ەلىمىزدە كورسەتىلەتىن مەديتسينالىق كومەكتىڭ كولەمىن ارتتىرۋ ءۇشىن ءمامس جۇيەسى ەنگىزىلگەنى بەلگىلى. الەۋمەتتىك مەديتسينالىق ساقتاندىرۋ قورى 2022 جىلى حالىققا مەديتسينالىق كومەكتى قارجىلاندىرۋعا 2,049 ترلن تەڭگە, ونىڭ ىشىندە تمككك بويىنشا – 1,2 ترلن, ءمامس بويىنشا – 838 ملرد تەڭگە باعىتتاۋدى جوسپارلاپ وتىر.
تەگىن مەديتسينالىق كومەكتىڭ كەپىلدىك بەرىلگەن كولەمى ساقتاندىرىلماعان ازاماتتارعا دا كورسەتىلەدى, وعان شۇعىل جاعدايلاردا مەديتسينالىق كومەك, ۋچاسكەلىك ماماننىڭ قابىلداۋى, شۇعىل وپەراتسيالار, الەۋمەتتىك ءمانى بار اۋرۋلاردى ەمدەۋ, ت.ب. كىرەدى (تولىق تىزبەمەن قور سايتىندا مىنا سىلتەمە بويىنشا تانىسۋعا بولادى: https://fms.kz/press-center/press-relizy/34732/).
ءمامس بويىنشا تىزبەدە مەديتسينالىق كومەك «ساقتاندىرىلعان» مارتەبەسى بار ازاماتتارعا كورسەتىلەدى. بۇل رەتتە 15 جەڭىلدىك ساناتىنداعى 11 ملن ادامعا مەملەكەت جارنا تولەيدى. بۇل ادامدار ساقتاندىرىلعان جانە قوسىمشا اقىسىز مەديتسينالىق كومەك الۋى ءتيىس.
ءمامس بويىنشا كورسەتىلەتىن مەديتسينالىق قىزمەتتەر تىزبەسىنە مىنالار كىرەدى:
* امبۋلاتوريالىق جاعدايداعى مەديتسينالىق كومەك (اۋرۋلاردى دياگنوستيكالاۋ جانە ەمدەۋ):
- سكرينينگتىك زەرتتەۋلەر;
- مساك دارىگەرلەرىنىڭ جولداماسى بويىنشا بەيىندى مامانداردىڭ كونسۋلتاتسيالارى;
- اۋرۋلاردى دياگنوستيكالاۋ جانە ەمدەۋ;
- حالىقتىڭ جەكەلەگەن ساناتتارىنا شۇعىل جانە جوسپارلى نىسانداعى ستوماتولوگيالىق كومەك;
- كۇندىزگى ستاتسيونار جانە ۇيدەگى ستاتسيونار;
- راسىمدەر مەن مانيپۋلياتسيالار;
* تاۋلىك بويعى ستاتسيوناردا اۋرۋلاردى ەمدەۋ جانە دياگنوستيكالاۋ. بۇل جەردە ءبىز بارلىق اۋرۋلار بويىنشا مەديتسينالىق كومەك تۋرالى ايتامىز, سونىڭ ىشىندە قىمبات تۇراتىن وتالار, مىسالى, كارديولوگيالىق, ورتوپەديالىق, ەستۋ ورگاندارىنا جاسالاتىن وپەراتسيالار جانە ت.ب.
* دياگنوستيكا جانە ەمدەۋ حاتتامالارىندا كوزدەلگەن بارلىق اۋرۋلار بويىنشا مەديتسينالىق وڭالتۋ;
* سكرينينگتىك زەرتتەۋلەردى, وپەراتسيالاردى جانە ت. ب. جۇرگىزۋ كەزىندە بيوماتەريال جىبەرىلەتىن گيستولوگيالىق, تسيتولوگيالىق جانە باسقا دا زەرتتەۋلەردى قامتيتىن پاتولوگيالىق-اناتوميالىق دياگنوستيكا;
* ترانسپلانتتاۋ كەزىندەگى دياگنوستيكالىق زەرتتەۋلەر;
* دارىلىك زاتتارمەن جانە مەديتسينالىق بۇيىمدارمەن قامتاماسىز ەتۋ.
