قازاقستاننىڭ بيىلعى EFM-گە قاتىسۋىنىڭ ءمانى مىنادا – بەرلينالەگە قاتىساتىن جۇمىستاردىڭ فەستيۆالدەگى تابىسىنا سۇيەنە وتىرىپ, جالپى قازاقستاندىق كينو ونىمدەرىنە قىزىعۋشىلىقتى ارتتىرۋ. بەرلينالە فەستيۆالىنىڭ باعدارلاماسىنا ەنگەن ءۇش كارتينا الەمدىك كينوبيزنەس وكىلدەرىنىڭ قازاقستاندىق كينەماتوگرافقا نازار اۋدارۋىنا تۇرتكى بولارى ءسوزسىز. ونىڭ ەكەۋى – دارەجان ومىرباەۆتىڭ «اقىن» جانە فارحات ءشارىپوۆتىڭ «سحەما» كوركەم فيلمدەرى. ەكەۋى دە ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن. ءۇشىنشىسى – اسقار ۇزاباەۆتىڭ «باقىت» الەۋمەتتىك دراماسى.
Forum سەكتسياسىندا ۇسىنىلاتىن «اقىننىڭ» بۇعان دەيىنگى فەستيۆالگە قاتىسقان تاجىريبەسى بار. كارتينانىڭ تۇساۋكەسەرى وتكەن جىلدىڭ سوڭىندا توكيو كينوفەستيۆالىندە ءوتىپ, ونىڭ اۆتورلارى ۇزدىك رەجيسسۋرا ءۇشىن سىيلىق يەلەنگەن بولاتىن. ال «سحەما» تۋىندىسى (Generation 14+ سەكتسياسىنىڭ قاتىسۋشىسى), وتكەن جىلدىڭ جەلتوقسانىندا ۇيىمداستىرىلعان ماسكەۋ كينونارىعىندا مامانداردىڭ نازارىن اۋدارعان. بەرلين فەستيۆالى مەن كينو نارىعى اياسىندا فەستيۆال قاتىسۋشىلارىنا, ديستريبيۋتورلارعا جانە ءباسپاسوز وكىلدەرىنە ارنالعان كورسەتىلىمدەردى قوسا العاندا, ءار كارتينا جەتى رەت كورسەتىلەدى. ساتىپ الۋشىلاردىڭ نازارىنا ۇسىنىلاتىن ۇلكەن تىزىمگە ەنگەن كەيبىر تۋىندىلارعا توقتالىپ وتەيىك.
الديار بايراكيموۆتىڭ «پاراليمپياداشى» ءفيلمى شىنايى وقيعاعا نەگىزدەلگەن. رەجيسسەردى قىسقى پاراليمپيادا ويىندارىنىڭ العاشقى قازاقستاندىق چەمپيونى الەكساندر كولياديننىڭ تاعدىرى شابىتتاندىرعان.
ەرنار نۇرعاليەۆ تۇسىرگەن «العا» اتتى تاعى ءبىر سپورتتىق درامادا اكەلەرىن جوعالتقان ەكى اعايىندىنىڭ ۇلكەن سپورت ارقىلى ءوز ءومىر جولىن ايقىنداعانى باياندالادى. «دوس-مۇقاسان» – ايدىن ساحاماننىڭ ميۋزيكلى, ونىڭ نەگىزىندە اتى اڭىزعا اينالعان قازاقستاندىق انسامبل جەتىستىگىنىڭ تاريحى مەن مۋزىكانتتاردىڭ وسى تابىسقا جەتۋ جولىنداعى باسىنان كەشكەن بۇرالاڭ تاريحى تارقاتىلادى.
بەرليندە تانىستىرىلعان مەملەكەتتىڭ قارجىلاندىرۋىنسىز تۇسىرىلگەن كارتينالاردىڭ ىشىندە پروكاتى تابىسپەن وتكەن «مويا بولشايا كازاحسكايا سەميا», جاس كينەماتوگرافيستەردىڭ دەبيۋتتىك كارتيناسى «زەرە», سونداي-اق ەكاتەرينا سۋۆوروۆا تۇسىرگەن تانىمال NinetyOne توبى تۋرالى «پەت سۆوي پەسني» اتتى دەرەكتى فيلمدەرى بار.
فەستيۆال كەشە عانا باستالسا دا بىرقاتار قازاقستاندىق فيلمدەرگە حالىقارالىق ساتىپ الۋشىلار قىزىعۋشىلىق تانىتىپ وتىر.
ۇكقمو باسقارما توراعاسىنىڭ ورىنباسارى باۋىرجان شوكەنوۆتىڭ ايتۋىنشا, كينوورتالىق ءوز الدىنا بىرىڭعاي مازمۇندىق الاڭعا اينالۋ ماقساتىن قويعان, ول مەملەكەت قارجىلاندىراتىن فيلمدەردى عانا ەمەس, تاۋەلسىز وندىرۋشىلەر تۇسىرگەن كارتينالاردى, ءبىر سوزبەن ايتقاندا, ەل اۋماعىندا شىعارىلاتىن بارلىق كونتەنتتى قامتيدى. بارلىق اقپارات KazakhCinema ۆيرتۋالدى ستەندىندە ۇسىنىلعان.
– بەرلينمەن توقتاپ قالمايمىز, – دەيدى ب.شوكەنوۆ. – الەمنىڭ ءىرى كينونارىقتارىنا قاتىسۋدى جالعاستىرامىز. الداعى كانن فەستيۆالىندە قويىلاتىن قازاقستان پاۆيلونى – بۇل دا ءبىز ءۇشىن ماڭىزدى الاڭنىڭ ءبىرى, وعان ءبىز «قازاقفيلمدى» دە, ءىرى پروداكشن-ستۋديالاردى دا شىعارماقپىز. كينوورتالىقتىڭ سىرتقى نارىققا بىرىڭعاي وپەراتور رەتىندە شىققانى دۇرىس, بۇل ەل ءيميدجىن قالىپتاستىرۋعا ۇلكەن سەپتىگىن تيگىزەدى جانە كينويندۋستريانىڭ بارلىق قاتىسۋشىلارىنا سالانىڭ ءبىرتۇتاس بولىپ, ءبىر باعىتتا قوزعالاتىنىن تۇسىنۋگە مۇمكىندىك بەرەدى. بۇل – بۇكىل الەم ۇستاناتىن قاعيدات.
