تاراز قالاسىندا تاۋنحاۋستار قۇرىلىسى باستالاتىن بولدى. بۇل تۋرالى وبلىس اكىمى كارىم كوكىرەكباەۆتىڭ توراعالىعىمەن وتكەن جينالىستا ايتىلدى.
«تاۋنحاۋس» دەگەن نە؟ العاش رەت سوناۋ ءحىح عاسىردا ۇلىبريتانيادا سالىنعان قۇرىلىستاردىڭ ماعىناسىن قازاق تىلىنە سوزبە-ءسوز اۋدارساق «قالالىق ۇيلەر» بولىپ شىعادى. ولار كەيىن اقش, كانادا ەلدەرىندە ەرەكشە كوپ قولعا الىنا باستادى. ال رەسەي ەلىندەگى تاۋنحاۋستار 1995 جىلى ماسكەۋ ماڭىنداعى نوۆگورود, ترويتسك قالالارى مەن نوۆىە رجاۆكي پوسەلكەسىندە سالىندى.
حالىقتىڭ كوزى ۇيرەنىپ قالعان كوپ قاباتتى تۇرعىن ۇيلەردەن تاۋنحاۋستاردىڭ ەرەكشەلىگى نەدە؟ ول نەبارى ەكى قاباتتى جانە ءار پاتەردىڭ ءوز پودەزدەرى بولادى. سونداي-اق, گاراجى, تاعى باسقا دا تۇرمىستىق قاجەتتىلىكتەرى ەسكەرىلۋى مۇمكىن. تارازداعى تاۋنحاۋستار بۇل تالاپتارعا جاۋاپ بەرە مە, جوق پا, ونى ۋاقىت كورسەتەدى. ەڭ باستىسى, «قولجەتىمدى باسپانا-2020» مەملەكەتتىك باعدارلاماسى اياسىندا قولعا الىنباق تاۋنحاۋستار تۇرعىندار ءۇشىن قولجەتىمدى بولماق. جانە ءۇستىمىزدەگى جىلدان باستاپ «تام قۇرىلىس» جشس كانادالىق تەحنولوگيامەن 130 وتباسىعا ارنالعان تاۋنحاۋستار قۇرىلىسىن جۇرگىزە باستايدى. وبلىس اكىمىنىڭ ولارعا قۇرىلىستى باستايتىن جەر ءماسەلەسىن جەدەل تۇردە شەشىپ بەرۋى دە ۇيدەن ۇمىتتىلەردى ريزا ەتىپ وتىر.
سونىمەن بىرگە, «قازاقستان يپوتەكالىق كومپانياسى» يۇ» اق تاراز قالاسىنىڭ «بايتەرەك» شاعىن اۋدانىنان كوپقاباتتى 2 ءۇيدىڭ قۇرىلىسىن جۇرگىزبەك. وبلىس باسشىسىنىڭ وسىنداي تىڭ باستاما, سونى شەشىمدەرىنىڭ ناتيجەسىندە جىل سوڭىنا دەيىن 200-گە جۋىق تارازدىق وتباسى قونىس تويىن تويلايدى دەپ كۇتىلۋدە.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.
سۋرەتتە: شەتەلدەگى تاۋنحاۋستار وسىنداي.
سۋرەتتە: شەتەلدەگى تاۋنحاۋستار وسىنداي.