«شۇعىل كومەك ساقتاندىرىلماعان ادامدارعا دا كورسەتىلەتىنىن بىلگەن ءجون, ويتكەنى ول تمككك شەڭبەرىندە جۇرگىزىلەدى. الايدا مەديتسينالىق كومەك جوسپارلى تۇردە ءمامس-تە ۇسىنىلادى. ساقتاندىرىلعان تۇلعا مارتەبەسىنە يە بولا وتىرىپ, پاتسيەنت مەديتسينالىق قىزمەتتەردىڭ كوپتەگەن تۇرىنە قول جەتكىزە الادى. بەيىندى مامانداردىڭ قابىلداۋى, ءارتۇرلى تالداۋلار, كت, مرت, ۋدز, رەنتگەن, ەكگ سەكىلدى قۇنى قىمبات زەرتتەۋلەر, كوپتەگەن اۋرۋدىڭ دياگنوستيكاسى, وڭالتۋ قىزمەتتەرى, جوسپارلى وپەراتسيالار ءمامس تىزبەسىنە كىرەدى. ياعني بۇرىن اقىلى نەگىزدە كورسەتىلگەن قىزمەتتەردى ساقتاندىرىلعان ازاماتتار قازىر تەگىن الا الادى», دەپ تۇسىندىرەدى قوردىڭ ەلوردا فيليالىنىڭ ءباسپاسوز قىزمەتى.
«ساقتاندىرىلعان» مارتەبەسىن الۋ ءۇشىن الدىڭعى 12 ايدىڭ جارناسىن تولەۋ قاجەت, ال بجت تولەۋشىلەرگە سوڭعى ايلاردا, سونىڭ ىشىندە اعىمداعى ايلاردا ءۇش رەت ۋاقتىلى تولەم جاسالۋى جەتكىلىكتى. بجت تولەۋشىلەر ءۇشىن ساقتاندىرىلۋ مارتەبەسى تولەنگەن ايدىڭ سوڭعى كۇنىنە دەيىن ارەكەت ەتەتىندىگىن ەستە ساقتاۋ قاجەت. مىسالى, ەگەر ءمامس ءۇشىن تولەم اقپان ايىندا بولسا, وندا 1 ناۋرىزدان باستاپ بجت كەزەكتى تولەمىن جاساماسا, ادام ساقتاندىرىلمايدى. ەگەر اعىمداعى كەزەڭدە نەمەسە الدىن الا تولەم بولماسا, مارتەبە جوعالادى جانە ونى قالپىنا كەلتىرۋ ءۇشىن بجت-دا ءۇشىنشى ءبىرىزدى تولەمنىڭ باستالۋىن قايتادان كۇتۋگە تۋرا كەلەدى.
ەگەر سىزدە ساقتاندىرۋ مارتەبەسىن الۋعا نەمەسە مەديتسينالىق كومەك الۋعا قاتىستى سۇراقتار تۋىنداعان بولسا, ءاربىر مەديتسينالىق ۇيىمدا بار پاتسيەنتتى قولداۋ قىزمەتىنە جۇگىنە الاسىز. ەگەر جاعدايدى سول جەردە شەشۋ مۇمكىن بولماسا, الەۋمەتتىك مەديتسينالىق ساقتاندىرۋ قورىنا ءوتىنىشتى وزىڭىزگە ىڭعايلى بايلانىس ارناسى بويىنشا قالدىرۋعا بولادى: fms.kz رەسمي سايتى, 1406 بايلانىس ورتالىعى, Goldau 24/7 ءموبيلدى قوسىمشاسى جانە Telegramداعى SaqtandyryBot.
