جيىنعا باس پروكۋروردىڭ مىندەتىن اتقارۋشى بەرىك اسىلوۆ, ادام قۇقىقتارى جونىندەگى ۋاكىل ەلۆيرا ءازىموۆا مەن رەسپۋبليكالىق ادۆوكاتتار القاسى توراعاسىنىڭ ورىنباسارى يگور ۆرانچەۆ, سونداي-اق قۇقىق قورعاۋ جانە ارنايى ورگانداردىڭ باسشىلارى قاتىستى.
ب.اسىلوۆ مەملەكەت باسشىسىنىڭ تاپسىرماسى بويىنشا قايعىلى وقيعانىڭ سەبەپتەرى مۇقيات تەرگەپ-تەكسەرىلىپ جاتقانىن اتاپ ءوتتى. «قازىر ءبىز بەيبىت ميتينگىلەردى ءارتۇرلى كۇشتەردىڭ پايدالانعانىن ناقتى بىلەمىز. ۇيىمداستىرۋشىلار دەسترۋكتيۆتى جانە قىلمىستىق توپتاردى تارتىپ, قارۋلاندىرىپ, ولاردىڭ ارەكەتتەرىن ۇيلەستىرگەن. تارتىپسىزدىكتەر ازاماتتارعا قارسى زورلىق-زومبىلىقپەن, قيراتۋمەن جانە توناۋمەن قاتار جۇرگەن. ولاردىڭ ماقساتى حالىقتى قورقىتىپ, بيلىكتىڭ جۇمىسىنا توسقاۋىل قويۋ بولعان», دەدى ول.
باس پروكۋراتۋرانىڭ قىلمىستىق قۋدالاۋ قىزمەتىنىڭ باستىعى سەرىك شالاباەۆ ءوز كەزەگىندە: «جاپپاي تارتىپسىزدىكتەر كەزىندە جانە ودان كەيىن ۇستالعان تۇلعالاردىڭ قۇقىقتارىنىڭ ساقتالۋىن باس پروكۋراتۋرا ەرەكشە باقىلاۋدا. بۇگىندە ازاپتاۋ جانە قىزمەتتىك وكىلەتتىكتى اسىرا پايدالانۋ بويىنشا 203 قىلمىستىق ءىس قوزعالعان, ولاردىڭ ىشىندەگى ەڭ رەزونانستىلارىن ارنايى پروكۋرورلار تەرگەۋدە. سوتقا دەيىنگى تەرگەپ-تەكسەرۋ بارىسىندا ۇستالعاندارعا قاتىستى زاڭسىز تەرگەۋ ادىستەرىن قولداندى دەگەن كۇدىكپەن 9 قىزمەتكەر انىقتالىپ, ۇستالدى», دەدى. س.شالاباەۆتىڭ ايتۋىنشا, جەدەل-تەرگەۋ توپتارى تەرروريزم اكتىلەرى, كىسى ءولتىرۋ, قارۋ ۇرلاۋ جانە جاپپاي تارتىپسىزدىكتەر بويىنشا 3 502 قىلمىستىق ءىستى تەرگەۋدە. 737 كۇدىكتى تەرگەۋ يزولياتورىندا قاماۋدا.
سونداي-اق ول بۇلتارتپاۋ شاراسىن وزگەرتۋمەن 307 ادام, ونىڭ ىشىندە كامەلەتكە تولماعان 27 ادام بوساتىلعانىن, ودان باسقا كامەلەتكە تولماعان 2 ادام قاماۋدا قالعانى تۋرالى ايتتى. بۇگىندە بۇلتارتپاۋ شاراسىن وزگەرتۋ تۋرالى ارنايى پروكۋرورلاردان تاعى 22 ادامعا قاتىستى ماتەريالدار تۇسكەن. «قاڭتار وقيعاسىنا قاتىستى ىستەر بويىنشا 1,5 مىڭعا جۋىق وقيعا ورىندارىن قاراۋ جۇرگىزىلدى, 1 500-دەن استام سوت-مەديتسينالىق ساراپتامالار تاعايىندالىپ, جۇرگىزىلۋدە. پروكۋراتۋرا ورگاندارىنا تەرگەۋدىڭ زاڭسىز ادىستەرى مەن ازاپتاۋدى قولدانۋ تۋرالى 283 ارىز ءتۇستى. وعان كىنالى قۇقىق قورعاۋ ورگاندارىنىڭ قىزمەتكەرلەرى زاڭ الدىندا قاتاڭ جاۋاپقا تارتىلادى», دەدى س.شالاباەۆ.
قاداعالاۋ ورگانى بارلىق جاعدايدا داۋسىز دالەلدەرگە نەگىزدەلگەن وبەكتيۆتى جانە بەيتاراپ باعا بەرىلىپ, ازاماتتاردىڭ كونستيتۋتسيالىق قۇقىقتارىنىڭ قولسۇعىلماۋشىلىعى قامتاماسىز ەتىلەتىنىنە سەندىردى. پروكۋرورلار تەرگەۋ يزولياتورلارى مەن باسقا دا قىزمەتتىك ءۇي-جايلاردى كۇن سايىن, ونىڭ ىشىندە تۇنگى ۋاقىتتا جانە دەمالىس كۇندەرى تەكسەرۋدى جالعاستىرادى.
بۇل جۇمىس ۇلتتىق الدىن الۋ تەتىگىنىڭ قاتىسۋشىلارىمەن جانە قۇقىق قورعاۋشىلارمەن تىعىز بايلانىستا جۇرگىزىلەدى.
