ارىپتەستىك بايلانىستار الەۋەتى زور

تاۋەلسىز قازاقستان پرەزيدەنتى نۇرسۇلتان نازارباەۆ العا تارتقان ينتەگراتسيالىق يدەيالار مەملەكەتارالىق ىنتىماقتاستىقتى نىعايتۋ قادامدارىنا قۋات بەرۋدە. كۇنى كەشە استانالىق اقمولا وبلىسىنىڭ اكىمى قوسمان ايتمۇحامەتوۆتىڭ كانادانىڭ قازاقستانداعى توتەنشە جانە وكىلەتتى ەلشىسى ستيۆەن ميللەرمەن كەزدەسۋىندە وسى ماسەلەلەر كەڭىنەن تالقىعا سالىنىپ, ناقتى شەشىمدەر قابىلداندى. قابىلداۋدا ءوڭىر باسشىسى اۋىل شارۋاشىلىعى مەن ءوندىرىس سالاسىندا بىرلەسكەن جوبالاردى جۇزەگە اسىرۋدا كانادا اقمولا وبلىسىنىڭ سەنىمدى ارىپتەسى ەكەندىگىن اتاپ كورسەتتى. ماسەلەن, 2013 جىلى وبلىستىڭ كانادامەن تاۋار اينالىمى 35,7 ميلليون اقش دوللارىن قۇراپ, 2012 جىلمەن سالىستىرعاندا ەكى ەسە ارتىق كورسەتكىشكە قول جەتكىزىلدى. ايرىقشا كوڭىل قويارلىق جۇمىستىڭ ءبىرى رەتىندە, 2011-2013 جىلدار ارالىعىندا, ەتتى قارا مال شارۋاشىلىعىن دامىتۋ باعدارلاماسى شەڭبەرىندە, كانادادان 1781 باس اسىلتۇقىمدى مال جەتكىزىلگەنى اتاپ ءوتىلدى. قازىرگى تاڭدا وزىق تەحنولوگيا تالاپتارىندا كۇتىمگە الىنعان مالدان جوعارى ءونىم الىنۋدا. سوڭعى ەكى جىلدىڭ ءتول توگىمى ناتيجەسىندە قوسىمشا تابىندار قاتارى ايتارلىقتاي كوبەيدى. سونداي-اق, بۇگىنگى كۇنى اقمولا وبلىسىنىڭ اۋىل شارۋاشىلىعى تاۋار وندىرۋشىلەرىنىڭ بالانسىندا 693 بىرلىك كانادالىق وزىق تەحنيكا بار. ونىڭ جالپى قۇنى 14,8 ميلليارد تەڭگەنى نەمەسە 99,3 ميلليون اقش دوللارىن قۇراپ وتىر. كەزدەسۋگە قاتىسۋشى جەرگىلىكتى تاۋار وندىرۋشىلەر مەن اۋىل شارۋاشىلىعى ماماندارى اقمولا ءوڭىرى مەن كانادا عالىمدارى شورتاندى اۋدانىنداعى ا.ي.باراەۆ اتىنداعى عىلىمي-زەرتتەۋ ينستيتۋتىنىڭ بازاسىندا ازىقتىق سويانىڭ اۋدانداستىرىلعان سەلەكتسياسىن جاساۋدا بىرلەسىپ جۇمىس ىستەپ كەلە جاتقانىنا ريزاشىلىق ءبىلدىردى. تۇپكى ماقسات – قاتال كليماتتىق جاعدايدا ماڭىزدى ءونىمنىڭ 70-75 كۇندە ءپىسىپ-جەتىلۋىن قامتاماسىز ەتۋ بولىپ وتىر. ءوز كەزەگىندە, كانادانىڭ ەلىمىزدەگى توتەنشە جانە وكىلەتتى ەلشىسى ستيۆەن ميللەر بايىرعى ارىپتەستىك بايلانىستاردى نىعايتىپ,  ايماق شارۋالارى مەن كاسىپكەرلەر قىزمەتىن ورىستەتۋگە مۇددەلى ەكەندىگىن مالىمدەدى. سونىمەن بىرگە, ول مەملەكەتارالىق ينتەگراتسيانى دامىتۋ ماقساتىندا اقمولا وبلىسىنىڭ دەلەگاتسياسىن كاناداعا كەلىپ قايتۋعا شاقىردى. وبلىس اكىمى ەلشى ىقىلاسىنا راحمەت ايتىپ, اۋىل شارۋاشىلىعى مەن ءوندىرىس سالاسىنداعى ەڭ سوڭعى جوبالارمەن تانىسىپ, تاجىريبە الماسۋ ماقساتىندا كاناداعا ارنايى دەلەگاتسيا باراتىنىن ايتتى. باقبەرگەن امالبەك, «ەگەمەن قازاقستان». اقمولا وبلىسى.