جىل باسىندا قازاقستان حالقى قوعامداعى تۇراقتىلىقتىڭ, بىرلىكتىڭ, ازاماتتىق كەلىسىم مەن بەيبىتشىلىكتىڭ باعا جەتپەس قۇندىلىقتارىن ەسكە تۇسىرگەن قايعىلى وقيعالاردى باستان كەشىردى. ءبىز ارقايسىسىمىز تەررورلىق ارەكەتتىڭ, ساياسي جانە قوعامدىق حاوستىڭ, وحلوكراتيانىڭ جانە ەڭ باستىسى – ەلىمىزدىڭ قاۋىپسىزدىگىنە, تۇراقتىلىعىنا, ەگەمەندىگى مەن تاۋەلسىزدىگىنە تونگەن قاۋىپ-قاتەردىڭ شەگىنە جەتكەنىن سەزىندىك.
حالقىمىزدىڭ, ازاماتتارىمىزدىڭ – ءوز وتانىنىڭ ناعىز پاتريوتتارىنىڭ باسىم كوپشىلىگىنىڭ ەرىك-جىگەرىنىڭ, دانالىعى مەن ازاماتتىق جاۋاپكەرشىلىگىنىڭ ارقاسىندا عانا ءبىز تاريحىمىزدىڭ قيىن-قىستاۋ ءساتىن بىرگە ەڭسەردىك.
ءبىز «قاسىرەتتى قاڭتار» ساباقتارىمەن بىرگە ەل مەن ونىڭ حالقى ءومىرىنىڭ بارلىق سالالارىندا تەرەڭ ەكونوميكالىق, الەۋمەتتىك جانە ساياسي وزگەرىستەردىڭ ءپىسىپ-جەتىلۋ قاجەتتىلىگىن ۇعىندىق.
بۇگىندە اتالعان باعىتتار بويىنشا بارلىق مەملەكەتتىك اپپاراتتا – ۇكىمەتتە, پارلامەنتتە, ەل وڭىرلەرىندە قارقىندى جۇمىستار اتقارىلۋدا. بۇل جاسامپازدىق قىزمەتكە ازاماتتىق قوعام ينستيتۋتتارى – ساياسي پارتيالار, قوعامدىق ۇيىمدار, قازاقستان حالقى اسسامبلەياسى, بۇقارالىق اقپارات قۇرالدارى, ازاماتتىق بەلسەندىلەر دە قوسىلدى. بەلسەندى ساراپتامالىق تالقىلاۋلار ءوتىپ جاتىر, بۇقارالىق اقپارات قۇرالدارى بۇكىل قوعام, قازاقستاننىڭ ءاربىر ازاماتى كۇتەتىن وزگەرىستەردى قالت جىبەرمەۋگە تىرىسۋدا. وسى تۇرعىدان العاندا, جاڭا قازاقستاندى قۇرۋ باعىتىن بۇكىل حالىق بولىپ قولداۋ – بۇل جاڭا كوكجيەكتەرگە جول اشاتىن بارشا حالىقتىڭ تەرەڭ الەۋمەتتىك سۇرانىسى.
ءاربىر جاۋاپتى ازامات بۇگىندە جاڭا تاسىلدەر مەن قابىلدانىپ جاتقان شارالاردىڭ دۇرىستىعىنا نىق سەنىمدى, ويتكەنى ولار ءبىزدىڭ حالقىمىزدىڭ ىرگەلى ۇمتىلىستارى مەن قاجەتتىلىكتەرىنە – ءوزىنىڭ بولاشاعىنا دەگەن سەنىمدىلىگىنە, الەۋمەتتىك قورعالۋىنا, تۇرعىن ۇيگە, بىلىمگە, مەديتسيناعا, جۇمىسقا قولجەتىمدىلىكپەن قامتاماسىز ەتىلۋىنە نەگىزدەلگەن.
