سۋرەتتى تۇسىرگەن نۇربولات نۇرجاۋباي
جۋىردا جاڭاقورعان اۋدانىندا ساياتشىلىقتان رەسپۋبليكالىق چەمپيونات ءوتتى. ەرەسەكتەر اراسىنداعى XV چەمپيوناتقا ەلىمىزدىڭ 2 قالاسى مەن 10 وبلىسىنان ساياتشىلار قاتىستى. ۇلتتىق سپورتتىڭ وسى تۇرىنەن قىزىلوردا وبلىسىندا العاش ۇيىمداستىرىلىپ وتىرعان سايىس قوناقتارى جەتىسۋلىق ارداگەر ساياتشىلار ابدىكارىم تۇسەي مەن شايماردان ادەن, اعا جاتتىقتىرۋشى بازاربەك كۇنتۋعان ۇلى, «قىران» فەدەراتسياسىنىڭ پرەزيدەنتى, قازاقستاننىڭ قۇرمەتتى سپورت قايراتكەرى باعداتحان مۇپتەكەقىزى جارىسقا قاتىسۋشىلارعا ساتتىلىك تىلەدى.
قازىر قازاقستانداعى ۇلتتىق سپورت مەكتەپتەرىنىڭ جانىنان قۇسبەگىلىككە باۋلۋ ساباقتارى ۇيىمداستىرىلعان. وسىنىڭ ارقاسىندا اتادان قالعان ونەرگە قىزىعۋشى جاستار قاتارى كوبەيىپ وتىر.
– اسىرەسە الماتى, جامبىل, تۇركىستان وبلىستارىندا مەكتەپ جانىنداعى قۇسبەگىلىك بولىمدەرى جاستارمەن جۇمىستى جولعا قويعان. ماقساتىمىز – وسىنداي شارالاردى ءجيى ۇيىمداستىرىپ, ساياتشىلىقتى ات بايگەسى, جامبى اتۋ, كوكپار سياقتى دامىپ كەتكەن ۇلتتىق سپورت تۇرىنە تەڭەستىرۋ, – دەدى باعداتحان مۇپتەكەقىزى.
قاراتاۋ باۋرايىندا قىران قالىقتاتقان سايىستا تۇركىستان وبلىسىنان كەلگەن سەيدۋللا پاڭنىڭ قارشىعاسى العىرلىق كورسەتىپ, باس جۇلدەنى يەلەنسە, ماڭعىستاۋلىق ايشۋاق تايمانوۆتىڭ يتەلگىسىنە ءبىرىنشى ورىن بەرىلدى.
بۇركىتشىلەر سايىسىندا اتىراۋ وبلىسىنان كەلگەن قۇسبەگى اقبەرەن قۇرماناليەۆتىڭ قىرانى باس جۇلدەنى جەڭىپ الدى. وبلىس اكىمدىگى, دەنە شىنىقتىرۋ جانە سپورت باسقارماسى, جاڭاقورعان اۋدانى اكىمدىگىنىڭ ۇيىمداستىرۋىمەن وتكەن چەمپيوناتتا ەكىنشى, ءۇشىنشى ورىن يەلەنگەن قۇسبەگىلەر دە ماراپات تورىنەن كورىندى.
قىزىلوردا
