امانات ۇعىمى – قازاق حالقىنىڭ ۇلتتىق كودىنىڭ كىلتى, ادامگەرشىلىكتىڭ تۇتقاسى, دۇنيەتانىمىنىڭ نەگىزى. امانات جولى – ادىلەتتىلىك پەن جاۋاپكەرشىلىك. ول – ار مەن نامىس, ءسوز بەن ءىستىڭ بىرلىگى, ادامگەرشىلىك پەن رۋحاني تازالىقتىڭ جولى. اتا-بابامىزدىڭ بىزگە قالدىرعان اماناتى – ەل مەن جەر تۇتاستىعى, ەل تاۋەلسىزدىگى, ءتىلى مەن ءدىنى, سالتى مەن ءداستۇرى. سول سەبەپتى ساياسي پارتيانىڭ «امانات» اتالۋى – قۇپتارلىق دۇنيە.
بۇرىنعى اتا-بابالارىمىز «اماناتقا قيانات جۇرمەيدى» دەگەن قاعيدانى ۇلت مەنتاليتەتىنىڭ تەمىرقازىعى ەتىپ ۇستانعان. بۇگىندە امانات ۇعىمىنىڭ ساياسي استارىنا دا نازار اۋداراتىن ۋاقىت جەتتى. ماسەلەن, بيلىكتىڭ حالىققا قىزمەت ەتۋى, حالىق مۇددەسىن جەكە باستىڭ مۇددەسىنەن قاشاندا جوعارى قويۋ, ادىلەتتىلىكتى, زاڭدى قوعام دامۋىنىڭ نەگىزى رەتىندە قاراۋ دا اتا-بابالارىمىزدىڭ اماناتى ەكەنىن ەستەن شىعارماعانىمىز ابزال. مىنە, Amanat پارتياسىنىڭ جاڭا كەزەڭدەگى باستى مىندەتتەرى. سونىمەن قاتار Amanat پارتياسى تسەنتريستىك سيپاتتا داميتىن پارتيا بولعاسىن ۇلتتىڭ وزىندىك ساناسىنىڭ وسۋىنە, مەملەكەتتىڭ تۇتاستىعىنا قاۋىپ توندىرەتىن سەپاراتيزمنىڭ, ەكسترەميزمنىڭ قانداي دا ءبىر كورىنىستەرىنە جول بەرمەۋدىڭ ماڭىزدىلىعىن ۇنەمى نازاردا ۇستاپ, وعان ساياسي تۇرعىدان باعا بەرۋگە دايىن بولۋى ءتيىس. وسى تۇرعىدان كەلگەندە, ساياسي مەنەدجمەنت اكادەمياسى الدىندا جاڭا سيپاتتاعى, جاڭا زامان تالابىنا ساي كەلەتىن ساياسي مەنەدجەرلەردى دايارلاۋ ماسەلەسى كۇن تارتىبىندە تۇر. ولاردىڭ بويىندا مەملەكەتتىڭ, ۇلتتىڭ, ەلدىڭ مۇددەسىن قورعاي الاتىن قاسيەتتەردى قالىپتاستىرۋ جانە بۇل جولدا ولاردىڭ ساياسي ءبىلىمى مەن سىني ويلاۋ مادەنيەتىن, كوممۋنيكاتيۆتىك قۇزىرەتتىلىگىن دامىتۋدىڭ ماڭىزى زور. جاريالىلىق قانداي دا بولسىن ساياساتتىڭ نەگىزى دەپ تانيتىن بولساق, دەپۋتاتتار قوعامدىق ويدى, پىكىردى قالىپتاستىرۋدىڭ لوكوموتيۆى, جەتەكشى كۇشى بولۋعا ءتيىس. ول ءۇشىن ونىڭ وزىندىك پىكىرى مەن ويى بولۋى قاجەت. بۇل جاعىنان كەلگەندە, بۇگىنگى دەپۋتاتتاردا كەشەگى قالىپتاسقان ستەرەوتيپتەر مەن ۇرەي, جالتاقتىق باسىم. دەمەك ولارعا رۋحاني جانە جۇيەلى ويلاۋ تۇرعىسىنان ارىلۋ قاجەتتىگى بايقالادى.
