«سوڭعى بەس جىلدا اۋىل شارۋاشىلىعىن دامىتۋعا 2 ترلن تەڭگەدەن استام قارجى ءبولىندى. الايدا سۋبسيديا كولەمى قانشا وسسە دە, بۇل سالادا اۋىز تولتىرىپ ايتاتىن وزگەرىس بولعان جوق. اۋىل شارۋاشىلىعى مينيسترلىگى مەن اكىمدىكتەر سبۋسيديانى تاراتىپ بەرۋمەن عانا شەكتەلگەن. وعان ەشقانداي تالداۋ جاسالعان جوق. قارجىنىڭ ءتيىمدى ماقساتقا جۇمسالۋىن دا ەشكىم باقىلاۋعا الماعان. سۋبسيديا تۇپكى يەسىنە جەتپەي, ورتا جولدا تالان-تاراجعا تۇسۋدە. ءتىپتى اۋىل شارۋاشىلىعىنا ەش قاتىسى جوق سالالار دا ونىڭ قىزىعىن كورۋدە. سوڭعى جىلدارى سىبايلاس جەمقورلىققا قارسى ءىس-قيمىل اگەنتتىگى 960 قىلمىستىق ءىستى تەرگەگەن. سونىڭ 54 پايىزى سۋبسيديانى جىمقىرۋعا قاتىستى بولعان», دەدى مەملەكەت باسشىسى.
سونداي-اق پرەزيدەنت سۋبسيديالاۋدىڭ بىرىڭعاي اقپاراتتىق جۇيەسى جوقتىعىن سىنعا الدى.
«وسى جۇمىسقا قاجەتتى قۇرال-جابدىقتىڭ باعاسى 2-3 ەسە ارتىق كورسەتىلگەن. ءتىپتى كەي جاعدايدا قارجىنى قاعاز جۇزىندە يگەرە سالعان. سونىمەن قاتار سۋبسيديا الىپ وتىرعان جۇرتتىڭ اۋىل شارۋاشىلىعى ونىمدەرىن وڭدەۋگە جانە ساقتاۋعا اسا قۇلقى جوق. سەبەبى سۋبسيديالاۋ جۇيەسىنىڭ ءوزى شارۋالاردى بۇعان ىنتالاندىرمايدى. جاعداي تۇزەلمەسە, اگروونەركاسىپ كەشەنى شيكىزات وندىرۋدەن اسا المايتىنى انىق. سۋبسيديالاۋدىڭ بىرىڭعاي اقپاراتتىق جۇيەسى جوق. جەكە قۇرىلىمدار سۋبسيديا بولۋگە قاتىستى ءتۇرلى پورتالدار اشقان. ولار ءوز قىزمەتى ءۇشىن شارۋالاردان 3,11 ايلىق ەسەپتىك كورسەتكىش مولشەرىندە اقشا الىپ وتىر. شارۋالاردىڭ بۇعان نارازىلىق ءبىلدىرۋى ورىندى. ۇكىمەتكە سۋبسيديالاۋ تۋرالى اقپاراتتى تولىق قامتيتىن پلاتفورما ازىرلەۋدى تاپسىرامىن. بۇل پلاتفورما شارۋالارعا تەگىن قىزمەت كورسەتۋى كەرەك», دەدى قاسىم-جومارت توقاەۆ.
