۋ كورسەتكەنى بەلگىلى بولدى. ال وسى ىستەرگە ۇيىتقى بولعان ورتالىق توراعاسى ۋۆايس دجاناەۆ كوپەتنوستى حالقىمىزدىڭ بىرلىگى العىس ايتۋ كۇنىنىڭ ماڭىزدى فاكتورلارىنىڭ ءبىرى ەكەنىن ەرەكشە اتاپ ءوتتى.
قاراعاندى
