نۇر-سۇلتاندا روزا باعلانوۆانىڭ 100 جىلدىق مەرەيتويىنا ارنالعان ءانشىنىڭ ءومىر جولىنان سىر شەرتەتىن كورمە ۇيىمداستىرىلدى. سونداي-اق روزا باعلانوۆاعا ارنالعان ءمۇسىن تانىستىرىلدى. ونەر تۋىندىسىنىڭ اۆتورى – گيپەررەاليست ءمۇسىنشى ايدوس ەسماعامبەتوۆ.
مادەنيەت جانە سپورت ۆيتسە-ءمينيسترىنىڭ حابارلاۋىنشا, ءانشىنىڭ مەرەيتويىنا ارنالعان ءىس-شارالار جوسپارى بەكىتىلدى.
«روزا باعلانوۆانىڭ مەرەيتويىنا ارنالعان جوسپار 41 تارماقتان تۇرادى. قازاقستان وڭىرلەرىندە 400-گە جۋىق ءىس-شارا وتكىزۋ جوسپارلانعان, ونىڭ ىشىندە رەسپۋبليكالىق دەڭگەيدە 25 ءىس-شارا وتكىزىلەدى. ال حالىقارالىق دەڭگەيدە 5 ءىس-شارا وتكىزۋ كوزدەلگەن», دەدى نۇرقيسا داۋەشوۆ.
ءانشىنىڭ ءومىرى مەن شىعارماشىلىق جولىنا ارنالعان كورمە «قازاقكونتسەرت» مەملەكەتتىك كونتسەرت ۇيىمى عيماراتىندا اشىلدى.
«كورمەدە اتى اڭىزعا اينالعان ءانشىنىڭ ونەردەگى العاشقى قادامدارى مەن زور جەتىستىكتەرى, سوعىس جىلدارىنداعى قايسارلىعى, ازاماتتىق بەلگىسى, ءومىرىنىڭ جارقىن ساتتەرى كورىنىس تاپتى. جوسپار بويىنشا 1 ناۋرىزدا قازاقستاننىڭ ورتالىق كونتسەرت زالىندا روزا باعلانوۆانىڭ 100 جىلدىق مەرەيتويىن مەرەكەلەۋدىڭ رەسمي شاراسى, ونەر شەبەرلەرىنىڭ كونتسەرتى وتەدى. ودان كەيىن نۇر-سۇلتان, قىزىلوردا, الماتى قالالارى جانە يۋنەسكو-مەن بىرلەسىپ پاريجدە, ماسكەۋ قالالارىندا مەرەكەلىك كونتسەرت وتكىزۋ جوسپارلانعان», دەدى ۆيتسە-مينيستر.
سونىمەن قاتار نۇر-سۇلتان قالاسىنداعى مۋزىكا مەكتەپتەرىنىڭ بىرىنە روزا باعلانوۆانىڭ ەسىمىن بەرۋ جانە ءانشىنىڭ ءبيۋستىن ورناتۋ جوسپارلانىپ وتىر.
قىزىلوردا قالاسىنداعى ورتالىق الاڭدا بوي كوتەرگەن روزا باعلانوۆانىڭ ەسكەرتكىشى الداعى ۋاقىتتا اشىلادى. ال 2022 جىلدىڭ ءبىرىنشى توقسانىندا الماتى قالاسىندا قالداياقوۆ پەن تولە بي كوشەلەرىنىڭ قيىلىسىندا روزا باعلانوۆانىڭ ەسكەرتكىشى ورناتىلادى.
«2021 جىلى يۋنەسكو-نىڭ 41-ءشى باس كونفەرەنتسياسىنىڭ ارنايى قارارىمەن 2022-2023 جىلدارعا ارنالعان ەستەلىك داتالار كۇنتىزبەسىنىڭ ءتىزىمى قابىلدانىپ, وعان قازاقستاننىڭ ۇسىنىسىمەن ءانشى روزا باعلانوۆانىڭ 100 جىلدىعى ەندى», دەپ حابارلادى داۋەشوۆ.
سونداي-اق وڭىرلەردە جىل بويى روزا باعلانوۆانىڭ مەرەيتويىنا ارنالعان فەستيۆالدەر, كونتسەرتتەر, كەشتەر, سەمينارلار, كورمەلەر, كونفەرەنتسيالار وتكىزىلەدى.
ايتا كەتەيىك, «قازاقكونتسەرت» عيماراتىندا 1, 3 جانە 6 ناۋرىزدا «قازاقتىڭ قاھارمان قىزى», «ارناۋ», «قازاق دەگەن حالىقتىڭ ەركەسىمىن» كونتسەرتى وتەدى.
1 ناۋرىزدا وتەتىن كونتسەرتتە ەلىمىزدىڭ تانىمال انشىلەرى, جاس انشىلەر, قىرعىزستان, وزبەكستان, بەلارۋس مەملەكەتتەرىنەن كەلگەن ارتىستەر جانە روزا باعلانوۆانىڭ نەمەرەسى ءۇربيبى ساحنادا ونەر كورسەتەدى.
