«كوپبەيىندى اۋرۋحانالار سالۋ بويىنشا رەسپۋبليكالىق مەملەكەتتىك-جەكەشەلىك ارىپتەستىك جوبالارىنىڭ تىزبەسىن وڭتايلاندىرۋ ماقساتىندا دەنساۋلىق ساقتاۋ مينيسترلىگى قولدانىستاعى «دەنى ساۋ ۇلت» ۇلتتىق جوباسىن ىسكە اسىرۋ اياسىندا ءبىرىنشى كەزەڭدە 2025 جىلعا دەيىن 5 ۋنيۆەرسيتەتتىك اۋرۋحانا جانە 3 كوپبەيىندى اۋرۋحانا سالۋدى جۇزەگە اسىرۋدى جوسپارلاپ وتىر. بۇل رەتتە, قالعان 12 جوبا 2026 جىلدان باستاپ كەزەڭ-كەزەڭىمەن ەنگىزىلەتىن بولادى», دەدى اجار عينيات.
ونىڭ ايتۋىنشا, بۇگىنگى تاڭدا يندۋستريا جانە ينفراقۇرىلىمدىق دامۋ, ۇلتتىق ەكونوميكا جانە قارجى مينيسترلىكتەرىمەن مەديتسينالىق بۇيىمدارسىز اۋرۋحانا قۇرىلىسىنىڭ 1 شارشى مەترىنىڭ شەكتى قۇنىن جانە 1 توسەك-ورىنعا ارنالعان شەكتى الاڭ ءنورماتيۆىن ايقىنداۋ جۇمىسىن جۇرگىزىپ جاتىر. سونداي-اق وڭتايلى قارجى مودەلىن پىسىقتاۋ جانە جوعارىدا اتالعان 8 جوبا بويىنشا شىعىستاردى وڭتايلاندىرۋدى قولعا الدى.
«جوعارىدا اتالعان تاپسىرمالار اۋرۋحانالاردى سالۋ جونىندەگى باعدارلامانى ىسكە اسىرۋدىڭ بىرىڭعاي ءتاسىلى مەن وڭتايلى نۇسقاسى جونىندە ۇسىنىستار ازىرلەۋگە مۇمكىندىك بەرەدى. ۋنيۆەرسيتەتتىك اۋرۋحانالاردى ىسكە اسىرۋدىڭ باسىمدىعى بارلىق قالعان جوبالاردى كادرلارمەن قامتاماسىز ەتۋ جانە ءبىلىم, عىلىم مەن پراكتيكانىڭ ۇشتۇعىرلىعى قاعيداتىن ءىس جۇزىندە قولدانۋ قاجەتتىگىنەن تۋىندايدى», دەدى ول.