Amanat پارتياسىنىڭ الدىندا تۇرعان تاعى ءبىر مىندەت – ۇلتتىق يدەولوگيا ماسەلەسى. بيلىكتىڭ مۇراگەرى جەكە تۇلعا ەمەس, ونىڭ ۇلتتىق قۇندىلىقتارعا نەگىزدەلگەن يدەولوگياسى. تەك سوڭعىسى عانا قوعامنىڭ تۇراقتىلىعى مەن وركەنيەتتىلىگىن قامتاماسىز ەتە الادى. ونى كەشەگى قاڭتار وقيعاسى كورسەتىپ بەردى. يدەولوگيا جەكە ادامنىڭ ارمانى مەن قالاۋى ءۇشىن جۇمىس ىستەمەۋى كەرەك ەكەندىگىن ەندى سەزىنگەندەيمىز. جالپى, قانداي دا بولسىن پارتيانىڭ يدەولوگياسىز ءومىر ءسۇرۋى مۇمكىن ەمەس. دەمەك جاڭا پارتياعا جاڭا يدەولوگيا قاجەت. ول قوعامنىڭ پروگرەسسيۆتىك دامۋىنا ىقپال ەتە الاتىن, قوعامدى باستى قۇندىلىقتار نەگىزىندە توپتاستىراتىن, شىنايىلىق پەن ادىلەتتىلىككە, جاسامپازدىققا نەگىزدەلگەن تاۋەلسىز يدەولوگيا بولۋعا ءتيىس. ول اقپاراتتىق قوعام جاعدايىندا سىرتقى دەسترۋكتيۆتىك كۇشتەرگە, گەوساياسي جاعدايدا اگرەسسيۆتىك سيپاتتاعى باسقا مەملەكەتتىڭ يدەولوگيالارىنا تويتارىس بەرە الاتىنداي يدەولوگيا بولۋى كەرەك. يدەولوگيالىق توقىراۋدى ەڭسەرۋ, وعان جاڭا قازاقستان جاعدايىندا جاڭاشا لەپ بەرۋ – Amanat پارتياسى الدىنداعى مىندەتتىڭ ءبىرى.
Amanat پارتياسى ۇلتتىق بايلىقتى ادىلەتتىلىك تۇرعىسىنان قورعاۋعا اتسالىسۋى كەرەك. ۇلتتىق بايلىق تەك ەكونوميكالىق ۇعىم عانا ەمەس. ۇلتتىق بايلىققا رۋحاني-مادەني, ينتەللەكتۋالدىق, ادامي رەسۋرستاردى دا جاتقىزۋعا بولادى. وسى تۇرعىدان كەلگەندە پارتيا الدىندا اتقارىلاتىن قىرۋار شارۋا تۇر. اسىرەسە ءبىلىم, عىلىم, دەنساۋلىق, مادەنيەت, ونەر, سپورت سالالارىنداعى ماسەلەلەر پارتيا نازارىنان تىسقارى قالماۋى كەرەك. ۇلتتىڭ ءتىلى مەن ءدىنى, ءدىلى دە – ۇلتتىڭ بايلىعى. قىسقاسى, جاڭا پارتيا ۇلتتىق بايلىققا دەگەن قوعامداعى تۇتىنۋشىلىق كوزقاراستى جويۋدى العا قويۋى قاجەت. ول ءۇشىن ءوزى دە جاتتاندى ىرعاققا تەربەلىپ, بارعا ءماز بولىپ وتىرا بەرمەي, سوزدەن ىسكە كىرىسۋى كەرەك. سوندا عانا Amanat پارتياسى اتىنا زاتى ساي بولماقشى.
تولەۋعالي بورىباەۆ,
قازاقستان رەسپۋبليكاسى جوعارعى سوتى
جانىنداعى سوت تورەلىگى
اكادەمياسىنىڭ
پروفەسسورى, فيلوسوفيا عىلىمدارىنىڭ دوكتورى
