ادال ەڭبەك بۇگىنگى قوعام ءۇشىن اۋاداي قاجەت. ق.توقاەۆتىڭ بۇل ءسوزى كوزبوياۋشىلىقتىڭ ءداۋىرى وتكەنىن كورسەتىپ وتىر. ءومىردىڭ ءوزى ءار نارسەنى ورىن-ورنىنا قويىپ كەلەدى. ادال ەڭبەكسىز كەلگەن پايدانىڭ دا, ناپاقانىڭ دا سوڭى جاقسىلىققا اپارمايدى. وسى ماسەلە تۋرالى ءاربىر وتانداسىمىز ويلانۋى قاجەت. سەبەبى ادال ەڭبەكتى وزگەدەن عانا كۇتپەي, ءوزىمىز دە وسىعان ىنتالانۋىمىز كەرەك. بازبىرەۋ ادال ەڭبەك ۇسىنعان بولسا, وعان تۇتىنۋشى دا ادالدىقپەن جاۋاپ قايىرعانى ءجون.
ارينە, پرەزيدەنت بۇل سوزدەردى ەڭ الدىمەن, مەملەكەتتىك قىزمەتشىلەرگە ايتقانى انىق. سەبەبى تابيعي, ەنەرگەتيكالىق, الدە اكىمشىلىك بولسىن مەملەكەتتىك رەسۋرستاردىڭ بارلىعى مەملەكەتتىك قىزمەتشىلەردىڭ قۇزىرەتىندە. ولارعا حالىق سەنىم ارتىپ, جاۋاپتى قىزمەتكە تاعايىندالۋلارىنان ۇلكەن ءۇمىت كۇتەدى. مەملەكەتتىك قىزمەتشى دەگەنىڭىز قوعامنىڭ سەنىمىنە يە تۇلعا. وكىنىشكە قاراي, قوعام بۇل سەنىمىن الدەقاشان جوعالتىپ العان. لاۋازىمدى تۇلعالار سەنىمىنەن ايىرىلدى. كوپ ماسەلە ءالى دە بولسىن تۇبەگەيلى شەشىمىن تاپقان جوق. سوندىقتان مەملەكەت باسشىسى ناقتى تاپسىرمالار بەرىپ, باعىت-باعدار ۇسىنىپ وتىر. ماسەلەلەردى ءتيىمدى شەشۋدىڭ جولدارىن كورسەتىپ بەردى.
سوندىقتان ءاربىر ادام ادال ەڭبەك ەتۋگە تالپىنۋعا ءتيىس. مانساپقا جەتۋ, بايلىققا كەنەلۋ ءۇشىن ادال ەڭبەك ەتكەن بولىپ, اينالاسىن الداپ جۇرەگەندەردىڭ تاۋى شاعىلاتىن كەز كەلدى. ونداي ادامدارعا دا ويلاناتىن, ناقتى ىسپەن اينالىساتىن ۋاقىت جەتتى. ادال ەڭبەك قانا مەملەكەتىمىزدى العا باستىرادى. مىنە, سوندىقتان پرەزيدەنت تە, قوعام دا مەملەكەتتىك قىزمەتتىڭ تىزگىنىن ۇستاعان ازاماتتارعا وسىنداي تالاپ قويىپ, ادالدىعىنا سەنىم ارتىپ وتىر. الايدا بۇل سەنىمنىڭ دە, شىدامنىڭ دا شەگى بار.
ادامدار اتقارعان ادال ەڭبەگىنە ساي باقۋاتتى ءومىر سۇرەتىن, ءال-اۋقاتى جاقساراتىن بولسا مەملەكەتتىك جۇيەنى قالپىنا كەلتىردىك دەپ سوندا عانا ايتا الامىز. مەملەكەت باسشىسى ايتىپ وتكەندەي, كوپتەگەن وتباسىنىڭ كىرىسى تەك قانا مەملەكەتتىك دوتاتسيالارمەن, الەۋمەتتىك جەڭىلدىكتەرمەن, سۋبسيديالارمەن, ءتۇرلى الەۋمەتتىك تولەمدەرمەن عانا بايلانىستى بولىپ وتىر. شىنىن ايتۋ كەرەك, ەڭبەك نارىعىندا جۇرگەن, ەكونوميكالىق تۇرعىدا بەلسەندىلىك تانىتىپ جۇرگەن ادامداردىڭ سانى شامالى. الەۋمەتتىك جەڭىلدىكتەرگە سۇيەنەتىن ادامداردى بىلاي قويىپ, جۇمىس ىستەپ جۇرگەن كوپ جانداردىڭ نە ءوزىن, نە ءوز وتباسىن تولىق قامتاماسىز ەتەتىن جالاقىسى دا, مۇمكىندىگى دە جوق. ماسەلەنىڭ وزەگى وسىندا. ەگەر ەلىمىزدە ەڭبەك ادال باعالانىپ, جالاقى ءادىل تولەنەتىن بولسا مۇنداي كۇيگە تۇسپەيتىن ەدىك.
ارينە, ماسەلە جالعىز جالاقىدا ەمەس. بارلىق ماسەلە تابىسپەن, كىرىسپەن ولشەنبەيتىنى دە بەلگىلى. ساقتاندىرۋ جۇيەسى بولسىن, قىزمەتتەردىڭ قولجەتىمدىلىگى بولسىن, ونى قامتاماسىز ەتەتىن ينفراقۇرىلىم, نارىق بولسىن بارلىعى ءبىر-بىرىمەن تىعىز, تىكەلەي بايلانىستى. ماسەلە جۇيەلى تۇردە شەشىمىن تابۋعا ءتيىس. ولاي بولماعان جاعدايدا مەملەكەت باسشىسى ءتيىستى شارا قابىلدايتىنى انىق.
ايگۇل سادۋاقاسوۆا,
الەۋمەتتانۋشى
