شەشەنستاندا ەنەرگەتيكالىق سۋسىن ساتۋعا تىيىم سالىندى

شەشەنستان رەسپۋبليكاسىنىڭ پارلامەنتى ەنەرگەتيكالىق سۋسىندار ساتۋ مەن تاراتۋعا زاڭدى تۇردە ايىپپۇل ەنگىزدى. بۇل تۋرالى يتار-تاسس تىلشىسىنە رەسپۋبليكا جيىنى ءباسپاسوز قىزمەتى حابارلادى. وتىرىستا ەنەرگەتيكالىق سۋسىندى بۇكىل رەسەي تەرريتورياسىندا ساتۋعا تولىق تىيىم سالۋ جونىندە رەسەي فەدەراتسياسى مەملەكەتتىك دۋماسىنا ۇسىنىس بەرۋ جونىندە شەشىم قابىلداندى. «بۇگىن پارلامەنت «شەشەن رەسپۋبليكاسىنىڭ «الكوگولسىز جانە ءالسىز الكوگولدى سالقىنداتۋشى سۋسىنداردى بولشەك ساۋدا سالاسىندا ساتۋ مەن تاراتۋدى شەكتەۋ» تۋرالى زاڭىنا وزگەرىستەر ەنگىزۋ تۋرالى» زاڭ جوباسىن قارادى. تۇزەتۋ اتالمىش زاڭدى بۇزعانداردان اكىمشىلىك جاۋاپكەرشىلىك تالاپ ەتۋگە مۇمكىندىك بەرەدى», - دەپ اتاپ ءوتتى ءباسپاسوز قىزمەتى. شەشەنستان اۋماعىندا ەنەرگەتيكالىق سۋسىنداردى ساتۋ مەن تاراتۋعا سالىناتىن ايىپپۇلداردىڭ كولەمى 1,5 مىڭ رۋبلدەن 2 مىڭ رۋبلگە دەيىن بارادى. بۇل مولشەر لاۋازىمدى تۇلعالار ءۇشىن 3 مىڭنان 4 مىڭعا دەيىنگى ارالىقتى قامتيدى. بۇعان قوسا, زاڭدى تۇلعالار ءۇشىن 30-40 مىڭ رۋبل كولەمىندە ايىپپۇل سالىپ, تاۋارلاردى تاركىلەۋ قاراستىرىلعان. مۇرات ايتقوجا. دەرەككوز: يتار-تاسس. فوتو: يتار-تاسس/گريگوري سىسوەۆ.