بۇگىندە ءبارىمىز بىرگە وسى باعىتتا حالىققا, ازاماتتارىمىزدىڭ ارقايسىسىنا قاجەتتى العاشقى قادامداردى جاساپ جاتىرمىز. سىبايلاس جەمقورلىققا, پاراقورلىققا, قوعامدىق يگىلىكتەردىڭ ادىلەتسىز بولىنۋىنە سەنىمدى توسقاۋىل قوياتىن, باسەكەلەستىك پەن ءتيىمدى بيزنەس ءۇشىن كەڭىستىك اشاتىن باسقا دا جاڭا جۇيەلى شارالار, سونىڭ ىشىندە ساياسي شارالار بولاتىنىنا سەنىمدىمىز.
بىراق بۇل ءۇشىن زاڭدار, ەرەجەلەر مەن ينستيتۋتتار عانا قاجەت ەمەس, سونىمەن قاتار ءبىزدىڭ قوعامدىق سانامىزدى وزگەرتۋدىڭ, حالقىمىزعا ءتان ءوزىن ءوزى باعالاۋدىڭ, ەڭبەكتىڭ, قاراپايىمدىلىقتىڭ جانە زاڭعا باعىنۋدىڭ ءداستۇرلى قۇندىلىقتارىن ءسىڭىرۋىمىز قاجەت, ۇلى ابايدىڭ وسيەتتەرىنە قايتا ورالىپ, ونىڭ «دۇشپاندىق – كەيىس ەمەس, نە كۇندەستىك, نە تىنىش وتىرا الماعاندىق» دەگەن ويلى سوزدەرىن ەسكە الۋىمىز قاجەت.
قاڭتارداعى وقيعالار قوعامنىڭ جاسامپازدىق تۇرعىدا جاڭارۋىنا, تازارۋىنا جانە ادىلەتتىلىك ۇعىمدارىنا ورالۋعا, جاقسىلىق پەن جاماندىقتى اجىراتۋعا, حالىققا قىزمەت ەتۋدىڭ كاتەگوريالىق يمپەراتيۆىنە سەرپىن بەردى. سوندىقتان ءبىز ءومىرىن قيىپ, وسى كۇندەرى ەلىمىزدى, حالقىمىزدى جانە تاۋەلسىزدىگىمىزدى قورعاعان بارلىق ازاماتتارعا العىس ايتۋ كۇنىندە ايرىقشا قۇرمەت ءبىلدىرىپ, ولاردى ەسكە الۋىمىز وتە ماڭىزدى.
قازاقستان ازاماتتارىن جانە كونستيتۋتسيالىق ءتارتىپتى قورعاي وتىرىپ, اۋىر سىناق كۇندەرى وزدەرىنىڭ قىزمەتتىك پارىزىن ورىنداپ جانە ازاماتتىق ەرلىك تانىتىپ تەرروريستەر جولىن كەسكەندەرگە ءبىز قۇرمەت كورسەتەمىز جانە العىسىمىزدى بىلدىرەمىز.
حالقىنىڭ تۇراقتى جانە قاۋىپسىز قازاقستاندا ءومىر ءسۇرۋ قۇقىعى ءۇشىن قۇقىقتىق ءتارتىپ ورگاندارىنىڭ 19 قىزمەتكەرى مەن اسكەري قىزمەتشىلەر ءوز ومىرلەرىن قيدى. بۇگىن ءبىز ولاردىڭ جارقىن ەرلىك ىستەرى الدىندا باسىمىزدى يەمىز. سوندىقتان دا العىس ايتۋ ۇعىمى – ماڭىزدى ازاماتتىق مانگە جانە الەۋمەتتىك جۇكتەمەگە, تەرەڭ جانە جان-جاقتى سيپاتقا يە بولىپ وتىر.
ءبىز وسى قايعىلى كۇندەردە, قاۋىپكە قاراماستان, وزدەرىنىڭ كاسىبي بورىشتارىن سوڭىنا دەيىن ورىنداعان ازاماتتارعا العىس ايتامىز جانە قۇرمەت كورسەتەمىز.
