400 بەتتەن تۇراتىن اۋقىمدى ەڭبەك قازاقستان, ازەربايجان, قىرعىزستان, وزبەكستان, تۇرىكمەنستان جانە تۇركيا ەلدەرىنىڭ عالىمدارى قاتىسقان «قازاق ءتىل عىلىمىنا تاريحي شەگىنىس» اتتى حالىقارالىق عىلىمي كونفەرەنتسيا اياسىندا تانىستىرىلدى.
«ۇلت ۇستازى» اتتى احمەتتانۋداعى ىرگەلى كىتاپتىڭ اۆتورى, فيلولوگيا عىلىمدارىنىڭ كانديداتى, ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ پروفەسسورى سەرىكباي وسپان ۇلى دا ا.بايتۇرسىن ۇلى دۇنيەگە كەلگەن اۋىلدا تۋىپ-وسكەن. مەكتەپ قابىرعاسىندا ءجۇرىپ-اق كوپ دۇنيەنى كوكەيىنە ءتۇيىپ وسكەن عالىم ۇلت اعارتۋشىسىنىڭ ءومىرىن زەرتتەي ءجۇرىپ, قالىڭ وقىرمانعا ارناپ بۇعان دەيىن 56 ماقالا جاريالاعان بولاتىن.
– احمەت بايتۇرسىن ۇلىنىڭ ءومىرى مەن ونىڭ شىعارماشىلىعى جايىندا حالىق ءالى دە تولىق بىلمەيدى. مىسالى, ۇلتىنىڭ ساۋاتىن اشۋ ماقساتىندا توتە جازۋدى تاپقان وسى كىسى. احاڭ جايىندا ايتىلار ءسوز كوپ. سوندىقتان الەمدىك دەڭگەيدە اتالىپ ءوتىپ جاتقان 150 جىلدىق مەرەيتويىنا وراي, «ۇلت ۇستازى» دەگەن كىتابىمدى دايىندادىم. بۇل ەڭبەك – مەنىڭ ومىرلىك ىزدەنىسىمنىڭ جەمىسى, – دەيدى كىتاپ اۆتورى, اقىن, پروفەسسور سەرىكباي وسپانوۆ.
جيناقتا اعارتۋشى عالىمنىڭ ءومىرى مەن شىعارماشىلىعىنان بولەك, اقىندىعى, سىنشىلىعى جانە ومىرىنە ىقپال ەتكەن تۇلعالار جايى ءسوز قوزعالادى. سونداي-اق ەكى تاراۋدان تۇراتىن كىتاپقا بايتۇرسىن ۇلى تۋرالى شەتەلدىك عالىمداردىڭ وي-پىكىرى مەن احمەتتانۋشىلاردىڭ ەڭبەگى دە توپتاستىرىلىپ وتىر.
اتالعان كىتاپتىڭ جارىققا شىعۋىنا الماتى قالاسى اكىمدىگى مەن «تۇركى مادەنيەتى» حالىقارالىق ۇيىمى تىكەلەي قولداۋ بىلدىرگەن.
