ءۇمىتتى كوكتەم, تياناقتى ازىرلىك

شارۋا ادامى قاشاندا اۋا رايىنىڭ قاس-قاباعىن قارايلاي جۇرەتىنى بەلگىلى. اسىرەسە, ديقان قاۋىمى. سوڭعى جىلدارى قۋاڭشىلىقتىڭ قۇرىعىنان شىعا الماي جۇرگەن اقتوبەلىك ەگىنشىلەر بيىلعى كوكتەمنەن ۇلكەن ءۇمىت كۇتىپ وتىر. ونىڭ دا رەتى بار, بىلتىر كۇز جاۋىن-شاشىندى بولدى, قىستا قار مول ءتۇستى. «قازگيدرومەت» رمك دەرەكتەرى بويىنشا, وتكەن جىلدىڭ قازان ايى مەن ۇستىمىزدەگى جىلدىڭ ناۋرىز ايى ارالىعىندا وبلىس بويىنشا ورتاشا 151,2 مم. ىلعال تۇسكەن. بۇل 2012 جىلعى دەڭگەيدەن 60 پايىزعا جوعارى. ىلعالدىڭ مولدىعى جەرى قۇنارلىلاۋ مارتوك, ايتەكە بي, حرومتاۋ اۋداندارىندا بايقالادى. مۇنىڭ ءوزى ديقان قاۋىمىنىڭ بويىندا مول استىققا دەگەن سەنىم ۇيالاتادى. ۇستىمىزدەگى جىلى اقتوبەلىك ەگىنشىلەر 667,6 مىڭ گەكتارعا اۋىل شارۋاشىلىعى داقىلدارىن سەپكەلى وتىر. ونىڭ 505,5 مىڭ گەكتارى ءداندى داقىلدار, ال, 107,5 مىڭ گەكتارى مال ازىقتىق داقىلدار. سونداي-اق, 45 مىڭ گەكتارعا مايلى داقىلدار, 5,3 مىڭ گەكتارعا كارتوپ جانە 3,9 گەكتارعا باقشا داقىلدارىن ءوسىرۋ كوزدەلۋدە. جالپى, سوڭعى جىلدارى ەگىس القاپتارىنىڭ قۇرىلىمىن ءارتاراپتاندىرۋ ناتيجەسىندە مال ازىقتىق داقىل القاپتارىن كەڭەيۋگە باعىت ۇستالۋدا. 2011 جىلى بيداي القابى جالپى ەگىس كولەمىندە 71 پايىزدى قۇراسا, وتكەن جىلى 58 پايىز بولدى. ال مال ازىقتىق داقىلدار القابى وسى كەزەڭدە تيىسىنشە 75,5 مىڭ گەكتارعا ورنالاستىرىلسا, بيىل 176,6 مىڭ گەكتار بولعالى وتىر. وتكەن جىلى ۇستىمىزدەگى جىلدىڭ ەگىسىنە 262 مىڭ گەكتار جەر دايىندالدى, ونىڭ 151,1 مىڭ گەكتارى قايىرىلىپ جىرتىلسا, 111 مىڭ گەكتارىنا سۇدىگەر كوتەرىلدى. سونىمەن بىرگە 263,7 مىڭ گەكتارعا قار توقتاتىلدى. قازىر كوكتەمگى ەگىس جۇرگىزۋگە قولدا 6,4 مىڭ تراكتور, 107 جوعارى تەحنولوگيالى ەگىس كەشەنى, 4,5 تۇقىم سەپكىش,1,6 مىڭ توپىراق وڭدەۋ اگرەگاتى, 1,8 مىڭ جۇك اۆتوكولىگى جانە 2,9 مىڭ تىركەمە بار. قولدا بار تەحنيكانىڭ جاراقتىلىعى قازىرگى تاڭدا 90 پايىزدى قۇرايدى. وتكەن جىلى اۋىل شارۋاشىلىعى تاۋار وندىرۋشىلەرى 309 جاڭا تەحنيكا ساتىپ العان. – قار ەرىپ, كوكتەم شىعا ديقان قاۋىمى ەرتەڭگى كۇنگە ءۇمىت ارتا قيمىلدايدى. بۇرىنعى جىلدارمەن سالىستىرعاندا, توپىراقتىڭ ىلعالى دا اناعۇرلىم جوعارى. سوندىقتان ديقان قاۋىمى كوكتەمگى ەگىسكە تياناقتى دايىندالۋ قامىندا. ءالى دە القاپقا شىعۋعا ۋاقىت بار. قولدا بار تەحنيكا تولىقتاي دايىندىق ساپىنا قويىلادى. كوكتەمگى ەگىستى مەجەلى ۋاقىتتا وتكىزۋدىڭ مۇمكىندىگى مول, – دەيدى وبلىستىق اۋىل شارۋاشىلىعى باسقارماسىنىڭ باسشىسى مۇحتار جۇماعازيەۆ. ونىڭ ايتۋىنشا, تۇقىم شارۋاشىلىعىن قولداۋعا 154,0 ميلليون تەڭگە قارجى بولىنگەن. بۇدان باسقا تۇقىمدىق اۋىل شارۋاشىلىعى داقىلدارىنا تولەنەتىن بيۋدجەتتىك سۋبسيديا مولشەرى ارتتىرىلعان. مۇنىڭ ءوزى ەگىنشىلەردى ىنتالاندىرا تۇسەرى ءسوزسىز. ساتىبالدى ءساۋىرباي, «ەگەمەن قازاقستان». اقتوبە وبلىسى.