ءبىز ءورت ءسوندىرۋ, جالىنداعان تەلەستۋديالاردان اقپاراتپەن قامتاماسىز ەتۋ, جارالىلاردى قۇتقارۋ, ءبىزدىڭ ۇيلەرىمىزدى جارىق, سۋ, جىلۋمەن قامتاماسىز ەتۋ ءۇشىن بارلىق مۇمكىندىكتەر مەن رەزەرۆتەردى پايدالانعان ءورت سوندىرۋشىلەر, رەسپۋبليكالىق جەتەكشى تەلەارنالاردىڭ جۋرناليستەرى, جەدەل جاردەم دارىگەرلەرى, ستراتەگيالىق نىسانداردىڭ قىزمەتكەرلەرى تۋرالى ايتىپ وتىرمىز.
ەلىمىزدىڭ بارلىق وڭىرلەرىندە ازاماتتاردى ىزدەستىرۋ, پسيحولوگيالىق جانە گۋمانيتارلىق كومەك كورسەتۋ جۇمىستارىن جەدەل جۇرگىزىپ, بلوك-بەكەتتەرگە, گوسپيتالدارعا, الەۋمەتتىك قورعالماعان ازاماتتارعا ىستىق تاماق جەتكىزگەن ۆولونتەرلەر شىنايى العىس بىلدىرۋگە لايىقتى.
قايىرىمدىلىق, ۆولونتەرلىك اكتسيالارىنا قازاقستان حالقى اسسامبلەياسىنىڭ, ەتنومادەني, جاستار, ۆولونتەرلىك ۇيىمدارىنىڭ, قوعامدىق قوزعالىستاردىڭ, كلۋبتاردىڭ جانە باسقا دا قوعامداستىقتاردىڭ مىڭداعان مۇشەلەرى, سونداي-اق حالقىمىزدىڭ مىزعىماس بىرلىگىنىڭ, ونىڭ ىنتىماقتاستىعى مەن ءوزارا قامقورلىعىنىڭ سيمۆولىنا اينالعان جاناشىر ازاماتتار قاتىستى.
زارداپ شەككەندەر ءۇشىن قان تاپسىرعان دونورلار ۇلكەن ريزاشىلىققا لايىقتى.
ولاردىڭ بارلىعى حالقىمىزدىڭ ناعىز پاتريوتتارى!
مىنە, سوندىقتان دا العىس ءبىلدىرۋ ۇعىمى مەيىرىمدىلىك, باتىلدىق پەن باتىرلىق, ازاماتتىق ەرلىگى ءۇشىن ءوز وتانداستارىنا قوعامنىڭ ءادىل ريزاشىلىعىنىڭ ماعىناسىن قامتيدى. ارينە, جاعدايدى تۇراقتاندىرۋ شارالارىن قولداعان, پاتريوتيزم مەن بىرلىك تانىتقان ازاماتتارىمىز شىنايى العىسقا لايىقتى.
بۇل ازاماتتىق قاتىستىلىق ۇلتتىڭ تەرەڭ گەنەتيكالىق جادىنا ەنە وتىرىپ, حالقىمىزدى, بىرلىگىمىزدى نىعايتا تۇسەتىن قيىنشىلىقتاردى بىرلەسىپ ەڭسەرۋدىڭ ماڭىزدى ساتىنە اينالدى. بۇل جونىندە «جول قۋعان قازىناعا جولىعار, داۋ قۋعان پالەگە جولىعار» دەگەن قازاق ماقالى دا بار.
جاڭا قازاقستاندى قۇرا وتىرىپ, ءبىز قوعامدا ءوزارا كومەك كورسەتۋدى جانە حالىقتىڭ مىزعىماس بىرلىگىن كەڭەيتۋگە باعىتتالعان باستاپقى داستۇرلەردى, قۇندىلىقتاردى ءبىرىنشى ورىنعا قويامىز.
ءبىزدىڭ ورتاق يدەيامىز – «جاڭا قازاقستان» جوعارى ادامي قاسيەتتەرگە: ازاماتتىق باتىلدىققا, ءوز ءىس-ارەكەتتەرى ءۇشىن جاۋاپكەرشىلىككە جانە ورتاق ماقسات جولىنداعى ۇيىمشىلدىققا نەگىزدەلگەن.
مارات ءازىلحانوۆ,
قحا توراعاسىنىڭ ورىنباسارى – حاتشىلىق مەڭگەرۋشىسى
