ورالدا بەكىرە تۇقىمداس بالىق ءوندىرۋ كەشەنىنىڭ بازاسىندا زاۋىت قۇرىلىسى باستالادى. بۇل تۋرالى مالىمدەگەن قورشاعان ورتانى قورعاۋ جانە سۋ رەسۋرستارى ءمينيسترى نۇرلان قاپپاروۆ مۇنىڭ ەلىمىزدەگى بالىق شارۋاشىلىعىن جاڭاشا باعىتتا دامىتۋدى ماقسات ەتكەن العاشقى يننوۆاتسيالىق جوبا ەكەنىن اتاپ ءوتتى.
وڭتۇستىك قازاقستان وبلىسىنىڭ اكىمدىگى مايرا مۇحامەدقىزىنا اۆتوكولىك سىيلادى. بەلگىلى وپەرا ءانشىسىن ۇلىستىڭ ۇلى كۇنى قارساڭىندا قابىلداعان ايماق باسشىسى اسقار مىرزاحمەتوۆ ونىڭ الەمدىك دەڭگەيدە ونەر كورسەتىپ, ەلدىڭ ابىرويىن اسقاقتاتىپ ءجۇرگەنىنە ريزاشىلىق ءبىلدىردى. ال بۇگىن قازاقستاننىڭ ەڭبەك سىڭىرگەن ءارتىسى شىمكەنتتەگى ج.شانين اتىنداعى وبلىستىق دراما تەاتردا مەرەكەلىك كونتسەرت بەرەدى.
پەتروپاۆل قالاسىنىڭ تۇرعىنى 114-كە تولعان تۋعان كۇنىن جاقىن-جۇراعاتتارىمەن تويلادى. قازاقستاندا ەڭ ۇزاق ءومىر ءسۇرۋشى ەكىنشى ادام بولىپ تابىلاتىن بيكامال مۇرجىقوۆا اجەي بۇگىندە 12 نەمەرە مەن 25 ءشوبەرەدەن بولەك, شوپشەك تە ءسۇيىپ وتىر.
پاۆلوداردا ناۋرىز مەرەكەسى قارساڭىندا 115 تۇرعىنعا جاڭا پاتەرلەردىڭ كىلتتەرى تاپسىرىلدى. «جۇمىسپەن قامتۋ-2020» مەملەكەتتىك باعدارلاماسىنىڭ اياسىندا سالىنعان 9 قاباتتى ءۇيدىڭ ەندىگى يەلەرى اراسىندا جۇمىسسىزدار, مۇگەدەكتەر مەن وبلىس ورتالىعىنىڭ ەڭبەك نارىعىنداعى قاجەت ماماندىقتارعا ارنايى كۋرستاردا وقىپ جاتقان جاس وتباسىلارى بار.
قىزىلوردا وبلىسىنىڭ پروكۋرورلارى زاڭسىز بەرىلگەن 1,9 ملن. تەڭگەنىڭ جالاقىسىن بيۋدجەتكە قايتاردى. وبلىستىڭ سىرداريا اۋداندىق پروكۋراتۋراسى اۋداندىق ىشكى ىستەر ءبولىمىنىڭ بيۋدجەت قارجىسىن يگەرۋىن تەكسەرۋ بارىسىندا لاجسىز بوس جۇرگەن ۋاقىتى ءۇشىن 2 قىزمەتكەرگە زاڭسىز تولەنگەن اقشانىڭ كەرى قايتارىلۋىنا قول جەتكىزدى.
تاراز كارديوحيرۋرگيالىق ەمحاناسى جۇرەككە وتا جاساۋدىڭ جاڭا ءتۇرىن مەڭگەردى. بۇدان بىرەر كۇن بۇرىن «جۇرەك» اتتى ورتالىقتا قان شىعارماۋ تاسىلىمەن جۇرگىزىلگەن «راديوجيىلىك ابلاتسياسى» اتالاتىن بۇل وپەراتسيانى جاس دارىگەر تيمۋر ءاشىروۆ ەۋروپادان كەلگەن روين رەكۆاۆامەن جانە ياروسلاۆ سترەحارسكيمەن بىرگە جاسادى.
24KZ, BNews.kz, Nur.kz, Egemen.kz
حابارلارى بويىنشا دايىندالدى.
