كەزدەسۋ بارىسىندا ماۋلەن اشىمباەۆ ەكى ەلدىڭ مەملەكەت باسشىلارى قازاقستان مەن وزبەكستان اراسىنداعى ىنتىماقتاستىقتى بەلگىلەپ بەرگەنىن, ونى جوعارى دەڭگەيدى زاڭنامالىق ورگانداردىڭ بايلانىستارى ارقىلى ءارى قاراي دامىتۋدىڭ ماڭىزدى ەكەنىن اتاپ ءوتتى.
ء«بىزدىڭ پرەزيدەنتتەرىمىزدىڭ ارقاسىندا قازاقستان مەن وزبەكستان اراسىنداعى ستراتەگيالىق ىنتىماقتاستىق دايەكتى دامىپ كەلەدى. بۇل رەتتە پارلامەنتارالىق ديالوگتىڭ ماڭىزى زور. سوندىقتان پارلامەنتتەرىمىزدىڭ ءوزارا بايلانىسى تۇراقتى جانە دامۋ سيپاتىنا يە بولدى. ەكى مەملەكەت باسشىلارىنىڭ ۋاعدالاستىعى ناتيجەسىندە قۇرىلعان پارلامەنتارالىق ىنتىماقتاستىق كەڭەسى دە ەكىجاقتى پارلامەنتارالىق بايلانىستاردى دامىتۋعا قوسىمشا سەرپىن بەرەدى», دەدى ماۋلەن اشىمباەۆ.
ءوز كەزەگىندە وزبەكستان ولي ءماجىلىسى زاڭ شىعارۋ پالاتاسىنىڭ توراعاسى قازاقستان پرەزيدەنتى باستاماشى بولعان رەفورمالاردى وزبەكستان تاراپى قۇپتاپ وتىرعانىن اتاپ ءوتتى. ول سونداي-اق قاسىم-جومارت توقاەۆتىڭ كوپتەگەن باستامالارى تەك قازاقستانعا عانا ەمەس, بۇكىل ورتالىق ازيا ءوڭىرى ءۇشىن ماڭىزدى ەكەنىنە توقتالدى. نۇردينجون يسمويلوۆ پارلامەنتارالىق ىنتىماقتاستىق كەڭەسى قازاقستان مەن وزبەكستان اراسىنداعى ءوزارا قارىم-قاتىناستاردى نىعايتۋعا ەلەۋلى ۇلەس قوساتىنىنا سەنىم ءبىلدىردى.
كەزدەسۋ بارىسىندا ەكىجاقتى سيپاتتاعى ىنتىماقتاستىق حالىقارالىق الاڭدارداعى, ونىڭ ىشىندە تمد پاا اياسىنداعى ءوزارا ءىس-قيمىلمەن تولىقتىرىلىپ, كۇشەيتىلەتىنى اتاپ ءوتىلدى. ماۋلەن اشىمباەۆ بيىلعى 28-29 ناۋرىزدا الماتى قالاسىندا تمد ەلدەرى پارلامەنتتەرى باسشىلارىنىڭ جانە بىرقاتار حالىقارالىق پارلامەنتتىك ۇيىمداردىڭ قاتىسۋىمەن وتەتىن تمد پاا كەڭەسىنىڭ مەرەيتويلىق وتىرىسى ءوزارا قارىم-قاتىناستاردى ودان ءارى دامىتۋعا سەرپىن بەرەتىنىن ايتتى.
