«مۇنىڭ ۇستىنە لۋكيانوۆكا اۋدانىندا, جانىمىزدا ءتۇنى بويى اۆتومات داۋىسى ەستىلىپ تۇردى. بۇكىل ازاماتتارىمىز جانىمىزدا, جەرتولەدە بولدى. قازاقستاندىقتاردىڭ اراسىندا زارداپ شەككەندەر جوق. مەنىڭشە, ەلشىلىككە ەشكىم تيىسپەيدى. ەڭ باستىسى – قاڭعىعان سنارياد ءتيىپ كەتپەسە بولدى», دەدى دارحان قالەتاەۆ.
سونىمەن قاتار ول قازىرگى ۋاقىتتا قازاقستان ەلشىلىگىن ەۆاكۋاتسيالاۋ ماسەلەسى قاراستىرىلىپ جاتپاعانىن ايتتى.
«ەگەر قازىر ءبىز كەتىپ قالساق, وتانىنا ورالىپ ۇلگەرمەگەن قازاقستاندىقتار نە ىستەيدى؟ ءيا, قازىر دە ماسەلەن اۆتوبۋستاردى جونەلتۋگە 1 ساعات ۋاقىت قالعاندا ادامدار قوڭىراۋ شالىپ, نە ىستەۋ كەرەكتىگىن سۇراپ جاتادى. ويتكەنى, ادامدار ءارتۇرلى وڭىردە ءجۇر. كوپشىلىگى, ءتىپتى بىزگە, كيەۆكە دە جەتە الماي وتىر. ءبىز كەتىپ قالساق, ولاردىڭ كۇنى نە بولماق؟», دەدى قازاقستان ەلشىسى.
